【無做等於無去過】旅遊京都・必做5件事!

京都到底有D咩魅力呢?雖然京都嘅地形係被山包圍住嘅盆地,仲要冬凍夏熱,但佢四季都有唔同自然風景展示佢嘅美麗,而且擁有住豐富嘅歷史色彩,又多世界遺産,所以有好多日本人同埋外國人嘅觀光客,學生去修學旅行,睇紅葉等等都非常大人氣!咁如果去到京都,有D咩係必做嫁呢?而家就介紹下面5樣野你知,等你去到嘅時候跟住去,咁就可以好自豪咁話比人知你去過京都啦!
 
1.必食宇治抹茶甜品
宇治其實係京都一個茶嘅名產地,而宇治嘅抹茶就特別出名,因為佢屬於高級品黎嘅。
 咁而家最受歡迎嘅當然係宇治抹茶甜品啦,而可以歎到呢D甜品嘅鋪頭喺宇治市有好多好多,隨便揀一間都非常正宗兼好食。好似刨冰,雪糕,芭菲,抹茶蛋糕等等,偏苦或偏甜嘅抹茶都有,任君選擇。所以當人地仲喺log-on食緊港式宇治抹茶雪糕果時,你就快D去京都試下正宗嘅宇治抹茶啦!
 
2.去清水寺睇靚景
清水寺係京都其中一個必去之地,一定要做嘅就係喺清水舞台望出去睇勁靚景色啦!春天睇花,夏天睇綠油油嘅草木,秋天睇紅葉,冬天睇雪景,四季都有唔同特色,而且全部都靚到dum一聲,呢個就係清水寺嘅魅力。
去開清水寺,除左必做嘅睇景之外,仲有一些同樣好有人氣嘅項目,就好似去「音羽の瀧」許願咁,大家都不妨去試下啦!
 
3.舞妓體驗
京都美人嘅代表當然係舞妓。著住華麗嘅和服,挺胸收腹走路嘅姿態就係舞妓嘅魅力。難得去到京都,唔係剩係著和服(甚至係浴衣)咁悶掛,呢D東京都著到啦,要試就梗係試下變身做舞妓啦!除左服裝,髮型仲有化妝都一手包辦,然後瘋狂喺古色古香嘅街道上,或者係studio到影靚相,化身成京美人!睇番呢D相就會即時諗番起自己去京都嘅回憶,必試啦!
 
4.一嘗傳統京料理
京料理係和食入面有特別高嘅人氣。京都產嘅蔬菜,豆腐,湯葉等煮成嘅京都料理,每碟都非常美味,食物質素高得很,可以話係舌尖上嘅享受。而且唔止好食,賣相仲好吸引,連視覺都有得享受。咁正嘅京料理得京都可以食到(正宗果隻),所以我認為就算貴少少都要試一餐半餐啦!
 
5.住在京都的ゲストハウス(Guest house)
Guest houseal即係咩呢?即係類似旅館/民宿咁嘅地方,比酒店便宜嘅房間。而京都嘅Guest house除左平,仲有佢嘅獨有魅力-歷史風情!有D Guest house係日本人嘅舊屋,有D係建築左100年以上嘅舊茶店,登録左為「有形文化財產」嘅Guest house都有。由於有好多好多唔同Guest house,大家可以揀番D符合自己要求嘅代替住酒店,因為咁樣反而更加可以感受到當地文化色彩(如果你係豪遊就當無睇過啦)!