由零開始的日本工作假期教學(申請篇)

由零開始的日本工作假期教學(申請篇)

相信各位身邊都總有個就快申請,甚至已經喺日本工作緊嘅朋友啩。但以往每年只得250個名額,所以往往會俾人「這些機會不是屬於我」嘅感覺。
 
由今期起,呢個一向要掙崩頭先申請到嘅日本工作假期計劃,
大幅增加到每年1500個(每期750個),絕對係喜愛日本朋友嘅一大喜訊!
 
睇返官方公佈嘅數據,舊年申請人總數都只係得811人,換句話講依家個名額數字上隨時夠哂畀全部合資格嘅申請人入閘。今期截止日期為2016 年10 月31 日,大家仲唔把握機會開展日本尋夢之旅!?
 
由零開始的日本工作假期教學(申請篇)
除了每年名額擴大至1500個外,受理簽證的申請期間亦由2星期延長至1個月
 
申請方法其實唔太複雜,只要合符條件,再喺申請期間內準備好相關文件,親身交返去日本總領事館就OK架喇。下面畀返小小tips大家點樣準備好啲文件啦。
 
 
基本條件 :
-香港常住居民
-18至30歲(申請時未夠31歲就得)
-持有香港特區護照/BNO
-身體健康及無犯罪紀錄
-從未取得日本工作假期簽證

 
申請文件:
赴日簽證申請表 (下載申請表格
需要貼上一張證件相,官方就要求4.5cm X 4.5cm,仲要係半年內影嘅。
查實SIZE有多少出入都畀嘅,如果你個樣無咩點變又唔想影過嘅話,用返舊相都OK,不過小心唔好穿崩。試過有人用返同護照同一張,但佢本護照就3年前申請落嘅,當人傻的嗎。
 
其實呢張相會用嚟整你個VISA同在留卡,最好都係影返張四正啲架喇,始終會跟住你成年。
 
預定嘅航班同酒店嗰啲可以大約寫住先,唔需要作實。另外,留意返一點就係就算係冇嘅地方都要填返個「無」字上去。在日保證人同在日邀請人官方有寫明話唔使填
 
成份野可以隨你用手寫或者直接係電腦打,除咗簽名要親筆簽返。
 
 
護照(複印本)
要影印有你張相同資料嗰版、簽名嗰版,同埋有日本出入境蓋章嘅所有頁數。
 
 
理由書(正本)
寫低希望去工作假期計劃嘅理由、入境後希望或預定進行之活動內容等 (A4大小紙張、不限頁數、英文或日文填寫、可用電腦完成但最後必須附上個人姓名,身份證號碼及親筆簽名)
 
由於官方冇公開過詳細審查準則,一般認為呢份理由書就係定勝負嘅關鍵。不過只限用英文或日文嚟寫,所以對唔少人嚟講有一定難度。建議先盡自己能力去寫,再請朋友老師畀意見,作出適當修改。
 
至於寫嘅方法可謂五花八門各色其色,有人親筆書寫以示誠意,畫上插圖只為吸引考官的目光,亦有人用電腦編輯以求整齊,再貼上遊日照片,甚至把行程規劃用地圖來表示。由於冇辦法證明哪一種方式最好,所以大可以按適合自己的方法嚟寫。
 
內容方面離不開自我介紹、想要去日本嘅原因、到當地後嘅行程規劃、希望有咩得著等等。 行程上不妨具體一點,詳細列出想去的地方,想要體驗的經歷,等人覺得你有做過功課,但需要顧及可行性,切忌過於天花亂墜,不切實際。
 
總而言之就係要說服考官覺得你是適合去日本工作假期一年的人選,儘可能表達自己的誠意吧。
 
由零開始的日本工作假期教學(申請篇)
理由書係表達誠意(背景無關)的最大機會

 
有一點需要注意的,由於工作只被認可為附帶活動,只用作賺取旅費。所以要避免讓人覺得你係為咗工作而去日本,外間有說法是最好對工作方面隻字不提,只管吃喝玩樂就fit哂。當然係真係假就……
 
履歷書(正本)下載履歷表格
只可用日文或英文填寫。難度不大,唯一係日本滯在歷嗰項,需要填哂你曾經逗留在日本嘅時間、目的同地點,可以參照返你本護照上嘅記錄嚟填。
 
香港永久性居民身份證(複印本)
呢樣唔使多講啦,只係影印你張身份證。(有你個樣嗰面…)
 
在學證明書或最終學歷證明文件(複印本)
仲讀緊書嘅就叫學校出封在學證明書然後攞去影印。
畢左業嘅就影印張畢業證書。
其實以上兩行都係廢話,不過以防有人唔識……
 
證明持有足以購買回程機票的款項及足夠維持在日本逗留初期之生活所需費用的資料(複印本)
可以叫銀行嗰邊出張存款證明,如果你有簿仔直接攞去影印又得(有你名嗰版同存款嗰版)。至於要幾多錢呢,官方指引就話最低門檻係港幣$22,000(初期生活$16,000,回程機票$6000)。如果你攞VISA嗰陣可以出示到回程機票就只需要萬六蚊嘅存款證明就得啦。
 
其實存款嘅多少同你申請成功與否有冇直接或間接關係就眾說紛紜。從正常邏輯思考,冇人會嫌你錢多而唔畀你去日本嘅,至少可以證明到你有足夠銀彈支持你喺日本生存落去…
 
由零開始的日本工作假期教學(申請篇)
重申一次,誠意先係最重要
 
其他自我推薦之資料(複印本)
日文能力試證書、日文學校畢業證書,茶道、花道、劍道、柔道證書,總之所有同日本有關嘅都全部哂冷有得加分。
 
注意:所有複印本都要求單面A4大小。