【東京都,唔似膠囊酒店嘅豪華版膠囊酒店】

嗱除非你好有錢,如果唔係喺今時今日去旅行嘅話一定係平住嘅!
咁除左airbnb,去日本仲可以點樣平住?
醒目就諗到啦!咪就係住「膠囊酒店」囉!
 
唔好諗住膠囊酒店就一定係逼到轉個身都辛苦果種,
因為日本有唔少「豪華版」膠囊酒店嫁!
就等我打救下你個荷包,
 睇下東京邊到有D又平又靚嘅膠囊酒店啦!
 
1.First Cabin(ファーストキャビン)
First Cabin呢個概念係諗住飛機嘅first class而成嘅,追求舒適同機能。
裡面有兩種房比你揀,一個就係4.4平方米嘅「First class」,另一個就係2.5平方米嘅「Business class」。
而且,佢唔係剩係得張床嫁,仲有即棄拖鞋,毛巾等等基本設施都有嫁!
仲有仲有!!個廁所連洗面奶,卸妝水,爽膚水乳液都有提供比客人!太誇張了吧!
呢間膠囊酒店目前有3間,分別係秋葉原,羽田機場terminal1同埋築地,有興趣嘅朋友就唔好錯過啦!
 
2.ブンカ ホステル東京(bunka hostel Tokyo)
ブンカ ホステル東京位於淺草,離田原町站/淺草站只需步行5分鍾。
呢間膠囊酒店嘅設計行簡約風,主要用左大地色,望落乾淨脷落。
佢總共有4種房間,一個人旅行又好一家4口旅行都岩住,
而因為用左簡約design,所以比人一種番去好似番到屋企嘅感覺咁呀!
 
3.新宿區役所前カプセルホテル
新宿東口步行5分鐘即到,喺新宿區役所前嘅膠囊酒店。
因為佢只要通過一條地下街就會到,所以就算係落雨天都可以唔洗擔遮都番到去!呢間膠囊酒店喺2012年12月裝修完重開,所有房都有免費Wifi!!!而喺4樓有一個大休息室,夜晚果時可以用黎做餐廳,買宵夜食唔洗怕要坐喺張床到食啦!
 
4.り.ラックスパ新宿
呢間犀利咯!主要係吸引女性客戶嘅,因為佢有非常充實嘅女性專用spa設備,按摩浴缸,露天風呂都有,連洗頭水同護髮素都有4種人氣品牌你揀,會唔會太正呀?!唔單止,由於係人都知女人熱愛美容,所以呢間膠囊酒店就好貼心咁,連床墊都用左日本牌子「エアー」(air)。話比你知雖然佢係膠囊酒店,但唔等於唔重視睡眠質素嫁!
 
5.豪華カプセルホテル安心お宿 新宿
原來有3間都係喺新宿區哈哈。
不過頭先講過有女性專用嘅,男士唔好喊,因為而家呢間就係男士專用嫁啦!呢間膠囊酒店係新宿南口行1分鐘就到,係1分鐘!!即係基本上係隔離咋,方便到dumdum聲!
佢主要行型格同先進路線,迎合男士口味。而佢有個大浴場,當中用左40種以上天然礦物質,比客人增進健康,而且24小時都可以去浸,唔怕夜番無得浸。另外仲有按摩椅,飲品零食,味噌湯免費提供,好抵呀好抵呀!
 
睇完有無心思思想下次去住下膠囊酒店呢!如果有嘅,你就絕對要試下我介紹嘅呢幾間啦!