【東京巨蛋】跟我去睇棒球賽!

 
今日我地黎到東京巨蛋,要見證呢場樂天同巨人既對決!
話說第一次去睇棒球賽,心情真係好興奮啊。
巨蛋真係好大,佢分咗好多個門口可以進場㗎。
 
▲睇波前我地都買咗件teeshirt同毛巾支持下巨人~
 
▲睇下我地全副武裝支持巨人!
 
▲一入場已經見到全場橙色,氣氛好熱烈!
頭半場樂天一直領先,睇到好緊張!巨人每次一得分,
觀眾就會揮動佢地嘅毛巾同叫口號,真係好正!
 
▲到中場既時候,會有啦啦隊表演~
 
▲咁啱果日大會為咗祝賀終身名譽監督長嶋茂雄先生,每人座位上
都有一件橙或黑嘅T-shirt,到中場大家都著起就砌咗佢個名出黎啦!
事後我番到日本屋企,睇新聞都有播到呢日全場著T-shirt砌字嘅畫面!
 
▲因為巨人係主場,所以幾乎8成觀眾都係巨人fans,而樂天只有
一小部分。所以買飛嘅時候要買清楚自己鍾意既隊伍既區域啊!
 
▲如果睇睇下頸渴咁點算呢?現場會有好多女仔揹住好大袋野
周圍賣野飲,有啤酒汽水或者雪糕等等。
 
▲巨人喺下半場反超前,贏咗樂天球隊!觀眾都十分興奮!
喺我隔離嘅支持者仲興奮到互相握手,歡呼聲此起彼落~
 
▲場內有個類似food court嘅食野地方!
 
▲我就試咗呢個棒球帽芝士咖哩薯片,幾好味㗎!(750円)
 
▲呢度仲有簽名棒球買~有冇邊個球員你係特別鍾意嘅呢?
 
觀後感:
話說原來睇一場棒球賽要成4個鐘㗎,當晚係6點開始,
10點先完。但今次真係一次好好嘅體驗,現場氣氛真係好好,
好開心。如果大家有機會去日本,都可以check下會唔會有機會
撞正棒球賽,咁就可以參與下呢一個日本人好重視嘅運動啦!
 
=================
如何購票:
1. 直接上棒球隊嘅官網購買。
例如想睇巨人,咁就上呢個網:http://www.giants.jp/G/ticket/
如果你唔識日文,佢仲有中文版嘅~
 
咁以下呢個就係8月時間表,例如想喺東京巨蛋睇,就揀番
「東京ドーム」,8月19日就有巨人對阪神。可以用信用卡付款,
佢有3個方式可以取票嘅,可以自行列印條碼門票、去自取票機
拎飛或者去7-11拎飛。如果7-11就要手續費108日圓/1張,
其他方式都唔需要手續費。
 
2. 網站購買
上呢個網:http://t.pia.jp,再搜尋野球賽,好快就可以揾到有d咩
棒球賽嘅門票有售。但呢個網只有日文,所以可能會有點麻煩。

回覆

Xindy的圖片
哈哈,因為如果唔係長住東京,要就時間各樣野去買飛架。但我地今次都算遲買,都仲買到飛:)