[東京近郊。江之島}一望無際的海洋,夏天與海的最佳代表

 
今日又係我HELENA同大家介紹地方啦~因為JOY正努力咁係側邊剪緊片,對拍片零認知嘅我只好用文字去表示我嘅支持:_: 正值海之日前夕,日本人好多都會係呢幾日假期去海灘玩﹐而滿佈海水浴場同環海嘅江之島就係其中一個最佳選擇啦!其實筆者係幾年前都曾經去過一次江之島,當時帶病在身再加上十二點幾烈日當空,江之島俾我印象就係無窮無盡樓梯地獄,行到我差啲暈低,所以都算係一個唔係幾好嘅經驗。因此,今次決定幫江之島呢個印象大洗底!
 
去江之島交通有好多種,而筆者比較推薦小田急嘅江之島。鐮倉周遊卷。佢除左包括由新宿去江之島既來回之外,仲可以一日任搭江之電同小田急線(藤澤站~片瀨江之島站),價錢只係1470YEN!對比係其他交通方式絕對係平一大截,而且如果腳程快嘅大家仲可以係同日到訪埋鐮倉其他景點,所以強力推薦~但大家請緊記~新宿出發嘅小田急多數只係去到藤澤站,要再轉區間車先可以去到片瀨江之島站嫁。
 
片瀨江之島站設計好有中國特色,而佢一對出就係弁天橋,行完弁天橋再轉右落隧道沿住一直向前走過多一條大橋就到江之島嫁啦。
 
由於係星期日再加上三日連假期關係,到達江之島後就係一望無際嘅…
 
江之島嘅路線基本上只有一條,沿路環島半周再折返,所以基本上唔洗好PLAN定行程同要去嘅地方。好!大家開始一齊踏上樓梯路程~江之島有兩樣不可不知嘅名物:女夫饅頭同埋比頭更大既蝦餅。女夫饅頭有兩種款式,分別係黑糖皮同加入酒既皮(兩種饅頭代表夫妻二人)。食後既感覺係~~黑糖皮似馬拉糕,酒皮則有少少似平時飲茶食嘅豆沙包。至於蝦片﹐唔好講笑,真係大過個頭!係完全可以COVER到我係頭嘅SIZE,不過都唔平,一塊要600YEN,而且味道方面比較鹹一點,但難得尼到都可以一試,最好就同人SHARE啦~另外有一種八爪魚味,只係賣350YEN,雖然比蝦味細塊一點,但都有好多人買~可以一試。
 
沿路第一座到達就係江島神社。江島神社求財為主。裡面有一座池,傳聞只要將用池水洗淨既硬幣擲中龍王前面既錢箱,就會財源滾滾~筆者係幾年前都曾經試過一發入魂,但依家仲…唔緊要!心誠則靈心誠則靈…但係上一次尼嘅時侯龍王口前都只係好似一隻碟仔,依家竟然變左就最少六倍大嘅錢箱﹐唔通龍王都識得與時並進?
 
接住一直走一直走就會上到中津宮。中津宮有種好特別嘅籤,就係水籤啦。抽完簽之後上面會咩籤文都無,需要係側邊嘅水琴之音嘅水池將簽整濕,就會浮現簽文嫁啦。
大吉!心誠則靈,心誠則靈…
 
沿路自然景色千祈唔可以忽略,每一處都會令人感受到大自然嘅強大,而且空氣仲好清新~
 
沿路中有一間賣多種口味嘅雪糕店,除左正常口味仲有唔少奇怪口味。而且老闆仲好風趣咁寫出賣完嘅雪糕口味係出走中/逃走中唔同情況
 
充滿好奇心同挑戰精神嘅我就揀左白飯魚味,而JOY就揀左清酒味(揀完都覺得自己好不得了)
試食後感:第一下真係…哇…成口都係白飯魚,只能話店家真係好足料。其實佢主要都係牛奶味,但就混合左大量白飯魚,簡直係啖啖肉。雖然個味唔係話太差,不過…有好奇心嘅我下次會試海蜇味!
 
經過一番樓梯同長征,終於到左海岸啦!海洋一望無際,仲有陣陣海風吹過,感覺真係好舒服,好似好多煩勞都吹走曬咁,值得一到!
係岸邊亦都有一個好出名嘅景點,就係岩屋啦!不過今日好多好多人排隊就無入去了,上次到訪嘅經驗係:好黑﹑好黑同好黑。感覺有少少似張保仔洞,而且要500YEN入場費,所以大家自己衡量嚕~
 
樓梯地獄係原路折返先正式開始。因為係去程嘅樓梯係不停向下走,所以回程就自然係不停…但可能因為今日天陰仲有幾陣風,而且身體狀況良好,又無上次咁辛苦!而且沿途有好多唔同嘅景色,就算真係攰到頂唔順,一路都有好多風味食店,可以係裡面食個飯休息下再行,最裡面嘅位置仲可以見到無敵大海景!
整體尼講,江之島係一個令人放鬆心情感受海水與海風嘅好地方。雖然要有一定腳力,但當看到大自然同係都市圈難以尋覓嘅景色,就會覺得係值得嘅。
 
全力支持:大新銀行、香港航空、中國平安保險

回覆

ronny的圖片
唔係有行人電梯咩?