梗有一間喺左近 精選日本愛情運熱點!! (1)

相信好多讀者平時唔多唔少都會去測下情愛運呀,玩下占卜咁。無非都係想係姻緣上能夠更進一步。不過,次次淨係做預測好唔進取啫,與其下下等運到,不如自己走去開運好過。
 
 
日本人其實都好信風水命理,佢地認為日本有好多稱為「能量點」嘅地方……即係一啲積聚自然界力量,「氣」特別高嘅地方(唔明就當結界算,反正就嚟出街跌錢都關結界事)。其中傳說有好多「能量點」,對戀愛成非常有效!
 
「梗有一間喺左近! 精選日本愛情運熱點!! (1)」今次就送上第一個「無責任精選日本催谷愛情運熱點」,位於崎玉川越嘅冰川神社!
 
 
今次要介紹嘅位於東京近郊嘅冰川神社,作為「戀愛神社」唔單止超級有名,而且祈福求緣形式重更加係千變萬化,真係咩都有! 
 
 
首先要介紹嘅係夏季限定嘅「祈福風鈴祭」,呢個由2015年開始舉辦嘅祭典,每年夏天都會以2000顆手工哨子玻璃風鈴,裝飾整個冰川神社。據說呢啲風鈴守有賜予緣分嘅作用啊。
 
除此以外,來客重可以將願望寫喺祈願札綁到風鈴上許願啊。其實淨係睇住個風鈴陣,聽住個陣清翠嘅聲音,都已經夠青春浪漫啦。
 
 
御守款式隨時多過大型電器舖入面啲手機殼,可對應各種需求。而櫻花造型良緣祈願御守更加係冰川神社限定啊。
 
 
 
繪馬也有各種不同版本。
 
 
 
釣魚御守? 日本就真係得呢度有。用釣竿釣魚,入面全部都藏有神明嘅祝福。留意追求戀愛嘅朋友,要選擇粉紅色和白色嘅「あい鯛みくじ」(「あい鯛」就係食「会いたい」(想見面)嘅字)啊。
 
 
正所謂早起的蟲兒被鳥吃早起的鳥兒有蟲吃。話說越冰川神社嘅巫女會將小石收集,用麻網包好,再由神職朝早加持成「緣結石」(即係姻緣石啦)。據說對結緣頗有功效,甚至已經到咗日本求姻緣嘅頂點。而「緣結石」係會每朝8點於神社免費派發,名額20個。聽聞試過要6點去先攞到,想要就要辛苦啲啦。
 
 
除咗加強自身嘅戀愛正能量之外,送走負能量都好緊要喎。神社內有由御神水形成的除穢之川,於穢之川遊客可以將厄運同負能量傳到紙公仔上,再經水流送走啊。
 
 
■川越冰川神社
・地點:埼玉縣川越市宮下町2-11-3
・前往方法:由川越站坐「埼玉医大行き」等巴士、於宮下町落車
・電話號碼:049-224-0589
 

 
 
圖片來源:
じゃらんnet
Find Travel
縁むすび風鈴ー川越氷川神社【特設サイト】 http://www.hikawa-fuurin.jp/