[東京好好住]超人氣傳統日式旅館 澤之屋

去旅行食買玩當當重要啦,不過住得好同樣重要~~~~今日就同大家介紹一間位於「根津」(上野同日暮里附近)嘅傳統日式旅館「澤之屋」!到底點解依間旅館咁受外國人歡迎,可以喺酒店網站拎到97%最高評分呢?一齊嚟睇吓啦!
 
 
雖然我住喺東京都冇去過根津,不過其實依到同根津神社、下町風俗資料館、上野公園、東京國立博物館、國立西洋美術館、同上野動物園都好近,唔係山卡啦地方嚟㗎!搭東京地下鐵喺根津站落車,行幾分鐘就到~一路仲有好多路牌指示「澤之屋」方向,唔洗怕搵唔到~
 
一入到去大堂,我差啲以為自己去咗圖書館~好多好多好多日本旅行、美術館同博物館嘅小冊子啊!大部分都係英文,另外又有啲係繁體中文(完全冇日文……)絕對唔洗擔心睇唔明~旅館老闆話如果有需要幫手打電話預約,大家可以直接開聲叫佢地幫忙,好好人啊!
 
餐廳~酒店有早餐提供,唔洗提早預約,落嚟點餐就有得食!嘢飲係自助形式,自己想飲咩就斟咩~
不過依到嘅早餐得西式早餐,例如煎蛋、多士等等……我都係想出去食多啲哈哈!
 
餐廳入面有好多傳統日式擺切~依啲木芥子係以前一位日本木芥子師傅所做嘅~當年佢喺依到住個陣覺得非常舒適,好鍾意依間旅館,從此每年都會寄一個木芥子嚟依到~好warm啊!
 
好啦上房睇吓先!依間係雙人房,開晒D被出嚟都仲有空間坐低沖吓茶,食吓枝豆,唔算好細~
 
套房入面係有洗手間同浴缸嘅~嗱嗱嗱傳統就唔等於係舊嘅!你睇個水龍頭係咪好新淨~
 
洗頭水、沖涼液次類全部都有~唔洗自備~
 
每間房都有風筒,唔洗專登去大堂借~
 
當然牙刷亦都已經準備好啦~
 
至於個馬桶……無錯!係強個人爆買嘅人氣貨品之一--洗patpat溫暖廁所板~
 
如果唔揀套房嘅話,房入面就冇得沖涼,要落去沖~不過落去沖仲好啦,你睇下幾靚!
 
好多人唔鐘意去旅館住,因為唔想同其他人一齊係澡堂沖涼~依到就冇依個問題啦,因為每次只可以有一個家庭入去沖!
不過記得留意返澡堂係有時間限制㗎!過咗零晨一點就冇得沖,要等到第二朝6點!
 
另外因為有唔少人係成個月成個月咁住,咁冇得洗衫點得呢!放心,依到有齊洗衣機同乾衣機~唔好搵藉口話因為冇得洗衫所以要買衫啊!(不過要入錢㗎)
 
洗衣粉亦都已經為你準備好!仲好鬼大桶㖭!
 
晾衫嘅地方~可以夾好多好多好多襪!
 
出太陽的話可以放出去晒衫!
 
另外仲有得熨衫㖭!太好啦!啲衫每次係個喼到拎出嚟個陣都皺到呀媽都唔認得!
 
好啦~咁講到底,點解依個旅館咁受外國人青睞呢?就係因為依個獅子頭啦!
 
旅館負責人以前有學過跳日本嘅傳統舞蹈獅子舞~佢話原本獅子舞係大時大節先有得睇,不過佢覺得依個活動咁代表到日本,不如自己係旅館到表現比啲客人睇啦~所以間唔中就會係餐廳依個位表演獅子舞啦~佢仲話見過香港嘅舞獅,覺得好犀利㖭!
 
跟住就嚟睇吓手信啦~有好多選擇啊!名信片、頭帶、T-Shirt、浴衣、仲有好多各式各樣嘅小飾物㖭~
 
段片就講過人氣NO.1嘅手信係浴衣,咁人氣NO.2係咩呢?就係依件東京T-Shirt啦~原因……因為依到嘅客人大部分都唔識漢字,所以佢地一見到漢字就變晒心心眼~~
 
另外比小朋友著嘅依件浴衣都非常之靚!如果有大人版就好啦……
 
另外我又好鍾意依個漢字印仔~依個係將英文名直接翻譯做日文嘅漢字讀音!
 
好似依個「情慈」,你估吓本身個英文名係咩?比三秒你地估………
……
……
……
開估!答案係George「jo-ji」!
 
最後依張由窗口影出去嘅相有咩特別呢?我本人同旅館嘅負責人都覺得冇咩特別,但佢話依個位係每一位客人嘅影相位,因為大家冇見過依啲咁嘅日本屋喎www大家點睇哈哈~
 
至於價錢方面,一個人5400yen(約$378);雙人房$710;雙人套房$786(姐係每人$393)~都算合理啦~~~~
 
有興趣嘅話,可以上佢地個網頁到望吓㗎~
 
下次再介紹其他旅館比大家睇~bye~