又到食生蠔嘅季節!鍾意食生蠔的話食一兩隻又點會夠喉,但食多幾仔荷包又負荷唔到,真係好難搞。不過如果你睇緊呢篇blog,証明大家有緣,就大方啲同大家分享吓呢間位於東京嘅海產秘店有咩好料食啦!
 
 
呢間叫做「貝グリル&ワイン 東京シェルモアナ」嘅海產小店位於東京下北澤,因為付出¥200就可以食到超新鮮日本國產生蠔,所以已經有唔少識食之徒知道呢間秘店。除咗¥200一隻嘅國產生蠔,呢度仲可以玩埋「摸蜆」!點玩法?之後慢慢再講!
 
 
呢度嘅生蠔來自日本唔同地區,有北海道產、岩手縣產、佐賀縣產等等,食到邊幾款完全視乎當日老闆入咩貨,建議大家每種都試一隻先,睇吓邊款最啱自己口味。
 
 
除咗用檸檬汁調味,呢度超浮誇地準備定一小支威士忌俾你唧落去食,威士忌嘅微苦原來同生蠔都幾夾,同檸檬汁完全係兩種風味!
 
 
北海道產嘅生蠔大隻又creamy,而呢一隻佐賀縣產嘅生蠔味道就比較溫和同有咬口。
 
 
呢隻來自岩手縣嘅生蠔係3款入面最大隻嘅,蠔肉白裡透紅,帶有比較濃烈嘅海水味,如果鍾意飲酒,不妨點返杯香檳或白酒等清爽系酒精,同呢種生蠔超夾!
 
 
好似呢支「MOËT & CHANDON」,一支大概¥6,500左右,邊食生蠔邊飲香檳,人生享受咪呢啲囉!
 
 
之前講過,除咗¥200國產生蠔,呢度仲有得玩埋「摸蜆」,只要畀¥300,就可以喺個桶入面攞一次蜆,一桶大概有20隻左加,只限攞一次,攞到嗰啲就係屬於你㗎啦!
 
 
所以呢個Game嘅要訣係,拉埋你大手板嘅朋友一齊去!老闆話女仔最高記錄係7隻,大家又攞到幾隻呢?
 
 
啲蜆拎咗上嚟之外,老闆就會用錫紙將佢地逐隻包起攞去蒸,呢種做法可以令到蜆入面嘅水份冇咁容易流失。
 
 
一打開錫紙,隻隻蜆都已經打開哂等人食佢地啦!每粒蜆肉都好飽滿Juicy同彈牙,仲勁鮮味,有得玩又有得食,坊間少有!
 
不過提提大家,食蠔同食蜆只可以二揀一,想食哂兩樣就唯有嚟多次啦!
 
 
話明係海產天堂,呢度又點止得生蠔同蜆咁小兒科。呢度嘅貝類蒸都好出色,可以揀加日本酒、白酒或啤酒去蒸,最常見係用日本酒,最少見係用啤酒,同我地食開嘅蒸海鮮完全係兩回事,必試!
 
 
一鍋入面有齊扇貝、白蜆、青口,用咗牛油、花椒、生姜去調味,花椒令到個鍋嘅風味變得更清新,牛油就好成功咁將蜆嘅鮮味帶哂出嚟,食吓一隻食吓一隻,2個人的話要叫M Size先夠喉!
 
 
呢個特製蠔醬都非常不得了,蠔味好香濃,濃到好似濃縮咗好多隻蠔嘅精華喺入面咁,用嚟搽法包食真係冇得頂!
 
 
美食又點會咁快就完結,臨尾緊係要食返個飯嚟個完滿嘅結束!呢個飯完全係Risotto嘅變奏,用咗之前貝類蒸嘅湯汁去整,可想而知會有幾鮮味!除咗湯汁,老闆仲特別加咗牛奶、芝士去特製,惹味到就算個肚飽到就爆,都認唔住食返兩碗!
 
 
如果覺得個飯太膩濟,可以以拉麵取代,同樣都係用返貝類蒸嘅湯汁,只係簡單加入青口、蔥花、蒜頭同胡椒去調味。唔好睇佢好似好簡單,呢碗野好味到如果當成料理正式推出,應該都會有大把人排住隊去食!
 

 
店入面嘅座位唔多,只係容納到30個人左右,不過個人覺得呢個大小剛剛好,老闆唔會過份關注你,但又會適時睇吓佢嘅料理啱唔啱客人胃口,難怪店內有咁多返頭客!
 
貝グリル&ワイン 東京シェルモアナ
地址:東京都世田谷区北沢2-24-9 Ms下北沢 1F
電話:03-6804-7931
營業時間:星期一至五 18:00~02:00、星期六日及公眾假期 17:00~02:00
休息:不定休