最期待的築地開業了!築地山貴水產市場

 
幾時都話香港係一塊福地,唔止無災無難、係購物天堂,同時亦係美食之都。而家就連想食最新鮮嘅築地魚生,都可以隨時食到,唔洗專登飛去日本,皆因「築地‧山貴水產市場」已經正式開幕!
 
 
呢到佔地1.1萬平方呎,由日本築地市場最大嘅批發商「山治集團」開辦,係香港第一個水產市場。海產、刺身壽司或海鮮丼已經係定番必食,但除此之外仲有即捕浜燒海鮮區,可以即買即燒,鮮到世界盡頭,仲有龍蝦包等必試特色主食。而場內亦特地參照日本築地市場同其他魚市場嘅設計,以保留築地風味,希望大家嚟到會更有去咗築地嘅感覺。另外,樓上其實仲有個空中花園,為照顧到因太逼而無位食嘅食客,現場設有外賣專區,可以直接買番屋企或帶到碼頭空中花園慢慢歎。
 
 
先試試風靡日本嘅龍蝦包同墨魚汁海膽包,墨汁海膽包單是$68嘅售價已經相當值得一試,麵包係採用歐洲入口嘅墨魚汁自家研發製成,需要24小時發酵,海膽更落重料到連中間嘅汁內都夾住厚厚海膽,呢份誠意絕對抵讚。而龍蝦包除咗麵包係自家烘焙外,細微位至包汁亦特地自己研發;主角波士頓龍蝦不但啖啖肉,仲爽口彈牙份量十足,一個女仔怕食唔晒,有原隻或半隻龍蝦($168/$98)可供選擇。
 
 
黎到魚生丼區,樣樣都好吸引,幾經艱辛之下終於揀左「特級山貴丼」($168)。呢個丼採用原隻蟹箝、龍蝦肉、三文魚籽同10幾款角切魚生製作而成,最特別係有3種食法:1. 直接食魚生。 2.用紫菜包住刺身同飯diy手卷。3.倒入熱湯,茶漬飯完成,食盡3種風味!
 
 
輪到立吞壽司區,叫得「立吞」,真係一張凳都無,清一色要企。我叫咗主2個一份5件嘅壽司盛合set(各$88),細嚐後最鍾意築地主打嘅鮪魚腩壽司,勁creamy兼入口即溶,其他壽司亦好入味同新鮮。留意食時記得用掃「凌空」點醬油,以保持鮮味,唔好嘥咗件新鮮壽司。
 
 
而呢到嘅賣點就係--180度無敵維港景!即使略嫌價錢有點貴或無得坐,但可以對住個景邊食邊chill,都已經值回票價吧!
 
 
另外,現場仲有零售區,好似一田咁專賣日本零食、酒類同水果,食完飯仲可以買份「souvenir」番去!如果大家已經蠢蠢欲動想去試,建議上網預先book定:http://yamataka.optitable.com/tc/ 雖然都可以walk-in,但市場會比book左既客人優先入場,所以唔想排隊就要做足準備啦!
 
營業時間:10am – 10pm(凌晨為批發時段)
地址:灣仔碼頭二樓。