現實版童話世界-福岡県「糸島」

大家有無聽過「糸島」呢樣野?佢係位於福岡県福岡市,喺繁華街到乘車40分鐘左右就會到。佢係喺福岡縣嘅西北部,同大自然比較相近。「糸島」半島嘅海岸線非常靚,周圍有可以睇到日落嘅Cafe,個性派雜貨店等等,係用黎幫自己差電嘅好地方。
而最近「糸島」多左唔少又潮又靚嘅Cafe同商店,成為左福岡新嘅觀光地。因為佢比大海同山包圍著,所以環境非常靚。而且,因為環境靚,所以亦都好受女性歡迎,點解?因為可以影靚相呃like囉!下面係「糸島」嘅吸引之處,睇下睇完之後有無想去嘅感覺?
 
ヤシの木ブランコ(樹木鞦韆)
無錯啦「糸島」最特別嘅一個位就係呢個「樹木鞦韆」,係咪唔講真係會以為係外國呢?利用左呢2棵看似想倒塌嘅樹木黎做鞦韆,已經吸睛到不得了,坐埋上去影張相,IG女神仲唔係你!?而且佢最正係面向大海,fing下fing下果時一邊望住海景放空,超級歎呀!
呢個樹木鞦韆係位於一間叫「ざうお本店」嘅餐廳前面嘅沙灘,呢間餐廳係出名食新鮮魚嘅,如果岩嘅話,可以喺到食完野再出去盪鞦韆,完全係童話式嘅生活呀!
 
ロンドンバスカフェ(London Bus Cafe)
如果你喺糸島行行下,會突然見到有舊紅色野入左你眼簾,果樣就係呢個London Bus Cafe啦!佢同藍天、大海襯到出汁,好似入左本故事書到咁呀!
呢架「巴士」有意大利雪糕買,有成差唔多25種口味!而且佢仲係無添加無着色嘅,連孕婦都食得。可以喺巴士嘅第2層邊眺望出大海邊食雪糕,你唔係唔試下話?
不特止,仲有熱狗,野飲,薯條等等小食。口痕想食少少野,呢到就岩哂你啦!
 
夫婦岩
桜井二見ケ浦嘅「夫婦岩」都係特色之一。沿海向住糸島半島行就會見到。
夫婦岩由兩舊石組成,中間有條繩連住,可以喺鳥居中間望到,都係一個影相位黎嫁。
而且,佢係縣指定嘅文化財產,係桜井神社嘅社地。可以喺神聖嘅地方睇日落,如果有男女朋友嘅強烈建議要一齊黎睇下啦!
 
フォレストアドベンチャー(Forest Adventure)
唔好以為糸島只係得影相位,佢仲有野玩添嫁!喺距離糸島著名觀光地「白糸の滝」10分鐘路程就會到左個森林,裡面就係呢個Forest Adventure嘅樂園啦,周圍都係高高嘅樹木,可以玩企都企唔穩嘅「空中散步」,又真係幾過癮喎!
 
おしゃれなカフェ(Stylish Cafe)
糸島呢到有好多好潮好型嘅Cafe,好似呢間「サンフラワー」咁,白色嘅外牆超有渡假感覺。而且最正係唔少Cafe都可以望住海景咁食野。靚到連雜誌都會黎呢到取景嫁!藍天,藍海,白雲,白色餐廳,Perfect Match!