日本女人眼中…十大最性感嘅女藝人係…

睇女仔並唔係男人嘅專利,好多時男人同女人喺欣賞異性嘅時候,都有佢地獨有嘅眼光。日本節目「ランク王国」近日喺渋谷同原宿訪問咗300位女性,睇下佢哋心目中最性感嘅女星到底係邊個。唔知同你哋心目中諗嘅,又一唔一樣呢?
 
 
1位 壇蜜
 
現年35歲嘅壇蜜自從12同13年分別拍咗兩部SM題材嘅電影之後,就一直被冠以「SM女皇」嘅稱號。雖然年紀已經踏入中女階段,但無損佢嘅高人氣,其激情嘅演出更加令人印象難忘。一頭長直黑髮同魅惑雙眼更加有一種難以形容嘅魔力,難怪日本女仔都會俾佢神秘嘅氣質所迷住。
 
 
2位 橋本 マナミ
 
同樣步入中女,現年32歲嘅橋本愛實,一直有「國民情婦」嘅稱號,係一位日本寫真模特兒同演員。經常毫不吝嗇咁展現自己嘅迷人身段,更一度挑戰壇蜜嘅性感女皇地位,難怪會令人充滿遐想啦。
 
 
3位 石原 さとみ
 
石原さとみ相信唔駛多講大家都非常熟悉。演戲多元化嘅佢,成熟女人風又得,可愛小女孩亦得。一雙渾圓嘅大眼睛同豐潤嘅雙唇,加埋嗰個楚楚可憐嘅樣,真係會令人好想保護佢㗎!仲記得佢喺《失恋ショコラティエ》入面嘅演出,身為女仔雖然覺得女主角嘅行為有啲令人咬牙切齒,但無疑佢又真係好吸引嘅!
 
 
4位 小嶋 陽菜(AKB48)
 
最近先被投票選為AKB十大「小惡魔」成員嘅小嶋陽菜,經常以性感造型亮相各大雜誌同寫真集,迷人身段亦都獲得日本女性一致讚賞,難怪可以當選惹人遐想女星之一。雖然佢今年已經正式宣佈畢業,但都希望佢之後嘅發展可以更上一層樓喇!
 
 
5位 菜々緒
 
現年28歲模特兒出身嘅菜々緒,擁有無敵九頭身比例。一對超長索腿更加成為佢嘅個人標誌。成日話男仔最鍾意睇腳,其實女仔亦何嘗唔係一樣喜歡欣賞長腿呢?(特別當自己無嘅時候 XD)
 
 
6位 深田 恭子
 
由細睇到大嘅深田恭子,唔經唔覺已經33歲。近年體重一直反反覆覆,直到最近終於成功甩走脂肪,肥恭變瘦恭,仲一連推出兩本寫真集大展健康膚色?。
 
 
7位 長澤 まさみ
 
長澤 まさみ出演過多部戲劇女主角,從清純可人到性感誘惑,通通都難唔到佢。日前她更加宣布加入百老匯歌舞劇《Cabaret(小酒館)》,著馬甲同吊帶襪挑戰妖媚舞孃「莎莉」一角,露出傲人上圍同修長雙腿,可謂尺度大解放。
 
 
8位 篠原 涼子
 
已經43歲嘅美魔女篠原涼子,曾拍攝多部電視劇同電影,演技一直大受好評。2014年曾經一度暫停演藝事業照顧患癌嘅老公市村正親,可惜最近又傳佢同已婚男星江口洋介搭上,拋夫棄子搞外遇,引起演藝界好大迴響。
 
 
9位 大久保 佳代子
 
身為日本諧星嘅大久保佳代子,雖然常常被取笑係醜女,但因為經常用「咸濕熟女」嘅角色參與綜藝節目演出,所以都獲得好多女性觀眾嘅認同。可能就係因為佢咁出位嘅言論,所以令人覺得佢充滿「幻想空間」?
 
 
10位 杉本 彩
 
全榜最高齡,現年48歲嘅杉本彩成功擠身最後一名。除咗因為保養得宜之外,亦可能因為佢嘅成名作,情慾電影《花與蛇》嘅角色太深入民心,所以令人有想入非非嘅感覺。
 
 
作為小總結,小編可以用女性嘅角度話你知,性唔性感並非在於個女人著得多布定少布,反而係清純無辜得嚟,其實暗藏殺傷力…所以喺我心目中嘅No.1係…石原 さとみ!!! 一句講晒,無得輸!如果你哋揀,你哋又會投邊個呢?