波子機

大家黎到日本旅行會唔會見到周街都係波子機鋪(pachinko),唔識玩但又想試下玩呢?
今次就黎到新宿歌舞伎町入面間MARUHAN同大家介紹日本波子機玩法。
首先大家無搞錯,波子機係一個身處日本灰色地帶走法律X嘅賭博,至於點樣走法律X最後會講,相信好多人都知但唔好怪我講長氣俾我同未玩過嘅人分享下。我自己幾年前都好沉迷,試過一日輸左7000HKD果日之後就無再打,入賭場輸7000HKD唔大件事,但當你發現日本梗有一間係左近,每日放工都可以去幾千蚊上落時你就會覺得恐佈。唔係阻止大家玩,只係小賭怡情,同埋根本贏唔到。

以下係教學同自己小小心得(不喜勿diu)

應該揀邊間波子機鋪
同賭場一樣,俾你贏到錢的話賭場點樣交租點樣可以做到咁大,但要增加贏嘅機會方法係有。
1,客人多嘅鋪頭(有客有錢搵嘅鋪頭先有錢派,人多時派下錢又有廣告效果,無客嘅鋪頭只可以吸錢交租交水電出糧)

2,同車站有距離嘅鋪頭(佢賣點唔係方便,係唔多唔少有錢派)
3,Event日(例如導入新機種日,或者每一間鋪都會揀一個數字,3號的話就會每個月3,13,23號都係Event日,通常會門口D poster大大隻寫明誇導人)
因為波子機鋪表明係Event都算犯法,即係咁樣其實都幾易明。
 
入到鋪頭後會見到機種多到仲難揀過車仔麵D餸,日本比較熱門都係北斗之拳,牙狼,魯邦三世等等,咁最好都係揀自己鍾意嘅漫畫起碼唔會悶先。

每一部機上方都會有一塊牌仔寫住1/xxx,意思係指抽中嘅機會係幾多分之一。
1/2x(我見過最細嘅)至1/399,要留意嘅係呢個數字唔係指399次有一次抽中,而係每一次抽都係399分之1嘅機會中。日本人會用輕同重黎表達,簡單黎講愈重的話中嘅時候回報愈高。好運時399又好,一粒波子就夠中,唔好運時你轉2000次都唔中。

例如話呢部機就係1/314.75,咁呢個「確變突入率」又係咩呢?
大部份機中獎下會進入一個「時短」狀態,意思係指唔洗點用波子而快速回轉,有機種10次25次50次75次100次等等,通常愈重嘅機次數會愈多,呢個「確變突入率」即係中獎後,有60%機會再中。

機種選擇心得(都係果句,只係增加勝率)
1,新機(如果唔識分就睇周圍poster都貼住介紹嘅機,新機你唔派錢之後邊個打)
2,盡量近通道嘅機(同上,係人都經嘅通道做廣告效果)
3,睇針(呢個係進階,因為針嘅小小角度改變已經可以影響入窿嘅次數,直接影響洗錢進度)

4,用錢試(唔識睇針嘅朋友只可以用小小錢去感覺下部機識唔識轉,值唔值得打)
5,忍手番屋企(無好機的話唔好硬上)

玩法
揀左機坐低之後,係左上方入錢,然後按一下貸玉制就會出波子,因為4yen一粒所以會每次扣500yen出125粒,用完再按一下就可以。玩法好單純,右手扭住HANDLE彈波子,波子彈入中間個窿時螢幕會數字轉(入左可以唔洗放手,大部份機種都可以儲4粒),其實果個時候你可以做嘅可係睇住螢幕嘅「演出」, 以北斗神拳為例,演出係指當你叫糊爭一個數字時,主角會同其他人BATTLE,打贏的話就等於你中晒三個字。再細微一點講嘅話,機旁燈光,字幕變色,BATTLE果時主角出嘅招,每一招打得贏對手嘅機率又唔同,「演出」愈精彩中嘅機會愈大,日本人會用個「熱」字黎形容。要正確講的話,其實波子入窿時已經決定左中唔中,呢類「熱演出」都係等你興奮下。

就好似呢張圖,拳王兩個字平時正常會係白色。換句說話黎講,貞子主題嘅話就係你撞到貞子就中(下!?),戀愛主題嘅話就係個女主角俾自己心宜嘅男仔示愛就抽中咁解。(聽到都想番屋企)

中左喇喎

有一個叫賞球口嘅地方會打開(可能有小小難睇,呢部機寫住天晴川果個位),要注意嘅係有機種會係入開波個窿下面,有機種會係最右面,如果唔留意一路扣波子都無波子出。岩岩都提到,愈重嘅機回報愈大,出嘅波子都會多D,而呢個時候螢幕大多數都係播下主題曲。

中完
當佢主題曲完左,賞球口關埋嘅時候,會進入岩岩講嘅「時短」狀態,留意番要打左邊定右邊,你可以做嘅就係再求神拜佛望佢中落去。好彩的話繼續中(我自己試過最勁連中19次),唔中的話由零再開始過。

離場
輸左嘅話,忍住眼淚用埋佢廁所洗個面,靜靜咁離場吧。

贏左的話,舊式鋪頭要叫店員拎波子去洗(計波子),而新式鋪頭因為會將波子總數存入機內,所以記住按番張卡出黎去Counter換獎品,通常都係煙酒食物生活用品,大鋪的話雪櫃都有。

波子機鋪係唔會直接換到現金
一開始提到波子機鋪走法律x,政府唔想俾你開賭業但又想抽你稅,所以同波子機業有一個沈黙的條約,意思係你鋪頭上無金錢交易就ok。

所以有呢個叫特殊景品、去到Counter時會見到有圖要時同店員指住就ok。但有一點要注意「換金率」成日變,幾年前一粒波子買入4yen賣出都係4yen,但而家係3yen前後(因地區同數量都會有唔同)。

最後笑住離開鋪頭嘅你,唔好笑到唔記得自己只係拎住一塊硬膠。

呢間黃色招牌嘅TUC,每一間波子機嘅前後左右都一定有一間,你拎住岩岩波子機鋪果塊硬膠入去,就可以換到$$$$$$$$$$。
而家旅遊區鋪頭都會有好多中文教學或者識講中文嘅STAFF,亦都好歡迎外國人入去玩唔洗怕。(因為佢地好樂意接收你地嘅付出)