【求姻緣】無男/女朋友嘅請進-恋木神社

「好想拍拖呀!」「好想有人錫呀!」「好想遇到Mr.Right呀!」如果你成日都咁諗,呢個四圍滿滿都係愛心嘅「恋木神社」就一定岩你去啦♡
 
 
「恋木神社」位於福岡県筑後市水田,係全國唯一一個奉獻戀愛之神「恋命(こいのみこと)」嘅神社。喺日本有好多來自全國唔同都道府縣嘅人都會為左求一段美好嘅姻緣而到訪的啊!而且,神社裡面最特別嘅,係周圍都會見到好多心心,真係望到都覺得好有愛!
 
喺恋木神社入面嘅鳥居,門口有個大大嘅心型!仔細睇,兩邊仲有細細粒心心添。聽聞鳥居總共有10個心心,去到嘅話即管去數下啦!
 
通去恋木鳥居嘅通道叫做「恋参道」,喺地下有好多個唔同顏色嘅心型,唔洗講都知呢到一定係一個影相呃like嘅位置啦!
 
另外,有棵樹齡600年嘅樹木,叫做「幸福の一位の木」。而喺佢正前方就有一個心型嘅花壇!如果係春天去嘅話,就可以見到一個粉紅色嘅超靚花壇啦。聽講,如果你圍全呢棵「幸福の一位の木」向左→右→左行的話,幸福就會降臨嫁啦!理得佢靈唔靈,做左無蝕呀!
 
喺恋木神社呢到,無論係神簽,繪馬匾定係護身符都係可愛嘅心型黎,真係盲嘅都知係黎求姻緣。
 
恋木神社除左係神社之外,仲可以比人用黎做結婚式嫁!不過只限新郎同新娘兩人,唔可以有其他人(唔知點解)。喺供奉戀愛之神嘅神社到舉行儀式,一定可以永遠都咁幸福啫
 
喺恋木神社,間中就會有唔少用黎供奉戀愛嘅儀式舉行,就好似下面呢個時間表咁。「恋むすび祭」係喺一個粉紅色嘅長條紙到寫上願望然後奉仕嘅日子,但如果撞唔岩7月去日本嘅話都唔洗擔心,因為每個月都有縁日,同樣可以供奉嫁,所以只要喺指定縁日到訪就可以了。
 
 供奉戀愛儀式
◇ 良縁成就祭:3月3日、11月3日 
◇ 恋むすび祭:7月7日  
◇ 縁日(毎月):1日、5日、15日、25日
 
覺得點呢?如果你等左好耐,都未遇到心儀嘅佢,又或者遇到好多次,但無次成功嘅人士,我就強烈建議你去恋木神社一趟啦!拈下D戀愛嘅運氣丫嘛!
 
■ 基本資料
・名稱: 恋木神社
・住所: 福岡県筑後市水田62番地の1
・前往方法:在JR「羽犬塚駅」乘車5分鍾/歩行20分鍾