新鮮都無咁鮮!試食豐洲水産海鮮丼專門店

香港人鍾意食魚生已經係常識,如若見到係「築地直送」更加會兩眼發光,但往往會發現始終食唔到「築地的味道」。原來,所謂嘅「築地直送」,都不過係向批發商攞貨,其實根本唔算「直送」,難怪呢間「豐洲水產海鮮丼專門店」一開業,即刻重現一蘭首次係香港開業嘅誇張景象,不但排晒長龍,更成為各大傳媒嘅追訪對象!全因呢間由伊藤紘明開嘅豐洲水產海鮮丼專門店,係香港首間海外直營嘅海鮮丼專門店,所有海鮮都會以零下60度嘅冷凍方法急速飛到港,分分鐘仲新鮮過日本啲刺身店,真正做到‧築‧地‧直‧送!
 
 
不過到底,係咪真係值得大家排2、3個鐘,就係為咗一嘗新鮮海產?就等我試食睇吓究竟係咪真係咁好味!
 
 
門面其實唔大,只係坐到40人左右,不過唔迫,而且乾淨舒服。
 
 
第一個要試嘅,係人氣最高嘅【豊洲海鮮丼】。($368 港元)
豐洲海鮮丼係25款丼之中最多海鮮最colorful嘅一款,當中包括牡丹蝦、甜蝦、帆立貝、鮪魚(赤身及腹身)、香蔥鮪魚腩、油甘魚、醋鯖魚、海膽、山芋粒、鮮海草、三文魚子、皇帝蟹肉等10款以上食材,理論上絕對足料,不過唔知點解賣相望落無網上睇到嘅咁豐盛...但做人又唔好只睇外表咁膚淺,呢個丼確實每樣野都好新鮮鮮甜,就連飯都特地採用日本山形縣生拔米,咬落口感粒粒分明,同樣係呢個海鮮丼嘅靈魂所在。而二人份量雖然可以免費加飯,不過都係覺得啱兩個細食嘅女仔share,大食如我,肚餓時絕對可以一個人啪晒成碗。
 
 
 
呢個【黑鮪霜降腹身丼】($188 港元)都係必食款之一,皆因呢到嘅鎮店之寶,就係鮪魚(Maguro)。千奇唔好以為鮪魚等於吞拿魚,鮪魚其實比吞拿魚矜貴好多,整成刺身或壽司都更加好食。而呢碗腹身丼採用嘅,係三崎港嘅水揚黒鮪,塊塊都厚切唔小氣。個人最愛用近骨肉整成嘅魚蓉,魚味最濃而且油香味重,而且同雪糕一樣,真正做到入口即溶!
 
 
香港人貪新鮮、鍾意玩刁鑽,菜式當然都要夠特別先滿足到我地。呢個望落有啲似羊架嘅物體,其實係【鹽燒鮪魚鮫】($188 港元),魚鮫即是魚鰓對下、魚鰭對入嘅位置,然後用鹽燒嘅方式供客人享用,出邊好難食到。
 
 
再黎就係我嘅最愛~【汁煮鮪魚眼】($98 港元)!其實我本來就有食魚眼嘅習慣(雖然成日比人歧視),因為著迷眼窩肉超滑超嫩嘅口感同埋豐富嘅膠質,感覺上充滿骨膠原,食完皮膚會好靚。而且牛眼咁大粒嘅魚眼真係未試過,同樣鍾意食魚眼嘅絕對要試。
 
 
最後係【韓味醬鮪面頰肉】($78 港元),本來以為係好似平時食魚面頰果種口感,點知食落味道同感覺都有啲似生牛肉!一擺入口即刻覺得有少少辣,但同洋蔥絲簡直係天造地設嘅一對,越辣越想繼續食,食完再啜一口溫泉蛋........爽。
 
 
至於野飲,同樣都係自家製,呢杯【士多啤梨芒果石榴乳酸特飲(2人前)】($45 港元)芒果味好重,而且可以食到明顯嘅士多啤梨肉粒,但唔知係咪已經食到味覺遲鈍,唔係好食到有石榴同乳酸味。
 
 
所以以後想食新鮮靚海產,有洗乜特登飛去東京築地呢(重點係哪有錢)?不得不讚老闆真係好聰明,識得捕捉我地香港人一年365日都咁想食日本野嘅心裡,係小編試食期間就已經不斷有好多人走入黎問派籌安排或幾時開門,到食完行出店外門口已經人頭湧湧,加上所有丼數量有限,店內亦不設電話訂座,排1-2個鐘隊(可能更耐)已經走唔甩,就睇你為咗食,可以去到幾盡了。
 
豐洲水產海鮮丼專門店
地址:灣仔謝斐道 415 至 421 號積福大廈地鋪 B
電話:2808 0292
營業時間:12pm-3pm;6pm-11:30pm