【新手教學】教你用「樂天」坐住掃日本貨!

有玩開網購買日本野嘅應該都一定有聽過樂天市場(日文版),基本上你想買嘅野都可以喺入面搵到,我啲日本同事好多時都上樂天買傢俬,話抵好多。至於我有時突然想食日本某啲零食或想買藥妝之類,我都會上樂天搞掂,好鬼方便。
 
不過樂天市場係有分日文版Rakuten Global Market,對於唔識日文嘅人嚟講用日本版可能就有啲難度,成日要估估吓嚟買野,為咗俾唔識日文嘅國外買家都可以隨時買到心頭好,樂天喺呢幾年整咗個海外版(即係Rakuten Global Market),吸引更多外國客去買嘢~
 
雖則日本版樂天市場同Rakuten Global Market都係同一個媽媽生嘅,不過實際上佢地又有少少分別,而綜合過各買家嘅意見,我得到嘅結論係:
 
◉Rakuten Global Market 店鋪會比日文版少,所以貨品都會少啲,因為搜尋結果只限有提供海外銷售嘅店舖嘅商品,所以只提供內銷嘅店舖同商品就唔會顯示到,但另一個好處就係唔駛好似日文版咁filter送唔送國外。
 
◉有時某啲限時特價促銷熱門商品喺日文版顯示有貨,喺Rakuten Global Market會話售罄,或者兩面價錢會有啲分別。
 
◉日文版樂天市場正常就冇免稅,Rakuten Global Market揾到免稅商品嘅機會較高
 
註冊教學
咁到底Rakuten Global Market好唔好用呢?首先教大家註冊,再一齊研究下整個購物流程。
因為日文版樂天同Rakuten Global Market個ACC係互通嘅,已經係樂天會員嘅就直接喺Rakuten Global Market登入就得ok。有中英日文俾你㨂,今次就用殘體字試下啦~
 
首先輸入電子郵箱地址、用戶名、密碼
 
輸入用戶信息,包括姓名、出生日期、性別
 
填寫用戶聯系信息,之後再㩒「建立賬戶」。
 
系統會顯示叫你確認所登記嘅信息,如果冇問題就㩒「注冊成為日本樂天會員」。
 
之後就會見到上面呢一頁,即係話你已經成功登記為樂天會員啦!
 
正式成為會員之後就可以喺Rakuten Global Market開始睇下有咩買啦!
 
購物流程
大家可以利用最上方嘅「搜尋熱門關鍵字」search吓心水商品。
 
不過Rakuten Global Market嘅翻譯有啲奇怪,明明個個中文字都係識嘅,但就唔多理解到底想表達啲咩。
 
「膨脹」起來?睇返日文版,原來佢係想表達增量......都幾搞笑。
 
揀好哂想買咩之後就可以㩒購物車俾錢。
 
 
系統會要求你再登入確認,之後就會出現提交訂單頁面,確認資料冇錯就可以㩒「繼續」。
 
喺樂天買野要逐間㩒俾錢,因為每間鋪都係分別收錢同寄貨(除非你之後用集運服務一次過寄,有機會再講。)
當然提提大家網上買嘢除咗件貨嘅價錢,一定要計埋運費,一般貨物資料個欄都會有「估計運費」呢個資料,可以睇到運費價錢,但係要注意:價錢未必準確!因為除咗貨物重量,包裝紙同盒嘅重量都要預算埋,你都知日本嘢包裝好花巧,所以預多少少比較好。
 
個人經驗分享:早前筆者買咗對reebok波鞋,計埋鞋盒,用EMS運費要¥2500~
 
 
撳完「估計運費」可以睇到運費價錢(圖為使用EMS運送嘅價錢)
 
俾錢嗰陣其實有得揀運送方式,我自己最常都係用EMS,一般由日本寄香港,需時3至4日左右。
 
不過提提大家,有時樂天會做「免國際運費」優惠,以前做過首3公斤免運費,咁就可以再慳多啲,到時都係入手好時機!
 
輸入付款資料,另外仲可以入優惠卷代碼,好多時樂天都會有coupon優惠可以拎,不過通常會有使用限制,例如某啲店鋪或者買滿一定價錢先可以用,如果有就可以入埋再比錢。
 
完成!~
 
點check件貨幾時到?
 
當你買完嘢比完錢,係會收到三封email確認,一封係樂天確認訂單,一封店鋪確認訂單,一封係確認寄貨價錢資料。
 
要留意係寄貨之後,封email會比個tracking number你,唔知大家係咪同我一樣,上網買完等收貨嗰陣係特別心急哈哈
咁你就可以用嗰嗰tracking number,去返EMS個網 check下件貨去到邊(放心,有中文或英文)
 
當然,如果用其他運送方式,例如順豐,咁當然就係去返佢地順豐個網check下件貨去到邊啦。
 
又或者去樂天帳戶入面購買紀錄其實都搵得返個Tracking Information。
之後就坐係屋企等收貨
 
積分當錢洗:超級點數
其實大家唔做會員都可以去樂天買嘢,不過做會員有一個好處,就係買完嘢之後都會儲到超級點數,點數為交易金額約1%,例如包烏冬賣¥560,就會儲到5點,有啲促銷活動交易會俾到5%~10%點數,另外配合埋信用卡優惠或者限時promotion可以再賺多啲,都係一個好吸引嘅賣點嚟㗎!
 
呢啲超級點數可以留返下次購物時使用,1點可以抵消¥1,如果有足夠嘅點數,結算頁面就會提示可以使用點數嚟俾錢。
 
留意返,樂天市場(日文版)同Rakuten Global Market嘅超級點數係互通嘅,但使用上都有少少規範,例如點數設有使用期限、每次最少使用1點,最多使用30,000點,登入之後就可以喺右上角睇到自己有幾多點。
 
我就是成功例子哈哈,好似我咁,雖然唔係成日買,但都已經儲到2095超級點數!
 
總括嚟講如果Rakuten Global Market除咗翻譯有啲怪之外,個網都算易用,用多幾次熟手之後大家想幾時食日本野、幾時買藥妝都得啦~
 
下次再同大家分享樂天購物嘅tips同優惠!記得留意!
 
P.S. 打完之後見到Rakuten Global Market嘅facebook都有段片教人reg會員,大家都可以留意下,有優惠佢地都會即刻發怖: