【有得睇有得玩!】激靚世界級體驗型燈飾

一步入冬季,好多別具特色嘅燈飾裝置都陸續開始出現於日本各地,當中有以櫻花、青之洞窟等等唔同主題嘅燈飾,但如果你問我有冇再特別啲嘅推介,我會話畀你聽,今年位於伊豆公園嘅燈飾一定滿足到你!
 
 
呢個燈飾活動今年已經係第二季,使用LED燈泡數目更加係第一季嘅兩倍,由200萬個增加到400萬個,當中嘅「光之花田」更堪稱係全世界最大型嘅燈飾,一朵朵發哂光嘅花,望落去真係好靚!
 
 
除咗光之花田之外,園內仲有唔同嘅主題,好似「宇宙」、「Fantasy」、「侏羅紀世界」等等,每一個都營造到好特別嘅氣氛,一行入公園範圍已經好似去咗第二個世界咁。
 
「宇宙」
 
「侏羅紀世界」
 
但係講到最特別,都係園內超過10種嘅遊樂設施,估都估唔到喺唔同嘅燈光之下竟然可以玩到空中溜索、碰碰車、賽車,喺燈光之下穿嚟穿去真係超靚又超好玩!
 
園內超人氣嘅「Zip Line」係全日本第一個可以喺燈飾上飛馳嘅空中溜索。
 
日本第一個船型立體迷宮,入到去到要集齊所有印章先算完成任務。
 
要由上而下咁慢慢欣賞園內景色,可以玩吓呢個「Sky Cycling」,慢慢踩住離地4米嘅空中單車睇燈飾超特別!
 
鍾意賽車嘅人又點可以唔玩返轉!
 
可以控制住個機械人同朋友對戰係咪好得意呢。
 
香港好多地方都冇得玩碰碰車啦,呢個仲打哂燈咁,好難忍到唔玩。
 
如果同另一半嚟梗係要去戀人神社祈個福,大家約埋下年再嚟過,諗吓都覺得浪漫。
 
 
公園入面仲有好多唔同設施玩,但大部份都需要另外收費,不過咁難得先嚟一次,玩多幾個都冇所謂啦~
 
伊豆公園「グランイルミ ~2ndシーズン~」
地點:静岡県伊東市富戸1090 伊豆ぐらんぱる公園内 
舉行期間:2016 年11 月11 日(星期五)~2017 年8月(暫定)
舉行時間:16:30~21:30 分 (隨季節會有所更改)
入場費:大人¥1,200、小童¥600 (部份遊樂設施需另外收費)