日威太貴買唔起? 買日本威士忌作為手信 – 1000-5000円內都有選擇 (一)

日威太貴買唔起? 買日本威士忌作為手信 – 1000-5000円內都有選擇 (一)

之前同大家介紹左唔少日威,並且係咁講佢地宜家有幾咁貴,對於威士忌新手黎講過下下10000~20000円以上買支酒,或者買支黎送比朋友可能好遙遠。
 
當然貴嘅酒有佢嘅價值係到,但係就算係威士忌愛好者都無可能日日飲靚野,所以酒廠都會推出一啲性價比高嘅酒款比大家做「Daily Dram」,即係日常生活,同朋友食飯吹水飲嘅酒。
 
今集就為大家介紹如果拎住1000至5000円黎買日威其實都有好多選擇!呢一隻就為大家介紹幾款日本嘅「Blended Whisky 調和型威士忌 (ブレンデッドウイスキー)」先。
 
1. [1000円之選] Kirin Whisky Fuji-Sanroku Tarujuku 50° 富士山麓 樽熟原酒50° 
大家可能接觸Suntory同Asahi旗下Nikka嘅Whisky比較多,「富士山麓」其實係Kirin旗下,位於富士山附近富士御殿場蒸溜所嘅Whisky品牌。除左將威士忌保持係酒精度50%外,仲要係非冷凝處理,保留木桶熟成原酒嘅大部分風味同香氣。舊版600ml只係1000円左右,而新版700ml都係1500円左右,呢個價錢,無得挑剔啦!
日威太貴買唔起? 買日本威士忌作為手信 – 1000-5000円內都有選擇 (一)
 
2. [2000円之選] Suntory Whisky Premium角瓶 (サントリーウイスキープレミアム角瓶)
「角瓶」相信好多朋友都會見過,由其係去居酒屋,唔少都係用黃色Label個隻角瓶黎做Highball。叫得做Premuim當然比普通角瓶高級。保留住「角瓶」注重嘅整體Balance外,因使用左山崎同白洲蒸溜所嘅雪莉同紅酒桶熟成原酒,味道,香氣層次較普通角瓶高,而且酒精度數都比普通角瓶高3% (43%),講左咁多,都只係賣2000円左右咋。
日威太貴買唔起? 買日本威士忌作為手信 – 1000-5000円內都有選擇 (一)
 
3. [2500円之選] Nikka Whisky From the Barrel (ニッカウイスキーフロム.ザ.バレル)
呢支由Nikka出品嘅Whisky唔好睇佢個樽平平無奇,其實佢都絕對唔少野。因為佢係設定係比一般普通Whisky高酒精度嘅51%,麥芽原酒同穀物原酒調和後再經過熟成,令到Whisky嘅口感濃厚香氣細緻。接受唔到咁高酒精度嘅朋友可以加冰,或者做Highball都唔錯。500ml只係承惠2500円。
日威太貴買唔起? 買日本威士忌作為手信 – 1000-5000円內都有選擇 (一)
 
4. [5000円之選] Suntory Whisky Hibiki Japanese Harmony (サントリーウイスキー響ジャパニーズハーモニー)
相信唔洗介紹大家都識佢,就係大家熟悉嘅「響」。「響」系列當中無年份嘅Japanese Harmony係2015年推出,係2016年仲獲得SWSC最優秀金賞。酒帶有玫瑰,木桶,蜜糖香氣,而且個樽嘅design都係咁有型,淨係拎黎擺都唔錯啦。如果大家唔追求年份,平平地黎講呢一支絕對係日本威士忌嘅代表作。
日威太貴買唔起? 買日本威士忌作為手信 – 1000-5000円內都有選擇 (一)
 
以上嘅日威就算送比朋友做手信或者自己飲都唔會肉赤,而且仲好多地方都買得到(可以參考返我之前嘅文章Link),大家下次去到日本不妨考慮下喇。