【東京美食】每日限量30個-黑毛和牛半熟蛋肉丸

▼自由之丘可能唔係大家熟悉嘅地方,佢屬於東京都一個位宅區,但近年越黎越多遊客都識黎呢道,因為呢道亦都以好多甜品店同雜貨店出名,我形容呢區為一個休閒雜貨好去處~我亦都好鍾意呢道,今次係第二次黎呢個地方,但今日黎嘅目的係為左一樣美食~
 
▼自由之丘駅只可以經東急東橫線到達,涉谷出發撘急行列車只係2個站,10分鐘就會到達~
 
▼出左站行5分鐘左右就到達我嘅目的地,就係呢間叫「腰塚」嘅黑毛和牛專門店。
 
▼呢間店係有2層,1樓係賣生肉、便當同埋熟食,2樓就係燒肉餐廳。
 
▼咁我今日唔係為左食佢地嘅燒肉而黎,而係為左佢而黎:1日30個限定嘅「黑毛和牛半熟蛋肉丸」!見到張圖真係流晒口水呀
 
▼我本身擔心1日30個限定會好快賣晒,兼大排長龍~點知佢11點開門,我差唔多11點半先到,都仲有得賣兼見唔到人龍XD
 
 
▼最右手邊,最近收銀個碟就係啦!
 
▼目測仲有10個左右
 
▼一個價錢為380YEN(計埋稅)
 
▼呢間舖主打係黑毛和牛,所以會見到好多唔同款嘅黑毛和牛生肉出售!
 
▼仲有好多便當,價錢仲要唔係好貴~
 
▼好,到試食時間!個肉丸真係好大個,因為我唔係一開門就去買,所以只有微溫。
 
▼太大個嘅關係,咬左幾啖先咬到隻蛋嘅一半~(請無視我咬得比較樣衰
 
▼牛肉丸入面嘅牛肉真係超好味,果然係黑毛和牛,而且肉汁勁多非常JUICY,同埋唔知點解大部分日本嘅炸物都唔會有好油膩嘅感覺,呢個都唔例外;而半熟玉子好香,蛋黃絕對冇腥味,和牛+玉子都冇令我失望,不過我覺得肉丸+半熟玉子呢個配撘真係非常飽肚,我食一個已經飽左啦
 
▼由於我咬得比較樣衰嘅關係,所以係instagram搵左其他網友咬得靚啲嘅相片比大家睇下,係咪好吸引呢!!
 
▼認住呢間叫"腰塚"嘅店舖啦!!下次有機會一定要試埋佢樓上嘅燒肉餐廳
 
▼地圖如下:
 
腰塚(自由が丘店)
地址:東京都目黒区自由が丘2-12-19 1F
電話:03-5731-0861
營業時間:11:00~23:00