日本約會地點「之最」!!!

同男/女朋友去日本想去D特別嘅地方拍下拖,唔想剩係買野咁悶?
係咪無咩頭緒去邊好呢,就等我介紹5個被日本網站選為「日本之最」嘅約會地點比你,
等你下次同情人去果時可以搞搞新意思啦!
 
1.日本一“大きい”!葛西臨海公園の「ダイヤと花の大観覧車」
日本最大!葛西臨海公園的「鑽石和花的大摩天輪」)
「ダイヤと花の大観覧車」係東京灣嘅地標,因為佢係全日本最大嘅摩天輪,直徑111m,高117m。離地超過100米嘅高度係咩概念呢,就係可以將skytree、富士山一覽無遺咁誇張啦!
而且佢有個優點,就係唔需要同陌生人尷尷尬尬咁搭埋同一架,可以同你嘅BB豬喺空中二人世界17分鐘!由於營業時間係10:00~20:00(星期六日及紅日就~21:00),所以不論係風和日麗嘅藍天定係浪漫夜景都可以慢慢歎!岩哂情侶去呀。
玩完摩天輪,仲可以搭公園嘅小火車去園內水族館同鳥類園,玩半日都得嫁啦!
 
2.日本一“速い”!横浜ランドマークタワーの展望フロア用エレベーター
日本最快!横浜Landmark Tower展望層用電梯)
喺横浜Landmark Tower 69樓,就有離地273米高嘅展望樓層「Sky Garden」。從2樓嘅大堂上去展望樓層,就要搭日本最快嘅電梯啦!佢嘅速度係750m/mins,只需40秒就到69樓啦!雖然咁快,但佢好穩陣,亦都好靜,唔會太驚嘅。你而家一定心諗,如果驚D就好啦,女朋友就可以摟實自己嗌好驚驚求保護,對唔住應該實現唔到。
 
但係由展望樓層望落去嘅景色都好鬼靚嫁。由東京都廳至到伊豆大島,360度全景都可以睇到!

而喺欣賞風景之際,同一層有個「Sky Cafe」。果到有個同「Sky Garden」同樣273高,不過係273mm(即係30cm)嘅特別版軟雪糕,呢個size一日限定10個嫁咋!佢比一般size大3倍,呢個時候就要靠你地愛的力量一齊挑戰食完佢啦哈哈!
 
3.日本一“多い”!年間入園者数最多を誇る、パンダでおなじみの上野動物園
日本最多!年間入園者数最多,有熊猫嘅上野動物園)
能夠同人氣動物見面嘅上野動物園,係日本年間入場人次最多嘅動物園黎。佢喺2015年發表嘅年間入場人次排名中顯示有369萬人次,比起第2名嘅名古屋市東山動植物園嘅227萬人次多出100萬,穩居首位!係日本首屈一指嘅人氣景點黎嫁!帶埋女朋友去,就可以聽佢好可愛咁講「好打耳好打耳」啦!
 
4.日本一“古い”!レトロ感あふれる元祖遊園地、浅草花やしき
日本最古老!復古風格的元祖遊樂場,浅草花房地)
如果你同你男女朋友都係「想回復童真去玩呀!」咁諗嘅話,呢個日本最古老嘅遊樂場「浅草花やしき」就岩哂你地啦!呢到嘅開園時間竟然係江戸時代!1853年果時由造園師森田六三郎開左個花園,其後開始有遊戲設施呢就係喺明治時代。之後戰後,遊樂場就重建左了。
遊樂場約會最唔少得當然係玩過山車!呢個係日本現存最老嘅過山車,2013年果時就迎接左佢嘅60大壽!如果你表示好怕玩刺激嘅機動遊戲,我諗呢個都好岩你!因為佢只係時速42km(日本最快嘅富士急過山車時速172km),想嗌都可能嗌唔出。
 
5.日本一、いや世界一“先進的”!多摩六都科学館のプラネタリウム
日本最先進!多摩六都科学館的天象儀)
要講浪漫約會嘅王道,一定係天象儀!(日網真係咁寫,我都睇唔透)喺西東京市嘅多摩六都科學館入面,有個被傑尼斯世界紀錄認定嘅天象儀。果到係首次喺大型半圓頂上用左高輝度LED光源,投影出約1億4000萬個恒星。呢個星星嘅數量係世界上最多嫁!
投影每2個月就會更改一次,有關季節星座,宇宙之類嘅話題會由專門工作人員解說。兩個人可以坐喺雙人座位到慢慢觀覽,享受下用世界第一嘅天象儀製成嘅「星空的四季約會」係咪好正呢?(講明先如果女朋友覺得呢D野好悶就唔好帶佢去睇啦!唔係比人飛左都未知咩事)