池袋猛鬼酒店賽後報告!外加少年Jump樂園分享!

早兩日見到 新東方不敗 親身遊歷池袋猛鬼酒店(詳情可以睇 呢度 同 呢度 ),仲講到前身係甲級戰犯既「巢鴨刑務所」,而酒店就起到好似一個墓碑壓住啲鬼...
 
睇完真係當堂嚇一跳,呢間王子酒店我住過,我真係住過!
原來小編上年去東京就係住緊佢講緊嘅呢間「猛鬼酒店」,咁我回憶返上年嘅賽後報告俾大家啦。
 
新東方不敗就話如果住14樓以下會影啲撞鬼,小編上年就住10樓...
(張相上網搵的,當於當時冇影相,但個格局係一樣)
首先講下間房先,房size就細細地,放埋喼就冇咩位行,不過一般應有嘅設施都有齊,係殘咗啲囉!
不過最大問題係個冷氣,唔知點解扭到最大都係好熱,搞到成間房好焗促下...
 
咁講返重點,有冇鬼呢?
相信間房咁熱,鬼都覺得唔係好舒服所以冇出嚟,不過同行有一位住同層嘅朋友就話...
 
佢自己一個住一間房,本身已經訓咗覺,但訓訓下嗰陣,聽到有敲門聲喎...
因為佢嗰陣攰得濟,所以冇去開門,咁敲咗陣就冇繼續敲,佢都繼續訓。
事後佢問我地幾個朋友夜晚有冇去佢房搵過佢,
咁就梗係冇啦,去旅行行左咗成日已經夠攰,仲邊會搵佢,
咁至於佢係咪瀨嘢,就真係唔知喇...
 
另外,間酒店做唔少旅行團生意,所以預咗撞口撞面都會係強國人...
好喇酒店就講完,亦都好似李力持一樣體驗唔到啲咩靈異嘢,咁順便講埋酒店附近其中一個景點啦。
 
間酒店就位於池袋Sunshine city,有商場有嘢買就唔講啦,咁如果係動漫愛好者,必去J-WORLD TOKYO!
(以下相片及經歷係上年去嘅,依家應該更新咗唔少event,大家可以去官網參考下)
佢查實係一個少年Jump主題樂園,唔知咩係少年JUMP?咁龍珠、One Piece同狐忍點都有聽過卦?
主題樂園門口不時仲有悟空、路飛或者嗚門行黎行去同人影相!
影嗰陣佢真係會擺晒pose!你可以叫悟空同你合體變身咁影相!我去個日咁啱就有嗚門喺度~
 
一入去有唔同人物同你打招呼!(不過我接受唔到比達咁可愛做v字手勢...)
 
入面有唔同遊戲玩,當日我就參加左每日特別event「天下第一武術大會」!
原來係同人猜包剪揼!每人都要戴住撤亞人頭帶去玩~
好好彩咁贏咗幾round,去到final,最尾輸咗俾一個帶仔仔嚟玩嘅太太...佢嘅戰鬥數值真係去到百九幾萬...
小編只能屈居第二,拎唔到證書...好可惜。
 
另外小編仲玩咗個「搵龍珠」遊戲,拎住個龍珠雷達,成功玩到唔同小遊戲就可以收集龍珠,最尾嗌神龍出嚟!
不過我搵唔齊,大嗌完隻神龍好快走咗,頂佢...
 
入面仲有唔少JUMP漫畫主題嘅小遊戲玩,當然要另外俾錢啦 (話時話,富奸畫返hunter未?)
 
主題樂園入面仲有好多漫畫經典場面影相位同Cafe(啲嘢食好靚!你睇下菲利...),係度唔劇透太多,費事大家去到冇晒新鮮感!
 
裡面仲有Jump store,認真,毒L一定會跌錢...
 
樂園資料
地址:東京都豐島區東池袋3-1-3 太陽城WORLD IMPORT MART大廈3樓
入場費資料:
依家仲有night pass抵玩啲,詳情可以去呢度睇下!
 
其實池袋真係幾好住,周圍又有景點,買玩具買書夾公仔都有!晚晚都同朋友玩到11點左右先返so called嘅猛鬼酒店。
你地住過又有冇瀨嘢?有嘅記得分享下