【無人餐廳?】全自助自販機食堂

一間餐廳冇職員都營運得到?原來真係得!呢間位於群馬縣嘅「自販機食堂」入面真係一個員工都冇,要食野咩,就自己喺販賣機度㩒野食,雖然冇人招呼初初入去硬係有啲唔習慣,但諗深一層,冇職員成日企喺後面望你食完未,好似又真係自在好多。
 
 
日本80年代左右喺保齢球場等等嘅娛樂場所都好流行呢啲售賣食物嘅自動販賣機,不過隨住Family Mart、7-11等等便利店嘅出現,時時刻刻都可以買到野食,食物自販機就越嚟越少人用,仲越嚟越少見到添。
 
所以如果想感受吓以前日本用食物自販機買野食嘅懷舊感覺,可以嚟呢度走返轉,入面有3部食物自販機,麵類、三文治類同漢堡包類都食得到,味道唔差㗎!
 
 
 
 
漢堡包機上面貼咗張使用方法,因為係老爺機嘅關係,請大家都遵守返啲規則,例如只可以用¥100(千祈唔好用¥50,如果唔係部機就會停咗唔識郁)、要一個一個慢慢咁入落部機度,總之就係要對佢溫柔啲。入完錢,未揀要咩食部機就會自動找錢先,老闆話係正常嘅,千祈唔好又將個¥50塞返入機啊!
 
 
個漢堡包真係唔錯,又唔會太少醬令個包太乾,仲要成個都熱辣辣,唔講都唔知係自販機貨色!
 
 
麵類自販機有得揀拉麵或者烏冬,拉麵嘅質感有啲似浸軟咗嘅油麵,香港人的話可能會鍾意烏冬多啲。
 
 
喺機攞出嚟嗰陣要小心,碗麵都真係幾熱。𠲖?明明點咗叉燒拉麵,叉燒呢?!
 
 
原來係畀啲麵遮住咗!啲叉燒都幾正,有出面店舖嘅8成水準喎!
 
 
最後試埋呢個三文治機。三文治一共有火腿三文治同紅豆芝士三文治兩款可以揀,火腿咁普通,緊係揀個紅豆芝士三文治試吓啦~
 
 
用哂錫紙咁包住,包保加熱夠均勻!
 
 
呢個打開嗰吓真係有少少失望,啲餡得咁少嘅?!不過好彩味道夠趣怪,咸咸地又甜甜地,唔可以話唔夾,但又未到人間美食囉~
 
 
唔好以為冇店員冇人氣間舖就泠清清,好多當地人都會為咗重溫昔日嘅懷裡感覺而特登嚟,仲會帶埋小朋友一齊。雖然老闆定期都會搵人清潔,不過大家食完記得都要自己清返自己嘅垃圾啊。
 
最後再次提一提大家,3部機都比較老爺,大家買嘅時候要畀多少少耐性同溫柔啲。仲有因為店入面冇唱錢機,去之前請準備定多幾個¥100。
 
自販機食堂
地址:群馬県伊勢崎市富塚町293-3 1F
營業時間:09:30~24:00左右(詳細時間請參考官方twitter每日更新)