沖繩時光機之旅-古琉球體驗遊

琉球的由來
原來根據歷史紀載,元朝時代台灣同沖繩列島合稱為琉球。到左明朝就將沖繩列島名為大琉球,台灣就叫做小琉球。
 
琉球村
琉球村位於沖繩恩納,一個以古琉球為主題既旅遊景點。每日會有大大少少16場有關琉球文化既表演可以觀賞,每個工作人員既衣著都會著返古琉球民族既服裝,好似一個大型 cosplay 展覽咁!
 
由於呢個景點都算出名,我去既時候都無抱住太大期望,但係呢度由工作人員,到建築風格,一花一草都做到十分神似,令我都喜出望外,投入左係呢個古琉球世界入面!
 
1,200yen 絕對唔貴!物超所值!
 
地扯:沖繩縣國頭郡恩納村山田1130
電話:098-956-1234
 
每個職員無時無刻都 cosplay 緊~
 
但係呢兩個,就唔係工作人員,佢地同我一樣都係遊客,收費既和服體驗
 
1.和服體驗:500 円-1分鐘內自由拍照  
2.和服體驗:1,000 円-專業拍照,沖洗照片一張
 
仲有一個係租全日!姐係可以著住和服行晒呢個琉球村,不過價格幾多就要自己問下喇。
呢個就係理想圖~
現實圖…就等你地影完sd 返比我先知
 
園內地圖,其實兩個鐘內行得晒,如果唔睇表演或參加體驗既話
 
三線體驗,1000yen/30分鐘,想唔想學就睇你自己喇
 
隔離亦都有得免費試玩
 
園內每個建築設計都係依照當年琉球既建築風格。
呢個女人我都唔知佢係度做乜既,但係佢都好專業係屋內行黎行去!認真入戲
 
跟住就到表演時間,呢個表演係琉球村最大型既表演(每日10:00,16:00)
呢個就係皇帝喇!
 
皇帝入場之後,就會坐係度,同我地一樣睇人表演
呢個角色都幾好做喎~
 
之後就到獅子出場,呢隻獅子其實係沖繩度度都見到佢!
獅子像又稱為Shisa,其實就係沖繩既守護神。開口既係男,合口既係女。
好耐以前,沖繩既居民為左抵禦颱風侵襲,除左做好加固之外,仲用放一對獅子像,放係門口,屋頂,牆身等等
佢地覺得會有辟邪作用,求一個心靈庇護。
 
而表演緊呢隻獅子,仲會周圍食人,被食到既人當然會帶黎好運啦~
最後所有表演者都會同觀眾一齊跳舞~非常開心
 
隔離個池塘有一部自動販賣機,唔係賣野飲,唔係賣雪糕
而係賣魚糧!我就買左一包黎試下
 
發現啲魚係餓到…就黎想跳埋上黎食我!(其實都幾恐怖)
 
村裡面既最後一站就係陶瓷館
 
可以係度學整陶瓷
 
或者直接買走~
 
門票係一日門票任出任入!入完一個圈唔夠可以再行一圈
琉球村既一日遊就係跳舞音樂既歡樂氣氛底下結束喇~