【東京駅】最強人氣手信Top10!

話時話,去東京旅行嘅人我保守估計,8成都會去東京駅一番街喪買野嘅,因為果到絕對係買手信同買野嘅好地方!你知啦,去親旅行,身邊總有一堆人會R手信,明明平時都唔熟,一聽到你去旅行都一定會仆過黎要手信嘅。咁善良嘅你地一定唔知點樣拒絕,唯有買D野食應酬下佢地啦!而家我話你知,以後唔洗周圍去搵手信,因為你只要去東京駅呢到,就己經可以買齊所有人嘅手信啦!
 
以下係東京駅買到,最有人氣嘅10種手信,快D參考下黎送比人,咁就唔洗自己諗爆頭啦!
 
10.【Gransta】Pierre Marcolini 「東京駅限定餅乾」
Pierre Marcolini係比利時超出名嘅朱古力店。而呢到就有東京駅限定嘅朱古力夾心餅乾賣啦!餅乾好脆,而且比利時製嘅朱古力味道果然唔同D,會令你想食完一塊又一塊!佢仲有好濃嘅朱古力香味,亦都頗大塊,4個一set有個望落幾高級嘅盒,雖然唔係話好平,但就可以送比你熟D嘅人啦。
 
價錢:4個/2484円
 
9.【Gift Garden】東京カンパネラの「東京カンパネラ・ショコラ」
呢個朱古力餅乾(無錯都係朱古力餅乾 )係東京好有名嘅手信黎。佢係用三層朱古力同餅乾製成,而推介嘅係白朱古力版本。佢包裝嘅藍綠色望落非常sharp,做手信完全唔會失禮。而佢可以keep大約60日,都唔會話大快過期嫁!
左邊係白朱古力版,右邊係普通朱古力版。
 
價錢:5個/618円(税込),10個/1080円(税込)
 
8.【京葉スト口リート】御門屋の「揚まんじゅう」
佢係炸小饅頭黎。(唔係香港果種,有D難形容所以睇相比較好)呢個牌子係喺目黑有專門店嘅。有分豆沙餡同芝麻兩種。而豆沙餡係呢間專門店嘅招牌黎,配住緑茶食會有一種和菓子嘅感覺,不妨試下呀!另外雪凍佢食嘅話係有另一番風味嫁!無論小朋友定大朋友都岩食,而佢只係可以keep到10日,所以買完就要趁早食哂佢啦!
 
價錢:5個/500円(税別)
 
7.【八重洲南口】東京ばな奈の「東京ばな奈がぉーキャラメル味」
呢個我諗都唔多洗介紹,因為佢出名到即使未去過日本嘅朋友都有可能收過呢個做手信。佢最特別係咩?我個人就唔覺得話特別好食,但不定時轉下條蕉嘅花紋(如花花,豹紋,斑文紋)個賣相又真係幾可愛嘅。
 
價錢:4個/515円(税込), 8個/1080円(税込)
 
6.【TOKYO Me+】新橋玉木屋の「白佃煮」
呢個手信用黎送比鍾意飲酒嘅朋友就最好不過啦!佢係一D咸味海味,用黎送酒一流,除左送酒,用黎撈飯都可以嫁!就好似果D紫菜碎咁撈喺面,已經好好食嫁啦!
 
價錢:1袋788円 
 
5.【グランスタ】カンロの「グミッツェル」
呢個我諗唔到點樣形容佢,只可以話類似糖咁。佢外層係薄薄地又脆嘅面,入面就係軟糖,有好多唔同味,例如提子,青蘋果,梳打,可樂等等。係東京駅限定嫁!由於佢個外型好colorful又好可愛,我諗就比較適合送比小朋友或者女仔,男仔就唔多建議啦,通常都唔會特別鐘意。
 
價錢:1個130円(税込)/6個set780円(税込)
 
4.【セントラルストリート】帝国ホテルの「東京駅限定チョコレート」
佢係帝國酒店裡面嘅人氣牌子,而講起帝國酒店最好食嘅手信,就一定係朱古力。所以當中最推介嘅就係相中包裝上有東京駅丸の内駅舎嘅朱古力啦!呢個都係東京駅限定黎,有3種味嘅棒狀朱古力。
 
價錢:10條1,260円/15本條2,000円
 
3.【八重洲南口】シュガーバターの木 「シュガーバターサンドの木」
佢係個名叫「Sugar butter的木」嘅菓子,佢外面係燒焦左DD嘅牛油,入面就係白朱古力,諗落應該都幾甜,岩哂鍾意食甜野嘅朋友。佢可以放大約一個月,都OK嫁!
 
價錢:5個349円/14個り1029円(税込)
 
2.【グランスタ】甘楽の「豆大福」
「銀座甘楽」係銀座好出名嘅大福店,而家可以喺東京駅買到啦!最愛歡迎嘅當然係紅豆大福,一粒一粒嘅口感非常好,而且唔會太甜,個個都岩食。不過好可惜,買完一定要喺即日食,變相唔可以買好多番去啦,只能走果日先買。都好多人係番屋企途中買黎食,
 
 價錢:1個200円(税別)
 
1.【グランスタ】錦豊琳の「かりんとう」
由開店到而家都有不動嘅人氣,佢就係日本橋錦豊琳嘅油炸點心。最大人氣嫁呢,就係圖中嘅「きんぴらごぼう 」,有7種口味,咬落卜卜脆又唔會太硬,用黎當點心或者睇戲時咬下就最岩啦!而最多人鍾意嘅口味就係炒麵味(下?),抹茶朱古力味同柚子胡椒味,非常獨特呀!可以買D番去一家人試下。
 
價錢:340円(税込)