為日本添史上最多金牌:日本柔道團實現奇蹟

日本體操男團相隔12年再次奪金,再加上隊長內村航平衛冕男子個人全能賽,簡直就係風頭一時無兩!
 
其實除咗體操隊之外,日本柔道國家隊同樣喺今屆奧運會表現超卓,男女分別總共贏得12個獎牌,打破埋過去嘅紀錄之餘亦成為日本拎得最多獎牌嘅項目添呀!
 
▲今次日本柔道選手們出色嘅表現,男子隊監督井上康生以「一雪前恥」嚟形容。

 

4年前嘅倫敦奧運,日本柔道男子隊歷史上首次零金牌回國。柔道為日本國技,呢個結果令好多日本人感到傷心失望。當年柔道隊成員回國時連頭都冇抬,仲有人開始質疑日本柔道界嘅實力。

 

今年,日本隊喺奧運舞台上拎咗3金1銀8銅,除咗一雪倫敦奧運之恥外,大家仲見證到日本男子柔道嘅復活添!柔道有分7級,分別係體重唔同級別嘅選手(由60kg至100kg以上至無限量)。今屆日本男子柔道係第一次7級每級都拎到獎牌,真係好犀利!

 

今次攞金牌嘅選手有:
 
男子73公斤級金牌 大野將平選手

▲5場比賽中4場都以「一本勝」獲勝嘅大野選手表示:「我覺得我已經達成咗我今年嘅目標,就係要製造壓倒性嘅差距。我一定會朝著四年後嘅東京奧運繼續努力嘅。」
 
男子90公斤級金牌 美日混血兒貝克茉秋選手

▲日本選手喺90kg級別拎金牌係第一次。今年21歲嘅貝克選手就話:「可以實現由細到大嘅夢想拎到奧運金牌我真係好開心。我都會繼續朝著東京奧運努力。」

 

女子70公斤級金牌 田知本遙選手
▲今年26歲嘅田之本選手就話:「拎到金牌係我嘅夢想,夢想成真我覺得好幸福。啱啱先參加完奧運會,我未諗到去參唔參加下屆東京奧運,但我覺得可以出賽東京奧運嘅選手係好幸福嘅。」

 

最大功臣:重建柔道男子隊嘅監督 井上康生
四年前嘅陰影,令日本柔道隊決定搵嚟前悉尼奧運柔道100kg級金牌選手,現年38歲嘅井上康生。井上監督喺日本係非常受歡迎嘅柔道高手,被稱爲強者中嘅強者。當年34歲執導嘅佢一改隊中訓練方針,認為練習係重質不重量。佢認為要對應世界唔同選手嘅柔道,就必須了解對戰對手出手嘅拳路,所以仲要求選手體驗巴西柔術、蒙古相撲同沖繩角力等世界各國武術。
 
▲今次男子隊全部級別攞牌,佢激動落淚,仲話一直以來覺得最重要嘅就只有一樣嘢,就係要相信啲選手!
 
今次日本柔道嘅奇蹟,睇嚟下屆奧運日本隊喺主場將會提升至另一層次!恭喜晒各位喇!
 
題外話:話說呢班奧運選手比完賽都不忘幫手清理場地,真係抵讚嘅!