【日本傳統節日】兒童專屬的七五三節又到啦!

去親日本玩,見到日本啲小朋友真係覺得佢地好可愛,尤其係著住傳統和服嘅時候,簡直就係一個識郁嘅公仔咁!
 
 
襯住又就嚟到一年一度嘅七五三節,大家可以去神社行吓,喺七五三節即係11月15日呢一日,好多爸爸媽媽都會帶住阿仔阿女著住和服去神社感謝神明畀佢地仔女健康咁成長。
 
 
七五三喺日本都算係一個幾大嘅節日,不過父母唔係每一年都會幫仔女著和服去謝神,佢地會等小朋友滿3歲、仔仔5歲,或者囡囡7歲先會帶佢地去神社,呢個亦係「七五三節」名稱嘅由來。
 
 
至於點解係3歲、5歲同7歲,有傳呢3年係厄運之年,所以父母要帶小朋友去除厄運,但又有另外嘅說法話3、5、7係吉祥嘅數字,所以要去神社慶祝。不過無論個由來係點都好,父母都已經視七五三節為一個好重要嘅日子。
 
 
如果七五三節適逢係周末,一啲大型嘅神社一定會見到好多著住和服好可愛嘅小朋友,如果咁啱係平日,父母就通常會喺對上一個周末帶小朋友去。
 
雖然驟眼望落去個個小朋友嘅和服都好似差唔多,但細心啲睇,其實係有唔同㗎。
 
 
3歲嘅女仔會喺和服出面再加一件被布,7歲嘅女仔就唔使,而而家嘅男仔除咗會著傳統和服之外,佢地仲會著西裝添。
 
3歲女仔
 
7歲女仔
 
男仔西裝
 
男仔和服
 
因為日本人好重視呢個節日,所以啲大型少少嘅神社一定會好多人,如果你問東京人,佢地第一時間一定會諗去明治神宮同日枝神社,呢兩度都係東京都內超人氣嘅七五三參拜神社。
 
明治神宮平時已經多人,一到咗七五三就更加熱鬧,唔單止爸爸媽媽,連公公婆婆都執到正出席。
 
日枝神社喺七五三當是會喺神社前面放置棋盤畀小朋友企上去朝拜天地四方。棋盤象徵住人生勝負嘅舞台,寓意小朋友喺成長路途中不論邊一方面都能獲勝。
 
喺神社參拜完之後,小朋友通常都會收到神社畀嘅千歲糖、御守、或者小玩具等嘅小禮物,代表住神社對小朋友嘅一種祝福。
 
上年去日枝神社參拜嘅女仔收到一個著住神社巫女裝嘅公仔做紀念品。
 
喺神社入面通常都買到呢啲千歲糖,入面有兩支一紅一白嘅棒狀糖,寓意小朋友可以保持喜悅心情咁成長,健康長壽。
 
如果大家咁啱11月15日呢段日子會喺日本,不妨到附近神社感受吓呢個日本獨有節日嘅氣氛!