【東京站覓食】享受美味和牛- 米澤牛黃木

▼繼伊達牛舌之後,今次我再推介《東京站美食》比大家!
 
▼位於B1地下街的黑塀橫丁,東京站八重洲北口,中央口及丸之內地下北口都好易去到!
 
▼落去B1F嘅黑塀橫丁
 
▼裡面有好多食店
 
▼當中我揀中嘅係呢間「米澤牛黃木」,點解我㨂佢呢?原因有3個!
第一:因為米澤牛!對號稱日本三大牛之一嘅米澤牛一直聞名已久,深愛和牛嘅我一直都好想試
第二:說來慚愧,大部份日本食物種類我都試過,但就係未試過喺日本試SABUSABU涮涮鍋,所以我今次就決心去試下!
第三:食店嘅TABELOG評分不錯 http://tabelog.com/tokyo/A1302/A130201/13155839/
 
▼「米澤牛黃木」門口
 
▼東京只有一間分店
 
▼餐廳唔係好大,只有42個座位
 
▼燈光比較陰暗,但環境非常舒適
 
▼餐廳係有中文MENU的,所以唔駛擔心唔明日文啦,以下套餐係最抵食同價錢較親民嘅
餐廳最出名嘅食物係米澤牛壽喜燒(すき焼き),所以我就首先點左一個3500YEN嘅米澤牛鍋(牛里脊)套餐~
 
▼然後由於太想試SABUSABU涮涮鍋嘅關係,我就再散叫多一個5800YEN嘅牛助肉涮涮鍋(太貴我都唔捨得叫套餐) 
 
▼另外網上仲推介一款生肥牛壽司,所以我就豪一豪合埋雙眼叫埋去啦
 
▼餐廳除左鍋物之外,仲可以直接叫米澤牛排餐~
 
▼壽喜燒(すき焼き)嘅餐牌,牛嘅份量會比一開始米澤牛鍋(牛里脊)套餐定食多
 
▼呢個時候等我講解一下壽喜燒(すき焼き)同涮涮鍋(しゃぶしゃぶ)嘅分別啦,其實分別好簡單,壽喜燒的湯係唔可以飲而涮涮鍋個湯係可以飲。因為壽喜燒嘅湯汁好少而且好濃,只有喺鍋底薄薄嘅一層,主要成分係醬油同糖。
 
▼呢個就係壽喜燒嘅樣子
 
▼套餐仲會附送2個前菜,雞蛋,飯同漬物
 
▼前菜1,呢個超好味,有啲牛肉同羅白蓉嘅物體
 
▼前菜2都唔錯!
 
▼不過重點就緊係要試下個米澤牛啦!!真係不得了,會唔會太好味呢!?非常嫩滑,油脂恰到好處,有入口即溶嘅感覺
另外,點埋個蛋黃會更滑更好味!可惜份量唔多,好快就KO食晒
 
▼然後就試下個SABUSABU涮涮鍋,正宗SABUSABU嘅湯底就係咁簡單,純白開水加昆布(其實我一開始係唔知,覺得有啲驚訝)
 
▼涮涮鍋嘅主角-米澤牛助肉,可以見到油花都幾多
 
▼仲有一盤蔬菜
 
▼因為個湯冇乜味,所以我就放左蔬菜先(但後來查清楚原來正宗日式涮涮鍋係應該先落肉,食晒啲肉之後再撈返啲油脂同泡沫上黎先再加蔬菜,咁啲湯汁就唔會越黎越油,反而吸收晒所有蔬菜嘅味道,變成又香又甜)
 
▼雖然次序錯左,但唔緊要啦,而家就落牛啦!!
 
▼我就放入去10秒左右就拎返上黎食~
好味呀,又係入口即溶,真係好正,不過同壽喜燒嘅牛里脊相比,我會鍾意牛里脊多啲!
 
▼涮涮鍋米澤牛係配上芝麻醬及醋
 
▼最後嘅米澤和牛壽司,1500YEN得3件~
 
▼可以揀青檸汁或者鹽調味
 
▼食後感係唔錯幾好味,但就冇乜大驚喜,未去到放大雙眼大叫好好味嘅程度,所以我覺得唔叫都得
 
▼總括黎講,《米澤牛黃木》係一間高質素嘅餐廳,但對我黎講就真係有啲貴,如果大家真係想試嘅話,我會推介大家叫佢嘅套餐定食,就唔推介大家食呢道嘅涮涮鍋啦,因為我真係覺得個湯底冇乜味(可能係我唔識食),但牛嘅質素係無可置疑!
 
《米澤牛黃木》(東京站)
地址:東京都千代田区丸の内1-9-1 東京駅八重洲北口黒塀横丁 B1F
營業時間:11:00~23:00