【日本之最】最難預約旅館 - 箱根吟遊

 
越得唔到嘅野就越想擁有佢,講緊嘅係連日本人都覺得係全日本最難預約嘅溫泉旅館「箱根吟遊」。點解咁難book?因為呢度實在太靚太正啦,啲客check-out嗰陣就會順便預訂埋下次入住時間,所以搞到新客仔要早差唔多成年就打去預約,真係好誇張!不過聽講間唔中都會有住客臨時取消booking嘅,有興趣不妨撞下手神,睇下有冇機會入住到呢間號稱全日本最難預約嘅旅館。
 
咁到底呢度有咩咁吸引呢?
 
1. 隨四季改變嘅自然風景
旅館位於420米高處,環抱河谷及箱根連山隨四季而變嘅壯麗景色,因為擁有呢個地理優勢,酒店都特登將Reception同Lobby設置喺5樓頂樓,等住客check-in嘅時侯可以親身感受大自然嘅美。
 
酒店大堂充滿大自然風情,坐喺椅上一抬頭就會望到一片綠油油嘅大自然山景。
 
入夜後又係第二種感覺,氣氛好浪漫
 
2. 極具日本風味嘅高級室內裝修
一行入住宿範圍個心會不期然咁靜落黎,入面裝修有種禪嘅味道,置身當中就好似置身於幽靜嘅森林咁,加埋四周嘅環境,真係說不出嘅舒服。
 
旅館嘅每一個角落都充滿住濃厚嘅日本傳統風格,有種遠離繁囂嘅感覺。
 
 
Lobby真係好舒服,望住個靚景,唔覺唔覺真係可能會坐咗個幾兩個鐘。
 
3. 超體貼酒店服務
一入到旅館,工作人員會先請客人除鞋,等住客有種回家嘅感覺,而出門嘅時候佢地亦會好細心咁準備定對鞋俾你,真係超級貼心!至於旅館嘅料理,佢地會親自送到房間入面,等住客可以在私人嘅空間內品嚐美食。
 
Check-in嘅時候旅館會奉上一杯特色調酒。
 
1樓客房
 
房間內嘅用餐區
 
晚餐嘅懷石料理好豐富,嚴選當季新鮮食材入饌,讓住客食出材料最根本嘅味道。
 
4. 專屬獨立天然溫泉
有美景又點可以冇露天溫泉!旅館每個房間都擁有專屬溫泉,想幾時浸就幾時浸,直情覺得自己同大自然融為一體,勁寫意,冇得頂啊!
 
撞正紅葉季山頭一片橙紅色,一邊浸住溫泉一邊享受美景真係人生一大樂事!
 
5.絕景風呂
喺旅館嘅5樓都仲有兩個大少少嘅風呂,可以望到箱根連山絕景,記得唔好淨係掛住浸房入面個私人溫泉忘記咗「月代」同「月音」呢兩個溫泉啊!
 
5樓「月代」
 
 
訂房小貼士:
雖則呢間旅館係難訂,但大家可以試下成為The Ryokan Collection會員再喺網上預訂,會比較易訂到。
 
 
箱根吟遊
地址:神奈川県足柄下郡箱根町宮ノ下100−1
電話:0460-82-3355
房價:雙人房 ¥29,000起/人