日本花火大會 點只係睇煙花咁簡單!(有洋蔥)

 
山下智久:「關於夏天的記憶是花火、浴衣和長澤雅美」。好啦我想講嘅並唔係長澤雅美,而係冇嘢可以比起着住浴衣去花火大會依件事更加夏天、更加浪漫、更加日本、更加值得大家由香港飛過嚟體驗一次!
 
 
日本嘅花火大會,同逼係維港兩邊睇完就散場嘅煙花匯演並唔係同一件事!總括嚟講可以分為3part:
1.着浴衣
2.逛出店(攤位,又有分買嘢食同玩遊戲兩種)
3.睇煙花(雖然係廢話w但係你一陣睇完佢地放煙花嘅原因就會發現有洋蔥!)
等我逐一介紹過你聽呀~(趕時間可以直接飛去睇煙花個part~)
 
浴衣
每當有花火大會嗰日,就會一街都見到着住浴衣嘅可愛少女(及小量大媽),真心覺得淨係為咗依個天堂般嘅光景已經足夠說服你點解要去花火大會。除咗女仔之外,男仔亦都會着浴衣出席依個盛宴,成件事真係好有氣氛、好日本、好青春、好夏天、好浪漫!!!!
 
(sor冇日本妹睇睇住我先啦)當日我去到赤羽嘅北區煙花大會個陣其實已經係10月,不過都仲見到唔少人着浴衣喎,果然係日本人心目中花火大會同浴衣係分唔開嘅~
 
btw好多人都覺得浴衣着得一次半次,比三、四千yen租嚟着幾個鐘、過吓癮就算。不過,MIKA覺得如果你成日都會嚟日本,不如索性買返件好過啦!一到夏天,uniqlo、激安、樂天等等都會有平價浴衣買,仲要好多都係3千幾4千yen就包晒你成set連埋鞋!除非你淨係會着一次,唔係一定係買抵過租!(圖依套都係3千yen左右!抵唔抵先!)
小食+遊戲攤位
 
唔好話我為食,好多人去花火大會其中一個目的就係行攤位(出店)!最常見嘅有炸雞、章魚小丸子、大阪燒等等~
北區燒花大會依到串章魚串燒就真係好食到不得了,肉厚鮮甜又軟身,出乎意料地好食!
 
攤檔之中永遠肉系都係最多人排隊!依串豬肉厚切好好咬口~500yen…算係正常價錢啦!
 
另外我想私心地介紹另一種香港人冇食過,但又係小食攤檔好common嘅美食,就係炸炸牛油薯仔啦!
成個薯仔拎晒去炸到個皮脆卜卜,入面入口即溶,加埋牛油、明太子芝士醬等等,實在係人間極品!
 
依個係我之前係箱根個花火大會到食嘅!一試難忘啊~~
 
雖然唔係每一個花火大會都會有咁大型嘅表演,不過唔多唔少都會有人唱吓歌、跳吓舞,大家一齊高高興興咁~
 
睇煙花
日本人睇煙花會自己帶蓆去,墊喺地下坐~遇到啲好出名嘅花火大會,開始之前兩三個鐘,大家就已經坐定定等睇煙花㗎啦!
 
其實如果講規模同氣勢,或者香港嘅煙花會更勝一籌。日本嘅煙花比較斯斯然、慢慢地出場。爆完一粒、等一等、再爆第二粒。
有時一幕同一幕之間仲會停幾分鐘㖭~亦都係因為咁,大家會一路睇煙花,一路同朋友/家人/另一半傾計談心,係一個好好嘅聯誼活動~
 
好多人都知道日本煙花係七同八月放,大家有冇諗過點解?我就聽過一個有關煙花大會嘅傳說:
話說每年7月14鬼門關就會大開,往生嘅先人就會返嚟探我地。雖然知道先人們就係我地左近,但係見又見唔到,摸又摸唔到,點樣先可以向佢地表達我地嘅愛呢?有人就諗到,我地要為先人送上最美麗嘅花!一朵唔夠,要成個天咁高咁大,等係遠方嘅先人都可以收到我地嘅心意!
就係咁,鬼節依兩個月就演變成花火大會嘅日子啦~
 
煙花雖然好靚,不過一閃即逝,同櫻花一樣,生命好短暫,但同時又好璀燦,大家都會將最美好嘅回憶留喺心中……
原來花火大會背後有個咁嘅故事,不得不承認日本人浪漫得嚟硬係要帶啲傷感> <
 
感性嘢就講完啦,如果大家夏天會嚟日本,有機會真係去參加吓啲煙花大會啦!(周圍都會有好多好多煙花大會,總有一個去到嘅)
又如果你對北區煙花大會有興趣,可以睇下依個網頁
 
講到依到,忽然有啲掛住香港嘅大家,好想一齊飲住酒睇煙花…