淨係識磯丸水產就遜掉了!地道日本人最愛嘅海鮮居酒屋

 
好多人去東京,一講刺身就諗起築地;講寺就諗起淺草;講居酒屋就諗起磯丸水產……
之不過!其實!啱啱講嗰幾個地方有好多日本人都冇去過,係你哋(我哋)啲遊客先去㗎咋!
所以今日Mika就要帶大家去一間地道日本人最鍾意去嘅海鮮居酒屋「浜燒太郎」,快啲mark低佢啦!
 
 
嚟到經堂店依到(經堂其實同下北澤好近!去完下北澤嚟食飯啱啱好!)
一入到去,唔知點解覺得好溫馨(誤)!有電視有結他~牆上仲掛埋店主嘅波衫w係有「家嘅感覺」嘅居酒屋!
同埋因為我對依啲燈籠情有獨鍾,所以覺得好有feel哈哈!
 
浜燒太郎嘅營業時間係下晝5點到朝頭早5點,就算錯過咗尾班車都可以喺依到一直飲到天光!
另外仲有各式各樣嘅優惠,例如未讀小學嘅細路飲嘢唔洗錢啦~
非黃金時間(5至7pm)1000yen飲品放題~姐係比7x蚊就可以任飲酒、好多好多酒、好多好多種酒啊!
 
另外又有「每日優惠」~
星期一出示學生證會有學生優惠
星期二生啤200yen
星期三女仕們會有免費甜品
星期四威士忌梳打100yen
星期五就係畀500yen就可以挑戰「一隻手任你拎大蜆」(真心大)
 
冇錯就係依啲蜆啦!真係好大隻,但係好滑劣劣好難拎,最後我只係拎到5隻……
車神係咁話我好渣,照計可以拎多好多隻咁話……
好啦……起碼大家知道連最最最廢嘅菜鳥Mika都可以拎到5隻,依個世界所有人都可以拎得多過5隻咁囉……
啲蜆隻隻都好肥美多汁,好新鮮!感覺係啱啱喺個海到撈上嚟咁~
 
跟住就到依隻原隻燒帆立貝啦~依隻真係不得了地好食啊~
汁多肉厚,條邊邊好彈牙又唔會韌~中間貝柱個到唔會燒到100%熟透晒,而係啱啱好食得,所以中間芯好香軟,出面就好彈牙~
加埋少少醬油調味真係冇得輸啊!
 
Mika每次去居酒屋都會好想好想依刺生!今次就叫咗一個二人份量嘅刺生拼盤~
不得不得別講吓個海膽(sorry影個陣有一半跌咗去後面影唔到/0\)
係非常之咁新鮮好味道!平時食個啲海膽咪有時有啲水水地嘅,依到嘅海膽一啲都唔會水耶耶,連啲紋路都睇得好清楚㗎!
仲要配埋啲咸咸地嘅海草一齊食,多多甜,小小咸,perfect!!!!
 
刺身除咗上面個拼盤之外,仲有依個期間限定嘅原隻魷魚!
需然魷魚條條望落去都差唔幾,但依隻魷魚並唔係一普嘅魷魚,而係一種比較罕見嘅品種(其實魷魚品種依啲嘢我又識條毛咩)
食落好爽脆又鮮甜,如果好彩見到有得叫嘅話就記得落單試吓啦~
 
講起魷魚就一定唔可以唔提依個魷魚炒麵!相信好多人都知道去居酒屋一定要叫炒麵~就好似你去茶餐廳要飲奶茶食蛋撻一樣~
依個魷魚炒麵真係有驚喜!咁首先當然係因為佢魷魚好好食啦,軟得嚟又真係有魷魚味唔似普通個啲食橡筋咁款……
另外佢個麵少得好鬼死彈牙!唔會濕立立痴埋一pat,炒得乾身得嚟又唔會dry,加上適量嘅蛋黃醬起咗畫龍點睛之效,簡單嚟講就係一個字:正~
 
咁話明去居酒屋就緊係要飲酒啦~特別想推介嘅酒有兩種,一就係下圖依壺清酒啦~成個鐵壺上係咪好有風味呢~
個杯仲要寫住豪快……搞到Mika唔敢唔乾咗佢w
 
最後就係依個琉球之酒啦~佢得意嘅地方係將杯酒放喺個轉盤上面,大家一班人輪住轉個轉盤,轉中邊個就邊個飲~係咪好刺激好好玩呢~~~
35度之嘛~冇嘢啊~飲到啊~冇醉呀!睇段片最後個到就知我行到直線啦w
唔算甜,但係好易入口,根本就唔似有35度~(不過第二日你就知味道哈哈哈)
 
雖然浜燒太郎係連鎖店,不過由於係特許經營嘅關係,每間分店都有啲老闆自己嘅特色~
嗰晚去到見到好多客人都入嚟同店員們老友鬼鬼,仲要叫得出晒大家個名,閒話家常咁~
辛苦一日之後又有好嘢食又有好嘢玩,最重要係仲要有家嘅感覺吖嘛~
想體驗日本人放工後嘅日常,不妨過嚟睇吓,順便睇埋個網頁吖~