【日本郵輪假期vol.1】福岡站:太宰府天滿宮!

搭飛機去日本玩,相信大家都有試過,但去到日本之後再搭郵輪周圍玩大家又試過未?今次就同大家介紹下「日本郵輪之旅」啦!
 
今次郵輪之旅有咩咁特別?
一般人對郵輪嘅刻板印象可能都仲停留喺「上船賭錢」,不過我今次呢個「日本郵輪之旅」就好唔同,除咗本身郵輪已經有show睇有嘢玩之外,每日郵輪仲會喺唔同地方泊岸,所以每日都可以落船玩,變相可以去多咗好多地方!之後我會逐一介紹郵輪設施同特別嘅景點!
 
分享下成個郵輪假期嘅行程先,一共玩五日四夜(因為第六日一早落船,所以唔計,哈哈):
Day 1 : 福岡
Day 2 : 舞鶴
Day 3 : 金澤
Day 4 : 境港
Day 5 : 韓國釜山
Day 6:福岡
 
首先我地會喺福岡上船,喺登船之前仲有啲時間,所以第一站當然要拜訪福岡必去嘅太宰府天滿宮喇!
 
太宰府天滿宮
雖然全日本總共有12,000座天滿宮,但福岡呢個先係「龍頭」總寺院,所以嚟到點都要去參拜一下!
 
首先了解吓天滿宮嘅故事:天滿宮係為文學世家官原道真而建,話說佢5歲就識詩吟和歌,文學天分過人,所以個個都稱佢為神童。可惜樹大招風,太多人嫉妒佢,於是醍醐天皇繼位後,就將佢降職為大宰府嘅權帥,令佢終日鬱鬱寡歡,不久就離世了。
 
後來人們為左崇敬道真係學問上嘅卓越成就,於是起咗呢座祠廟,當佢係掌管知識嘅神咁拜。不過其實亦有說自道真死後,京都疾病和天災不斷,大家都認為呢個係「道真的作祟」,所以興建呢座祠廟黎鎮壓呢啲唔吉利嘅事情。
 
 
TADA~~~到達目的地!睇個背景就知條街有幾熱鬧....
 
 
 
 
呢到就係天滿宮既表參道(商店街),主要係茶室同民俗工藝品店,售賣日本的的骰骰嘅傳統小物。但個人覺得間間都好似差唔多,唔係話太特別,大可不必浪費時間。
 
 
不過有樣野一定要試,就係名產梅枝餅(對唔住婆婆影到你表情咁)。梅枝餅嘅由來,係因為飛梅傳說。眾所周知中國嘅國花係梅花(雖然我唔知),道真就因為長期透過文學接觸中國文化而愛上梅花,被降職要離開屋企時,更作咗首好悲傷嘅歌同種喺屋企嘅梅花道別。而梅花亦因為太思念道真,一晚間由京都飛奔到太宰府,從此太宰府滿佈梅花,梅枝餅亦因為咁而嚟。不過因為時間嘅關係,我無緣試到...所以如果大家有機會去,一定要代我了結呢個心願~
 
 
呢間Starbucks算係太宰府嘅「獨家版本」,由日本建築大師隈研吾設計建造,其設計概念係「以自然素材為本,展現傳統與現代的融合」。成間都以木條一層一層交疊構成,看似編織的手法其實源自日本傳統玩具「cidori」嘅結構,並採用大量天然素材例如木頭、竹、泥磚等,結合光、空氣和水,禪味超重。聽講好多人嚟呢到唔係為咗天滿宮,而係為咗呢間starbucks。
 
 
第三要做嘅野就係摸牛頭。道真死後,人們將佢安置喺拉牛車準備將遺體送往京都,點知拉吓拉吓班牛突然唔郁,停咗係太宰府附近唔肯再行。所以大家認為係因為道真唔想離開呢個地方,於是尊重佢嘅遺志,就地築墓建廟。between,班牛太有靈性,所以傳說摸咗牛頭就會有good luck同埋變得聰明。
 
 
 
然後會經過一座紅色嘅橋,個景靚到我好似係key落去咁。
 
 
終於嚟到大門口。
 
 
尊重當地文化,入去神社之前,記得要先洗洗手,以表示對神嘅敬意。再誠心啲可以漱埋口,記住係漱口,我第一次唔知直接飲咗,仲要唔止一啖....
 
 
 
 
神社境內仲有好多珍貴嘅文化財同傳統神道建築。
 
 
大多數人嚟係為咗祈禱學業順利、金榜題名、工作錄取/升遷和考試順利等,睇吓我條片有幾多學生就知~
 
 
啲祈福牌仔叫「繪馬」,行去望到大部分都係同金榜題名有關。
 
 
去完太宰府天滿宮,下一集真正上郵輪玩!記得留意我嘅「日本郵輪假期」喇~!