澀谷街訪之日本人戀愛那些事兒

 
想喺日本長住,如果唔係有返咁上下錢,又冇力能喺日本工作嘅話,就真係諗都唔洗諗!呀,唔係,如果你嫁比日本人嘅話,成件事就冇問題啦~~~不過異地戀真係談何容易咩?所以MIKA就決定喺大家洗濕個頭之前,深入日本人嘅內心世界,了解吓佢地肚入面嗰條蟲,呀姐係佢地嘅戀愛觀到底係咩嘢一回事~~~
 
問:你嘅理想型係?
答:又瘦又搞笑,總之唔係外國人就OK~不過其實我而家又唔係真係咁想拍拖,感覺好似比起搵女朋友,識多啲朋友仲開心~~~
(本身我有條問題係想問如果你有同外國人拍拖嘅打算,會唔會考慮吓同我拍拖呢?結果問都唔洗問就知道可以收皮==)
 
問:另一半做過最難以原諒嘅事係咩嘢呢?
(中間個位靚姐姐(雖然佢細過我omg))答:出軌!
話說以前佢有個好姐妹,竟然同佢男朋友搭上咗,結果到而家仲係原諒唔到佢地,無論係同個ex定係同個第三者都冇再聯絡啦~
嗚被出軌都已經夠慘㗎啦…仲要係被好姊妹,真係聞者傷心聽者流淚!
 
問:你出軌嘅定義係咩呢?
依個問題我真係想問好耐!雖知道男人同女人諗嘢都已經差咁遠,更何況係香港人同日本人!?
不過意外地,結果,原來香港人同日本人嘅諗法都好似唔係差好遠!
 
答:
交換聯絡方法X1(其實我覺得香港人交換facebook依種程度應該就冇問題嘅,但你知啦日本人幾鬼鍾意搭訕問人攞電話,如果依個時候同人交換咗嘅話就OUT啦!!!!)
單獨兩個人出去玩X3
偷偷地兩個人單獨出去玩X1
摸摸X1
錫錫X4
搞嘢X1
 
姐係話,「錫錫」以一票之微撼贏咗「單獨兩個人出去玩」,成為今次咁多受訪者入面,最多人覺得算係出軌嘅行為!
 
問:你覺唔覺得日本仔又靚仔又型仔又溫柔?
答:吓,唔係啩,點解你會覺得係咁……
MIKA:但係你唔係有個日本人男朋友咩,咁你覺得佢點呀?
答:我男朋友係幾溫柔嘅(笑)不過唔係其他日本男仔都係咁!
 
姐係話,唯一好嗰個已經名草有主!残念!
(PS.幾乎所有女受訪者都話唔覺得日本仔好正喎,唔通真係隔離飯香?)
 
問:你覺得香港嘅女仔係點㗎?
答:好細粒!
(我心諗唔係啩我都叫細粒…日本人講嘢真係信一成好啦~.~)
仲有另外一個答我:佢地成日都食中華料理!
一聽到真係笑到傻咗!好可愛嘅答案~~~
 
最後個問題完全係出於私心~~~~
問:點呀點呀如果想搵外國人做女朋友嘅話,要唔要考慮吓我先~~~(要就發達啦~)
嘩日本人真係好鬼死比面!
好似你去日本就咁講句「係」!「呀哩吉多!」佢地就會係咁話你好勁呀好勁呀!
如果講錯嘢佢地就會讚你「卡哇兒卡哇兒」
所以當我問依個問題嘅時候,大家都一齊答好,最後仲猜包剪揼決定邊個係大贏家㖭~~~
不過講到大贏家嘅話,其實點睇都一定係我先係大贏家啦~~~(比人呃都開心~)
 
結論(所有嘢都係Mika自己嘅睇法w):
其實我覺得日本人同香港人好多諗法都好似,不過佢地未必會打開心窗同你講清講楚,有時要估估吓,搞到個心仔囉囉攣~
不過同得外國人拍拖嘅日本人,多數都係鍾意外國人嘅直白同坦率,唔洗轉彎抹角~所以比啲時間佢地講出心底話,又或者多啲叫佢地有咩直接講出嚟,相信係唔會有咩大問題!
不過由於大部分日本人都唔太鍾意講英文(無論佢地係識定係唔識),所以想同日本人拍拖,最好起碼都有N3左右程度,講到日常生活嘅日文啦~跟住其他個啲日文咪等人教你囉,係咪好浪漫呢~~~~
最後,我真係覺得日本人無論男女都真係好卡哇兒好可愛,男仔女仔都咁溫柔,唔怪之咁多人想同日本人拍拖啦(雖然訪咗幾個日本妹都唔同意依個講法,但我仍然覺得佢地真係好正w)~~~
 
第一次喺日本做街訪,真係好好玩!你地有冇啲咩嘢想知嘅話記得留言話我知,等我下次又再去訪一次先!