【日本人侍應?】味十味餐廳@銅鑼灣

 
鍾意日本,特別係學緊日文嘅朋友,係咪成日好想喺生活中用到日文,但又無識到日本朋友,所以無機會練到會話呢?我就成日有呢個煩惱啦!但而家我就知可以點呢!就係去有日本人嘅地方膽粗粗咁同人講日文啦!問題係通常喺香港好正宗嘅日本人鋪頭,價錢方面都會好離地,閒閒地食餐飯都幾百蚊一個人,小窮L真係負擔唔起!不過,我岩岩就搵到一間食物正宗得黎,價錢絕對可以接受之餘,全部侍應都係日本人嘅餐廳!!!即刻睇下實際去到係點嫁啦!
 
味十味 Ajitomi
 
門口係咁嘅,正常日式餐廳嘅感覺
 
一入到去其實坐得幾滿,所以我一個人就要坐bar枱位。而客源方面,我聽到好多日文同英文,廣東話都有,但主要都係日本人同外國人比較多。
 
佢個Menu係中英日對照。有好幾個都好似好好食咁,本身其實我係想叫呢個「炸雞肉芝士定食」,但我問佢推介邊個,佢又講係大阪雞肉丸餐,咁我就聽佢嘅介紹而放棄左呢個啦!
 
一落完單,店員就會比杯茶同埋濕毛巾你擦手。
 
環境唔算咩靚裝修,但勝在夠地道,好似去左一間日式小店咁。
 
主菜會由呢到直接送上客人手。前菜就由侍應拎比你。而呢位師博係香港人,佢見我開頭入去一直同侍應講日文,又拎住部機係咁影,就問我係咪日本人哈哈哈哈......有無人明白一比人咁問就會好開心嘅感覺?我成日覺得係自己日文講得唔錯人地先會咁諗嘻嘻,好自戀完。
 
我呢個餐嘅前菜有沙律(配唔知咩名嘅汁,味道酸酸地幾好食),正宗味噌湯(唔係港式味精湯),一隻溫泉蛋,一碟迷你青瓜紅蘿蔔,同一碟迷你凍茄子加幾條麵。
 
比張全家福先!呢個就係餐廳推介嘅大阪雞肉丸定食啦!(大阪つくね丼)
 
我用到嘅日文:
すみません、おすすめは何ですか。(不好意思,我想問推介是什麼?)
すみません、お茶をください。(麻煩比D茶我)
お会計をお願いします。(麻煩你埋單)
 
感想:整體黎講呢間餐廳性價比幾高,佢好食得黎唔會好貴(Lunch),周圍嘅指示都有日文,
加上佢全部侍應都係日本人嘅呢個重點,令你有種身處於日本嘅感覺。食物方面,好好食,有真正日本料理嘅水準,份量都相當足夠(對我黎講更加係太多),所以算係非常抵食。地點位於銅鑼灣,如果去開果邊嘅話真係不妨去試一試,相信你都會愛上!
 
--------------------
餐廳資料:
名稱:味十味 Ajitomi
地址:銅鑼灣登龍街28號永光中心7樓
營業時間:星期一至六: 12:00-14:30; 18:00-23:00 / 星期日及公眾假期: 12:00-14:30; 18:00-22:15