日本千奇百趣自動販賣機!雞蛋都有得賣!?

去過日本嘅朋友我諗都知道,日本真係可以話係自動販賣機嘅天堂!
香港就黎黎去都得汽水機或者零食機啦,日本就唔同啦,可以話要咩有咩。
 
聽我講少少日本自動販賣機嘅資料先啦。
原來日本最早發明嘅販賣機係香煙機,早喺1888年已經有啦!
而日本嘅機唔單止係純粹買賣,仲有唔同機能。
包括識別功能,用黎確認買家年齡(用於煙酒之類的販賣機)。
仲有儲分功能,好似超市咁買嘅時候可以用卡儲分。
仲有對應災害時嘅特別功能,好似地震時可以靠更改設定黎免費提供飲料咁。
真係照顧周到呀!
 
好啦而家等我介紹下有D咩特別嘅機,等你地下次去日本留意下周圍有無見到啦!
 
1.首先係周街都係嘅香煙機
就咁香煙機就無特別丫,咁你又知唔知有D機係有成人識別功能呢?
即係為左防止未成年人士買煙而設果D呀,好盞鬼!
佢係點操作呢?就係有個相機影住你,
之後從你有無皺紋,瞳孔大小,臉的大小等等去判斷你成左年未,
想像唔到?睇片啦!
唔知準唔準呢嘻嘻?
 
2.啤酒機
罐裝啤酒梗係唔夠特別,鮮啤酒夠特別啦掛!
唔好講咁多,繼續去片睇下點樣可以用自動販賣機買到新鮮啤酒啦!
 
 
3.雞蛋機
哈哈不過唔驚D雞蛋碎咩?我睇唔透
 
4.賣米機
咁搞法睇黎日本師奶就黎連超市都唔洗去啦!
 
5.熟食販賣機
真係好好奇佢入邊嘅構造到底係點啊!
 
6.重頭戲黎啦,就係拉麵,烏冬販賣機!
唔好以為佢係靠D咩新科技啊,其實呢D機已經歷史悠久,
成30年機齡嫁啦!(唔係肌齡)
有無人同我一樣好有興趣呢D熱食販賣機到底係點樣極速喺入邊整野食出黎嫁呢?
我知啦!我真係知啦!答案原來係咁嫁:
 
真係好佩服日本人嘅創意呀!
睇完之後有無好想香港都有咁多種類嘅自動販賣機呢?
有時真係好方便嫁,懶懶地唔想排隊埋單就可以喺D機到買嚕。
幾年前Eason都咁講啦,既方便,又快捷丫嘛。