東京迪士尼,「避免同人逼」攻略!

相信東京迪士尼都係香港人去日本會安排一日去嘅行程之一,聽講佢嘅回頭率(客人來多過一次)係有成200%,所以無論係遊客定本地人都咁鍾意去。對於呢D咁熱門嘅景點,人多就一定無得避免嫁啦!
 
但覺唔覺得去親都好多人,排乜都差唔多要排一個鐘甚至再耐D先玩到,實在好哂時間好煩?而家日本人就講左幾個可以避開呢D超繁忙時段嘅方法啦!睇完包你有賺無蝕呀!
 
1.一月
由於一月係日本嘅考試季,大學生,高中生都係呢段時間考試,所以通常都會明顯少左人流。喺成人式(1月第2個星期1)後至1月下旬呢段時間都係推介嘅!要注意嘅係2月之後就踏入畢業旅行嘅時段,所以就會多番人嫁啦。
2.星期二、三、四
咁一般黎講,星期六日係打工仔同學生嘅假期,所以一定多人。而因為有唔少人係從其他縣過去,所以佢地會請星期一/五當係連假咁玩,所以都會相對地多人。因此,剩番嘅就係星期二、三、四啦!如無意外,呢三日平日都好少機會會逼,就到時間呢3日去嘅話,你就可以慢慢玩哂你想玩嘅野啦!
 
3.Event與Event之間嘅日子
迪士尼通常會喺一年裡面舉行幾樣唔同嘅event,除非你好想去果啲event,如果唔係只要你避開event舉行嘅日子,揀喺兩個event之間嘅「空窗期」去,就會少好多人嫁啦!所以你可以喺去之前上網睇定幾時會有咩event,再安排下點樣唔好擲中會爆多人嘅日子啦!
 
4.新設施開放的前一日
通常如果迪士尼有新設施開放(或者任何新嘅項目),都會喺唔同廣告到有宣傳,而D人9成都會等到佢開嘅時候先去。如果你自問之後仲有機會黎,又或者唔係對呢D新野特別有興趣,就可以選擇喺新項目開放嘅前一日黎,因為真係會好!少!人!呢個絕對係大招黎,之前有新野開嘅前夕都無乜人嫁!
 
5.天黑後玩Adventure Land
唔知點解,有好多人都會覺得玩飛越太空山等等呢類機動遊戲係要陽光普照嘅時候先玩得,所以Adventure Land主要係朝早到下午嘅時段會好受歡迎,之後到日落就會慢慢好少人去。所以就記得喺天黑或之後嘅時間先去玩,之前就玩住其他地方先啦!
 
6.官網check定等候時間
而家喺東京迪士尼嘅官網就可以check到唔同遊戲嘅實際等候時間,如果唔想老遠行到過去先發覺原來想玩果樣野要排成2個鐘先到呢D慘況發生嘅話,就記得check定要排幾耐,之後再決定拎fastpass定點好,唔好哂時間喺行冤枉路上面呀。
 
7.買紀念品最佳時間:早上~中午
係咪覺得要喺早上~中午期間行鋪頭買野嘅感覺好奇怪呢?的確,個個都習慣一去到就玩到夜晚,臨走先會買紀念品,但亦都因為咁,所以朝早到中午嘅機動遊戲一定排長龍,而夜晚嘅商店都係逼爆人。但只要你調一調轉同人地相反,就可以鬆動D唔洗下下都排到成隻狗咁啦!買野可以慢慢揀,無人同你爭,夜晚個個去哂鋪頭你就可以唔洗排好耐就玩到,抵丫!
 
8.「逆時針」玩法
迪士尼有幾樣特別受歡迎嘅遊戲,而佢地通常都會喺樂園嘅左手邊,因為遊客一入園內果時就會係好自然咁順時針行,所以一去就會去左邊先。聰明嘅你應該諗到,即係話只要你逆時針咁行,就可以避開人群啦!當人地個個排緊玩左邊嘅遊戲,你就快快手玩左右邊果D先,當D人玩完左邊到右邊,你就玩番左邊,咁就會相對地舒服D啦!
 
9.決定遊戲的優先度
相信每個人都會有覺得一定要玩嘅遊戲,如果唔想排到傻左,你有2個方法,一係早D去到迪士尼等佢開嘅時候狗衝入去玩左先;一係去到就即刻拎左fastpass先。所以你要做嘅就係冷靜諗一諗自己邊D係一定要玩,然後再分配好時間邊樣即刻玩邊樣拎fp。
 
10.參考非公式混雑Calendar
雖然唔係個個都知,但其實網上有個叫做「非公式混雑Calendar」嘅野,係用黎預測迪士尼嘅多人程度。(http://www15.plala.or.jp/gcap/disney/)大家可以喺呢到睇到邊日預計會唔多人同好多人,等自己有個大概嘅觀念邊日可以去邊日唔好去,幾方便嫁!
就好似呢到咁,睇番果日係咩色再對番個表係屬於少人定多人。