【極寒體驗】入住寒冰村零下6度的冰之旅館

有冇想像過如果冬天去北海道,喺冰天雪地之下入住埋室內只有零下6度嘅酒店會係點?喺咁低嘅溫度吓過返晚竟然唔會變雪條,仲可以有前所未有嘅溫泉體驗,同埋欣賞到畢生難忘嘅迷人雪景添!
 
 
呢個冰之旅館嘅外型似足愛斯基摩人嘅冰屋,呈半圓形,位於北海道Hoshino Resort Tomamu嘅Ice Village入面,成個旅館都係由一舊冰雕成,仲係要喺零下14度之下連續3日先雕到出嚟,所以話嚟到北海道又點可以唔嚟朝聖吓呢!
 
 
其實呢個冰之旅館每一年都有,不過今年就更加特別,加設咗個露天風呂。呢個露天風呂參觀係免費嘅,不過要浸就住客限定,即係話唔係冰之旅館嘅住客就有得睇冇得浸,好殘忍啊......一坐入風呂嗰刻,視線同冰面形成同一水平,加埋天上繁星閃閃,個景靚到真係好似去咗第二個世界一樣!
 
 
浸完風呂行返去個冰之旅館睇睇,原來真係唔係得個殼,入面竟然有用冰雕成嘅枱、梳化同床,真係所有野都用冰整成㗎!
 
 
咁凍,係咪擔心會冇覺好瞓?放心,旅館方面已經準備定勁保暖睡袋,仲會有酒同熱咖啡畀你暖胃兼暖手,所以其實喺零下6度過返晚真係冇想像中凍得咁緊要。
 
氷のホテル
地點:北海道勇払郡 占冠村中トマム Hoshino Resort Tomamu Ice Village內
可入住期間:2017年1月14日~2月28日
入住時間:23:00~08:00;冰之露天風呂參觀時間 17:00~22:00
費用:¥20,000/人
備註:需於7日前於網上預約,每日只限一組