用盡高山、北陸地區周遊券之北陸中部6日行程

車長就知道有個高山、北陸地區有個Pass,非常之好用。
所以諗咗個用盡呢個地區周遊券之北陸中部嘅6日行程!大家可以參考下~
 
時間有限,所以車長會選擇零晨機去大阪!
毎日都有2班零晨機、分別係樂桃MM68同國泰CX566。
各有各好,不過車長的話比較少選擇坐LCC(廉航)!  
 
呢個高山、北陸地區周遊券Pass5日都只係14000円~
 
第1日
朝早約6點至6點半喺關西國際機場降落的話,出得境約8點,
換埋Pass同預約定新大阪去金沢班車指定席後,就可以坐JR関西空港特急はるかHaruka8號。
 
因為個Pass坐はるか只能坐自由席、所以早少少落去4至6號車卡排隊啦~
朝早8點45分開車,坐到去新大阪站轉車(時間係09點37分),行去隔離12號月台,坐特急サンダーバードThunderbird13號,09點46分新大阪開車。
 
最快12點17分就會到達金沢站。
 
車長推介住ホテルマイステイズプレミア金沢(HOTEL MYSTAYS PREMIER Kanazawa)!
間酒店喺金沢站西口行5分鐘就到,房間至少都30平方米大,60日前予約半價,家下去樂天預約的話2晩加埋都只係13000円。
 
去得金沢、當然要去指定果幾個景點啦~
 
兼六園
 
東茶屋街
 
近江町市場
 
金沢21世紀美術館
金沢城公園
 
松任ふるさと館
 
以上之外
仲有其他少啲香港人會去嘅地方,好似下面呢2個:
箔一本店 箔巧館 
 
呢個金箔雪糕…靚到唔係好捨得食,但唔食又唔得!
 
竪町
タテマチ(竪町)
基本上就係金沢嘅原宿,有好多雜貨、時裝同婚紗舗係度。
 
想食野就去銘酒と焼肉 京澤
非常好味,只係有少少貴~~
 
 
第1日建議要坐嘅車係:
關西空港08:45am開車-坐はるかHaruka8號自由席→09:37am到達新大阪
新大阪09:46am開車-坐サンダーバードThunderbird13號指定席→12:17pm到達金沢
 
「咁車長車長,我想中途停下大阪或京都的話可以坐咩車去金沢呀?」
特急サンダーバード可以喺大阪、新大阪及京都坐到去金沢!
最尾班サンダーバード由大阪08:54pm開車,新大阪08:58pm開車,京都09:21pm開車,千祈唔好遲咗呢班車呀!
 
PS:到金沢後要去金沢站東口巴士中心案内所(金沢駅東口バスターミナル)Book定後日由金沢去白川郷同白川郷去高山2班巴士!
下面係時間表 建議Book 10:50am金沢開去白川郷個班同05:20pm白川郷開去高山個班
 
 
第2日(2月7日)
基本上都係係金沢漫遊,因為金沢太多野行喇!
今日晩飯推介:もりもり寿し
呢間廻轉寿司係車長認為日本頭3位~
低價高Lv!!! 分別有近江町店同金沢駅前店~
 
 
第3日(2月8日)
朝早Check out 完後就直接上白川郷,所以最好10點前Check out!
係金沢站坐到10點50分個班巴士,12點半左右就到白川郷~
 
下面係白川郷地圖
可以喺白川郷漫遊大半日㗎喇!
要留意冬天積雪的話,行嘅時間會多一倍!同要買定啲暖包用!
 
城山城址展望台係必上去㗎!
 
仲有要食個飛騨牛可樂餅!個人推介喺今藤商店買~
個婆婆超好人!個牛可樂餅仲好新鮮!!!
坐係側邊對住水田同合掌屋食~嘆世界呀!
 
要留意最尾車下午5點20由白川郷走~
由白川郷合掌屋集落行返去巴士站要成15分鐘!早啲返去好啲,個度都有記念品賣!
 
第3日建議要坐嘅車係:
金沢10:50am開車-坐濃飛高速巴士→12:15pm到達白川郷
郷白川郷05:20pm開車-坐濃飛高速巴士→06:35pm到達高山
住1晩高山(建議最好住近車站嘅普通酒店,反正之後先去有(美人之湯)之稱嘅下呂温泉先住好啲!)
 
第4日(2月9日)
全日高山漫遊
 
下面係高山觀光地圖
 
朝早開始行就最好~
可以參考高山市觀光官網
個人推介位於上三之町一帶嘅中橋同高山市政記念館就一定要去~
車長夫人就去咗對面杉養蜂園買雪糕食!
 
 
行到下午4點左右就要坐火車由高山去下呂喇!
 
住1晩下呂温泉,
車長有2間酒店推介:
一間叫下呂観光ホテル本館,
車長5月去過,間酒店係山上面,個景靚到爆。
不過要去貸切温泉的話就行得遠少少,同比較暗~
 
 
另外一間就係小川屋
5月時朋友就住過呢間。個大風呂好似泳池咁大!
 
第4日建議要坐嘅車係:
高山04:32pm開車-JR特急ひだHida18號→05:15pm到達下呂温泉
 
尾班車喺09:45pm高山開車,10:48pm到下呂温泉(各站停車)
千祈唔好遲咗呢班車呀!
 
第5日(2月10日)
全日下呂温泉漫遊
 
車長推介景點:下呂大橋沿路去嘅噴泉池同下呂温泉神社!間中有煙花放㗎!
 
 
夜晩就要坐火車返落名古屋喇!
個晩最好住近名古屋站!
名古屋駅前モンブランホテルNagoya Ekimae Montblanc Hotel係車長推介!
 
 
第5日建議要坐嘅車係:
下呂04:21pm開車-坐JR特急ひだHida16號→06:02pm到達名古屋,
咁就啱啱好用晒5日Pass!
 
尾班車喺19:28pm下呂開車,21:02pm到達名古屋。 (特急ひだHida20號)
千祈唔好遲咗呢班車呀!
 
第6日(2月11日)
要由名古屋返香港喇~朝早就出去遊吓啦!
車長通常會去咗電器舗或模型舗~~
名古屋站西出口有間ビックカメラ(Bic Camera)名古屋駅西店!
玩具同電器佩件都好齊!
 
如果要坐國泰CX539的話
要下午2點05分前Check-in,時間真係差不多~去定機場都可以,中部國際機場都好多野食同買㗎!
第6日建議要坐嘅車係:
名鉄名古屋站12:50pm開車-坐名鉄特急μ-SKY30號→1:18pm到達中部国際空港(名古屋機場)、車長建議唔好遲咗呢班車!
 
要返大阪坐飛機走的話,車長建議坐近鐵直接去到近鐵大阪難波站!
相比新幹線平少少,仲直達南海難波站附近,可以再轉南海電鐵去關西國際機場喇!
名古屋去難波嘅近鐵特急要坐約2個鐘,毎個鐘有2班,車費要4260円。
而南海難波去關西國際機場嘅南海特急要坐約半個鐘,毎個鐘有2班,車費要1430円。