激安新宿迴轉壽司店 140yen3件

今日要帶大家去歌舞伎町食好西~~~唔好誤會,唔係去食囡囡,係食迴轉壽司!
 
 
離遠望向門口已經見到大大隻字寫住140yen一碟!嗯……其實依個價錢並唔算好吸引,因為有啲迴轉壽司店110yen就有一碟,依間都仲未算係最平。
 
之不過睇真啲?原來140yen係有3件壽司!(有指定menu)咁計返姐係唔洗50yen就有一件壽司,係咪好抵呢!
 
隔離位個哥哥見我係咁影相,專登擺埋post,好搞笑~~~
 
牆上面貼咗好多special menu同是日精選,不過只係得日文,冇漢字又冇圖,唔識日文可能會有少少麻煩……
 
不過普通menu係有圖又有英文,大家落單個指指住相就落到~唔洗擔心~~~
 
後面都仲有㗎,係咪好多選擇呢!
 
一坐低就飲碗「例湯」先,唔洗錢㗎~
 
睇下140yen 3貫嘅壽司有咩選擇先!首先出場嘅係火炙三文魚,側面仲連住少少皮㖭!望落去好似好油,但係食落又唔會好膩,好味~
 
跟住係魷魚鬚壽司啦~本身佢上面係有生薑不過我走咗薑,所以得返燒汁~我覺得D汁多得滯,搶咗魷魚鬚嘅味……魷魚鬚一啲都唔韌,唔錯!
 
非常鮮甜嘅鰹魚壽司都係140yen 3件!鰹魚食落有啲似吞拿魚,食完有回甘,又平又好食,必叫之選!
除咗啱啱介紹嗰幾樣之外,八爪魚同鯽魚都係140yen 有3件,唔好走寶啦~
 
除咗最平嘅140yen 3件壽司不容錯過之外,依到嘅海膽壽司亦都好抵!平時好多平價迴轉壽司店嘅海膽壽司唔係忽然貴咗一截,就係望落去成pat屎咁,唔新鮮到一個店。HiBaRi好均真,話咗全部140yen就140yen,海膽都係一樣。而且佢地嘅海膽仲塞到好滿,食落又好鮮甜,每次我都要叫2碟先夠喉!
 
三文魚子呀!好鬼大粒呀!個皮好鬼脆呀!又係140yen!我覺得唔洗吓吓都食到最最最平嘅,最重要係平得嚟好好好好食~~~
 
我好鍾意食油甘魚㗎!可惜依個季節唔係周圍都有得食……相入面依隻係同油甘魚好似嘅ハマチ(hamachi),味道同油甘魚差唔多,但價錢就比油甘魚平~未試過嘅朋友可以試下!
 
燒肉卷你食過未?未食過可以試下~幾有創意~哈哈~
 
跟住就到最令我失望嘅壽司二選……首先中獎嘅係依個「bintoro」壽司~點解我會叫依碟壽司呢?因為我係menu到見到bintoro壽司一碟係得一件,姐係佢特別矜貴啦!叫黎睇下有咩特別先!上到枱,咦點解有兩件嘅?老闆話平時bintoro係大件啲所以得一件,不過今日得返正常size所以有2件~好啦,食落口,呃,冇咩味,仲有少少筋㖭……140yen 3件嘅鰹魚壽司仲好食……
 
依件火炙拖羅都係因為啱啱個原因而叫嘅……一上枱就覺得中伏,點解會硬柴皮到依個地步?食落口,嗯都係硬柴皮……唔明點解依碟嘢平時要貴啲囉……
 
雖然有少少少少伏,但係我覺得依間壽司店非常抵食,平得嚟新鮮又多選擇,(只要大家唔好叫bintoro同火炙拖羅就得啦)~
 
回転すし屋 HiBaRi
電話:03-3209-5656
東京都新宿区歌舞伎町2-36-1 Hotel Listo 1F