【機迷必到】又食又玩・新宿Capcom Bar

 
之前同大家介紹過位於琦玉縣嘅Capcom Cafe,雖然佢嘅Biohazard主題已經完咗,不過粉絲們唔駛傷心。因為係新宿歌舞技町其實仲有一間長期做緊Biohazard同其他唔同遊戲主題嘅餐廳。
 
▼就係呢間Capcom Bar啦。單睇海報,你見到幾多個遊戲角色哩?
 
 
▼唔駛驚走錯,Capcom Bar就係呢度入面。
 
 
▼「Capcom Bar」係由Capcom同大型餐飲及卡拉OK集團PASERA合作搞嘅主題餐廳同酒吧!固有主題包括芒享(Monster Hunter)、生化危機(Biohazard)、戰國Basara、惡魔獵人、大神、龍族教義、逆轉裁判、Devil May Cry同街霸(Street Fighter)。
 
 
▼周圍都擺放住不同嘅遊戲模型同相關產品。
 
 
▼過往推出過唔同系列嘅杯墊。
 
 
▼有我當年專用黎打喪屍嘅散彈槍 
 
 
▼仲有扁晒咀嘅軍佬同潛伏緊嘅春麗 
 
 
▼話明係Bar,梗係唔少得Bar枱位置。
 
 
▼另一邊就係普通用餐區。
 
 
▼行近少少睇,原來呢度除咗食野之外,仲有PS4任玩。不過我去當日就只有Basara同街霸選擇。
 
 
▼餐廳除咗固有Menu之外,仲會不定期推出期間限定Menu。我去個陣就做緊「Biohazard20週年」主題,每叫一杯相關飲品仲可以得到一個限定杯墊添。
 
 
▼有啲餐點仲有特別驚喜㗎。因為佢地嘅員工會因應你點嘅菜式去演出相關對白。好似我點咗杯T病毒特飲,佢就會拎劍扮槍打喪屍。(另外仲有真田幸村特飲,點表演法可以睇番影片)不過唔係全部野食都有表演,所以你好想睇嘅話,記住問清楚先。
 
 
▼主餐我就叫左呢個「逆轉裁判」嘅炸盤。佢有洋蔥圈同埋一個扮槌仔嘅薯餅,不過注意,唔好拎起佢黎大叫「Objection」,會爛㗎  炸盤附送三款醬料,包括蕃茄醬,咖哩肉醬同埋芝士醬。個人推介咖哩肉醬同芝士醬。
 
 
▼洋蔥圈炸得香脆,所有野都恰如其份,就連一塊小小嘅紫菜都整得好有心機㗎。
 
 
▼食完正餐就到甜品喇。佢就係我嘅童年天敵,Biohazard入面嘅「獵殺者」。外面扮腦漿嘅係粟子蓉,入面就係海棉蛋糕同藍莓果醬。而出面血淋淋嘅就係士多啤梨果醬。員工會俾刀你將佢親手擊殺。整個蛋糕甜度適中,層次分明,令人喜出望外。
 
 
▼飲品方面我就叫咗「真田幸村特飲」。除咗招牌紅色,一見到佢個兩枝飲管就梗係諗起佢嘅雙槍啦。雖然佢含有酒精成份,不過濃度唔算好高,甜甜地適合少飲酒嘅人仕。
 
 
▼之後就到呢杯「試管T病毒特飲」,唔好見佢細細枝咁,其實內含Tequila、Ginger Ale同埋柚子汁,酒精濃度都幾高。佢地仲話要一啖飲晒佢,如果真係覺得好濃頂唔順就可以飲杯入面嘅水中和下。
 
 
▼無飲開酒嘅我,叫呢杯野飲嘅原因其實係為咗得到佢嘅限定杯墊。本身一杯野飲只可以跟一個,但係佢地好好人送晒成套俾我,我真係開心到叫出嚟 
 
 
 
後記:餐廳俾人感覺好歡樂,員工全部都好有表演慾,加上食物質素有水準,令到成件事好完美。食飽都記住打埋舖機先好走,如果你夠膽,仲可以搵隔離嘅人挑機。話唔定可以識到一班「好機友」添。詳細嘅訂枱方法可以參考番我之前嘅Blog
 
 
【‪Capcom Bar‬】
 
營業時間:
星期一至五                      
中午時段       14:00~18:00
晚上時段一   19:00~21:00
晚上時段二    21:30~23:30
 
星期六日及公眾假期
A 11:30~13:30
B 14:00~16:00
C 16:30~18:30
D 19:00~21:00
E 21:30~23:30
      
地址:新宿区歌舞伎町1-3-16 パセラリゾーツ新宿本店1F
電話:0120-706-732
 
 
 
「送禮物時間」
 
雖然好唔捨得,但係我都決定割愛將成套「Biohazard20週年限定杯墊」送晒俾你地當係多謝你地睇我嘅文喇  最緊要大家開心,快啲玩遊戲拎走佢珍藏喇!
 
 
1. 讚好LikeJapan Facebook
2. 註冊成為LikeJapan網站會員
3.瀏覽此博客文章時,點選左方的「分享博客文章」以獲得分享連結
4. 會員可透過各大社交平台及討論區分享連結網址,LikeJapan會統計每條連結的點擊次數,會員也可於博客頁面左方查閱點擊排行榜。
5. 截止時間內的分享連結點擊次數愈多,獲獎機會愈大。如有會員的分享點擊數目相同,將根據系統紀錄最快達到該點擊次數的參加者得獎。
詳細玩法亦可參考此頁
*如有任何爭議,LikeJapan將保留最終決定權。
 
 
 
 
遊戲截止日期: 
2016年7月18日