【炒賣投機經濟起飛系列】投資日本威士忌好過買股票?

近排股市受好多外圍因素影響,相信部份投資者都唔敢隨便入市,反而想追求風險回報相對穩定嘅投資。我敢講,比起股票,威士忌係一個必定唔會蝕到乜都無嘅投資。今日同大家分享一個關於投資日本威士忌嘅故事。
 
上年8月左右NIKKA旗下余市及宮城峽威士忌宣布停產年份產品,原因係原酒不足,所以主力生產比較大眾化嘅LINE如竹鶴等等。停產意味住市面上嘅酒已成為絕版,所以報導一出就令到余市基本年份產品價格抽升40-50%。一支700ml基本款式嘅「余市20年」宜家價錢仲係維持係$5000左右。
 
睇返2-3年前,「余市20年」我係日本買個陣只不過係唔洗20000日圓(折返港幣$1500樓下)。幾年間升左300%有多,試問有咩其他投資可以比得上?雖然係咁,除非你係先知,否則靠呢D基本款威士忌黎投資其實沒有太大價值。你試諗下將來余市如果恢復生產年份基本款的話,對價值一定會有影響。
 
另外大家可能都聽過「輕井澤」呢隻日本威士忌,呢個名經常出現係各大拍賣會上,原因係「輕井澤」呢個酒廠已經關閉,再無生產新嘅威士忌,呢種稱為「閉鎖蒸留所(へいさじょうりゅうしょ)」嘅酒因為已成絕版,世上餘下嘅酒一日會少過一日(飲一支少一支),所以相對價值會越來越高。
 
有幸試過呢支「輕井澤Vintage紅浪1981」,價錢5位數字走唔甩。
 
另一個牌子「羽生」都係一樣,佢套「啤牌」系列都係係拍賣會經常見到,甚至有大量銀彈嘅收藏家為左儲齊一套54支而高價收購。
 
相信唔少朋友去到日本都會買返支威士忌返屋企鎮宅。威士忌唔會過期,保存簡單方便,入場檻又豐儉由人。不過咁,並唔係求其買支日本威士忌就可以等佢「爸爸聲」咁升,一支酒保唔保值或有升值潛力基本上取決於幾個條件,想知道想收藏點揀先係最好?記住留意返Like Japan同酒友酒魅喇!
 
BTW,我開頭講話「威士忌係一個必定唔會蝕到乜都無嘅投資」其實係點解?因為就算酒嘅價值變到點都好,你還有酒啊!開左佢黎飲,享受下,咩都抵返晒啦。
 
對愛酒之人黎講酒始終都係用黎飲,用黎欣賞,炒唔炒呢d只係純粹市場供求。余市20年,我都係投資落自己個肚到,記住佢嘅味道,飲返杯先。