[激安推介]大大舊+勁新鮮 500yen魚生飯店

今日要同大家介紹一間我一個星期食起碼兩、三次嘅魚生飯店「丼丸」~~
「丼丸」係一間魚生飯連鎖店,全日本都見到佢嘅蹤影㗎!
依到幾十種魚生飯都係500yen(計返做港紙大約3-40蚊左右),而佢平得嚟係絕對唔會比下瀾嘢你食,魚生又新鮮又大件又平,大佬你話如果喺香港嘅話去邊到搵啊~
 
 
今日嚟到依間「龍 丼丸」~入面有超過70款魚生嘅配搭同選擇,全部均一價錢,睇到人心大心細!
 
我平時多數都係揀最上面嗰行嘅雜錦魚生飯~鐘意一次過食到幾款唔同魚生嘅朋友可以特別留意下依一行!
 
 
揀好食咩之後,就好似去大快活咁,去櫃枱到落咗單再坐低~記得記得除!鞋!啊!
 
好快好快,魚生飯們就登場啦!點啊係咪好吸引先!
 
首先同大家介紹下左下個依我叫得最多嘅魚生飯うおがし丼〜(菜鳥不負責任翻譯「魚河岸丼」)
 
依個丼有齊海膽、三文魚子、吞拿魚、蔥花吞拿魚拖羅蓉同魷魚5樣嘢~
(注意:白色個d係魷魚唔係飯!!!!同埋本人食嘅蔥花吞拿魚拖羅蓉係走咗蔥花嘅~)
點解我鍾意依個飯呢,因為有海膽+三文魚子嘅組合入面,依個飯係我覺得最抵食嘅!
我知好多人都唔鍾意食吞拿魚拖羅蓉,因為覺得一pat嘢又冇味……
但係依到嘅吞拿魚拖羅蓉係非常鮮甜!送飯一流㗎~
 
 
另外依個海鮮丼都係Mika嘅誠意推介~有吞拿魚、魷魚、甜蝦、三文魚子、三文魚、鯖魚、帆立貝7樣~
雖然每樣都係少少,不過就可以食到好多種唔同種類嘅魚生~重點係,依到嘅鯖魚係非常鮮味!推~
 
 
另外店長推介嘅龍丼(個名非常霸氣!)有大頭大甜蝦+甜蝦+吞拿魚+蟹肉+三文魚子+左口魚裙邊+甜蛋~
龍丼下面依個新出嘅淹野川丼係新出嘅大碼魚生飯塞到爆炸,同樣都係500yen,真係抵到冇嘢好講……
 
 
不過,其實「丼丸」都有少少少量500yen以上嘅魚生飯嘅~
好似下圖依個贅沢大漁丼就係少數900yen魚生飯入面嘅其中一個~
師傅話依個丼有成10種魚生咁多,係全店最抵食嘅魚生飯!
同時由於依個飯魚生太多,驚大家覺得飯太少唔夠食,所以可以免費加大成「大盛り」~
 
 
60幾蚊港紙,10種魚生咁巴閉?唔叫一試嚟試下點對得住自己啊!
一嚟到,不得了!啲魚生真係好鬼滿啊!
(譖氣都要講多次,白色個啲係魷魚同左口魚裙邊唔係白飯!!!!)
 
 
隻有頭甜蝦仲長過我隻手指!
 
海膽雖然就少咗啲,不過真係好新鮮好甜~~~
 
望吓!你地擘大對眼望吓!依到嘅吞拿魚唔係甩色冇味吞拿魚,平得嚟都係非常之咁新鮮,一啲筋都冇㗎!
 
三文魚唔算係最最最肥美嘅部分,不過都好唔錯~
 
 
又肥又厚嘅鯖魚兩件~
 
老實講,平時如果我自己叫嘅話,就一定唔會叫蛋;只不過係既然都已經喺個碗入面,咁就食吓啦咁樣~
之不過,今次我食完依個真係跌眼鏡……1cm厚嘅玉子燒有好香蛋味,又唔會太甜,正!
總括嚟講,依個「贅沢大漁丼」真係very nice~如果唔係一定要食500yen魚生飯嘅話,大家一定要叫依個嚟試吓啊!
 
 
另外「丼丸」嘅雪糕都幾特別㗎!
 
右邊依款芝士+餅乾雪糕非常好食,所以成日都賣斷市~芝士味非常香濃,入面嘅餅乾食落似芝士蛋糕嘅批底,好好味~
可惜我上次去個陣冇晒芝士味食……結果我揀咗白桃味(佢講明入面有果肉㗎!)
 
見唔見到個機中間白色個舊野?個雪糕一買返嚟個陣係一舊實的的嘅雪米滋咁款,唔可以就咁食㗎!
大家要將舊雪糕放入依部機入面,跟住……
 
自己嗞出嚟!平時嗞雪糕?陣,自己控制到啲雪糕出得幾快,但係依部機啲雪糕係完全不受控制,出得勁快!!!好難嗞啊!
 
 
最後嗞成咁嘅樣……嗯,藝術!
不過我覺得白桃味入面冇咩桃肉,同芝士味真係差幾皮!!!!
如果咁啱去到有芝士味,大家一定要叫嚟試下啊!
 
差啲唔記得講,依到啲魚生飯全部都可以外賣(嘩大佬日本幾少地方有得外賣啊!)
夜晚宵夜唔想食杯麵想食好啲,你識點做啦~~~
 
由於「丼丸」分店太多不能盡錄,大家上佢個官網睇下邊間方便啦~