日本網民倡議東京都全面禁止萬聖節活動?!

之前都同大家介紹過東京涉谷萬聖節有幾墟冚。前幾日喺富士電視台節目「バイキング」上,藝人水道橋博士就提出「東京都應該全面禁止萬聖節活動」,並得到節目上其他嘉賓嘅同意及支持。
 
節目上提出咗萬聖節帶畀其他市民嘅困擾,例如啲人用換尿片嘅房嚟換costume、用奇怪詭異嘅裝束去嚇人、搞到一地都係垃圾之類、吸引大量痴漢小偷等...雖然之前都有同大家講過喺日本萬聖節嘅經濟效益大過情人節,但好多人就指責不論係警力定係事後清潔嘅功夫都花咗大量經費。
 
水道橋博士就話:「原本呢個節日係用嚟慶祝農業嘅祭典,點解要係都市舉行?」當中,佢提出「喺鄉下搞就完全冇問題,但喺東京都搞就帶嚟好多問題!」6個節目嘉賓入面有4個都讚成佢嘅意見。
 
著名搞笑藝人後藤輝基就話雖然唔知係咪應該全面禁止,但就覺得因為啲人嘅不明地玩過火,所以引起好多騷動。
 
佢嘅拍檔岩尾望就話如果要慶祝,就去番自己屋企或者租一間舖頭去搞,唔好搞到街上啲人。佢仲話喺歌舞伎町事務所附近曾經見到過全身都係血嘅人,俾人嚇親㖭!
 
搞笑藝人横澤夏子就指責會作出萬聖節打扮嘅女仔全部都係好下流同唔得體嘅打扮,尤其係喺涉谷嘅女仔全部唔係著超短嘅短褲短裙就係露腰等性感打扮。佢仲話啲人如果俾痴漢非禮千祈唔好怪人,因為喺佢哋打扮得太下流先會吸引痴漢。
 
其中反對水道橋博士嘅薬丸裕英先生都指責佔據公共廁所同埋亂拋垃圾、搞到環境好污糟都係一啲要重視嘅問題。

 

根據日本紀念日協會推算,2016年嘅日本萬聖節市場規模值1345億Yen,比前年增加咗10.2%,而情人節只係得1340億Yen。
 
截稿前,根據日本傳媒J Cast嘅網上投票顯示,有46%(3078票)嘅人都讚成水道橋博士嘅提議,僅僅次於46.8%(3129票)嘅「應該禁止喺街上作出萬聖節打扮」。覺得現時情況冇問題嘅就只有5.9%(393票)。睇嚟涉谷萬聖節呢個狂歡嘅景象都唔係好受國民歡迎呢...
 

雖然小編覺得一年一度以一個主題慶祝下其實冇咩大問題,不過的確有啲問題係需要正視(例如的確打擾到其他都民嘅正常生活、或者嚴重污染環境)。如果有香港市民嚟緊都會前往東京慶祝萬聖節就記得小心行事喇~
 
(另外,先不論性感嘅萬聖節打扮係咪下流... 絕對唔可以正當化痴漢嘅行為。其實真係好多日本人仲係抱住保守嘅觀念,覺得只要你唔著得暴露就唔會惹來痴漢...點都好,女仔要保護好自己就係真嘅。)
 
資料來源:J Cast、「バイキング」(フジテレビ)