【排幾耐都要試!】激讚滋味「吉列牛」名店4選

講到吉列料理,唔使講第一時間一定會諗到吉列豬,不過日本人咁多諗頭,吉列系美食又點會得吉列豬一種咁少。如果叫我推介,肉類系列一定係吉列牛!
 
整吉列牛勁講究火喉,炸嘅時間要拿捏得好準確,短短幾秒都會完全改變牛肉質感,整得好嘅吉列牛會炸到外層脆而不油,一切開入面仲係粉紅粉紅勁Juicy,諗起都覺得好味!以下幾間都係位於東京市內可以食到吉列牛料理嘅名店,一生人點都要去試一次。
 
1. 牛かつもと村@渋谷
 
 
話得係名店,排隊就少不免,不過呢間唔算等得好耐,中午時段去食都只係要等半個鐘左右,同朋友傾吓計好快就到。呢度嘅吉列牛只會炸60秒冇多冇少,所以可以做到外皮脆卜卜嘅同時肉質柔軟多汁!
 
食嘅時候可以點岩鹽、特製醬油、Wasabi或者Wasabi Source,想試牛肉最根本嘅味道的話一定係點岩鹽,可以吊到牛嘅肉香之餘又唔會搶咗牛肉嘅味道。
 
吉列牛嘅一大特點係通常都會整到半生不熟,但有好多人都食唔慣,呢度就好貼心地為每枱客人準備咗個小型烤爐,等想食熟少少嘅客人可以自己燒熟少少。
 
呢度全店得9個位,所以嚟到基本上都一定要等位,想唔等咁耐,記得唔好揀食飯時間去!
 
多人嘅時候真係會由店入面排到出街,好誇張!
 
牛かつ もと村 渋谷店
地址:東京都渋谷区渋谷3-18-10 大野ビル2号館  B1F
電話:03-3797-3735
營業時間:星期二至六 10:00~22:30、星期日及一 10:00~20:30
休息:無
 
==================
2. 牛かつ おか田@新橋
 
 
呢間吉列牛店非常把炮,因為佢只會開下奏短短三個鐘,仲要賣哂就收舖,唔夾準時間去真係未必食得到!
 
佢地嘅牛扒炸30秒就會拎起,原本以為炸咁短時間塊扒又咁厚身會唔會太生搞到有勁大陣肉腥味,不過名店就係名店,完全冇呢方面嘅問題,點埋自家製醬汁食簡直係完美嘅配搭!
 
不過呢度節奏都幾快,都冇咩時間諗想食咩店員就會話畀你聽有咩推介,勁強勢,想諗多陣都好似會阻住個地球轉咁......不過急速節奏換嚟嘅好處係等位唔使等好耐,基本上個個食完都即走。
 
間舖都幾細間,除咗counter位都有order枱,不過因為真係太多人去嘅關係,要有心理準備隨時要搭枱。
 
淨係吉列牛都有成5種選擇!唔知點揀的話推介1號嘅「牛ロースソースかつ丼」,吉列牛上面唧咗特製沙律醬,唔使再點醬油都夠哂好味!
 
牛かつ おか田
地址:東京都港区新橋2-16-1 ニュー新橋ビル B1F
電話:03-3502-0883
營業時間:11:00~14:00
休息:星期六、日及公眾假期
 
==================
3. 牛かつ あおな@上野
 
 
呢度嘅吉列牛有國產牛、黑毛和牛、霜降黑毛和牛三種可以揀,想食入口即化、油香四溢的話首推「霜降り黒毛和牛」,脂肪分佈得非常平均,由於薄切嘅關係,牛肉入口唔使點用力咬就會化開,牛肉嘅香味極度濃郁,食完呢度嘅吉列牛你一定會從此愛上呢度料理!
 
呢度只有24個座位,不過已經比上面幾間,位與位之間冇咁迫坐得比較自在。
 
間舖位置都幾方便,由御徒町行過去只係5分鐘左右。
 
牛かつ あおな 御徒町本店
地址:東京都台東区上野6-5-7 JUNビル 1F
電話:03-6240-1979
營業時間:11:00~23:00
休息:星期六、日及公眾假期
 
==================
4. 京都勝牛@御茶ノ水
 
 
講到吉列牛,唔可以唔提呢間吉列牛專門店!佢地嘅牛肉嚴選牛肩位置,屬於牛隻希少部位,齋聽都知夠哂矜貴!嚟到呢度一定要試招牌菜「牛ロースカツ膳」,外層嘅炸皮做得好薄,咬一啖完全唔會覺得食到成口都係炸皮,非常加分!牛肉就唔使講啦,夠哂軟腍兼極具肉香,專門店果然係專門店!
 
除咗個吉刑牛,如果大家個肚仲有位,可以試埋呢個天婦羅蛋飯。食嗰時可以篤爆隻蛋,再淋啲店家自家製醬汁上去食,簡單得嚟係意想不到咁好味!
 
呢間店都算闊落,中間位置有一張大枱,如果唔想同人面對面食咁尷尬可以揀counter位坐。
 
順帶一提,11月29日京都勝牛喺大阪嘅「あべの新宿ごちそうビル」都開咗新分店,仲會推出「朴葉味噌吉列牛膳」等全新菜單,賣相非常吸睛!
 
牛カツ専門店 京都勝牛 小川町
地址:東京都千代田区神田美土代町9-7 千代田21ビルディング 1F
電話:03-3292-7802
營業時間:11:00~22:00
休息:無
網址:牛かつ もと村 渋谷店kyoto-katsugyu.com/
 
+++++++++【樂天平掃日本貨】+++++++++
 
 
滿物滿¥11,000,可享¥1,500優惠
滿物滿¥14,000,可享¥2,000優惠
滿物滿¥20,000,可享¥3,000優惠
外加必掃福袋,詳情請參考: www.likejapan.com/cymonbottom