【抵?唔抵?】First Cabin-豪華膠囊住宿體驗

大家入到黎相信第一件事就係想知幾錢啦,筆者亦唔打算多賣關子,住左一晚(包埋早餐)總共$466!大家覺得貴唔貴?比起一般民宿又或者上一篇訓網吧的話,呢個價錢絕對唔便架啦…但係如果問有無下次?筆者認為下次如果搵唔到性價比高既民宿,又想嘆少少,訓餐好覺的話絕對可以住多次First Cabin!大家可以已經睇過唔少膠囊介紹,所以今次筆者會盡量以主觀少少既角度出發,用一個住客既身份分享返自己感受~
 
係入正題之前先請大家睇下官網既介紹

 
首先係行李寄存既問題,好多人可以擔心住膠囊的話擺放行李會好麻煩,但係呢間假假地都係「豪華」膠囊,各種服務質素都自然有所提升,未正式check-in前寄存行李亦都係完全無問題!當日筆者大約十點去到,只要出示passport,佢再check check就好快知道你係住客,服務人員英文亦都算係「可溝通水平」,所以唔識講日文都完全無問題,交低行李之後,服務人員隨即會比個牌仔你,想拎返行李既時侯只要出示返牌仔就可以拎返行李!
 
筆者先前住過一啲真正既膠囊(即係超平個隻),佢地雖然都會幫你寄存行李,但唔會有牌仔比你(有搞亂既可能);而行李既擺放位置亦係非常隨便,係客人隨手就可以觸及既位置,所以如果入面放左啲幾貴重既野的話,外出都唔係幾放心…不過First Cabin呢方面就做得比較好,行李既寄存位置係係counter入面,基本上只有服務人員可以接觸到大家既行李,感覺上比較安全

 

至於地理位置亦都係十分方便,筆者都幾有自信係一個絕對既路痴(程度:行旺角都會唔識路),但係呢間first cabin一出車站行幾分鐘就搵得到,而且外面亦都有標示清楚,所以如果讀者就算拎住一抽二抽行李都唔會太狼狽搵餐死,搭完車行兩步就到!換言之,大家放低行李就可以隨時搭車去第邊shopping!
 
 
講完一大輪check in之前既野,入住情況又如何?check in過後,大家大概會手持兩樣野-(1)寄存行李既牌,(2)一張寫明自己入住幾號房既卡:(1)寄存行李既牌唔使多講,基本上就係上述介紹過既牌仔,因為房間係無得上鎖,所以安全起見都會繼續寄存行李係counter;(2)一張寫明自己入住幾號房既卡亦無什麼特別之處,可以留意既係佢後面會寫住大家生存必須品-wifi既密碼,同埋呢張卡唔係普通既紙卡,大家係要用呢張卡係counter所在層數,拍卡先入到笠上六樓(大家居住既層數)
 
大家想知既除左價錢之外,相信就係房間既情況,到底大唔大呢~睇圖就知啦,官方圖一啲都無呃人,就係圖示咁大。對於筆者黎講呢個大細絕對充足,唔知各位讀者有無入住過比較便宜既膠囊房,基本上就係一個長方體,你想企係入面又或者執下行李既話基本上係無可能!但係有first cabin呢個大細的話,企起身當然不在話下,擺幾件行李攤曬係度都仲有位淨,仲有張枱仔比大家放野寫下野添(雖然我無用過)
去到日本當然都不忘無名醬!(不過甲鐵城似乎爛尾預感…)

 

大家如果住過一般膠囊房的話,就會發覺有兩大問題:焗同埋好焗!一般既膠囊房當然唔會有冷氣,如果開埋燈的話房內既情況就好似焗爐咁…但呢間豪華膠囊又有無呢個問題呢?係有…不過完全可以接受,以下筆者有兩個小建議,如果讀者到時遇上同樣問題可以試下:第一,如果覺得焗的話可以先試試再通風較到最大(然而筆者覺得作用不大);第二,就係親自落去counter叫佢開大自己房對出個冷氣!經筆者親身測試,係絕對有用,因為去到夜晚什至覺得有凍既感覺,蓋埋被就岩岩好perfect池,超梳乎
 
一般膠囊房既第二大問題當然唔係好焗就簡單啦就係會聽到隔離做野既聲音,如果你想了解當地文化固然好,因為入住膠囊既人出乎出意料的多日本大叔(!?),仲記得入住平膠囊個日,筆者清楚聽到半夜從隔離傳來fapfapfap既聲音(請各位用創作力量同幻想諗下係咩聲…)咁呢間first cabin隔音又做得好唔好?老實講,係麻麻既,如果周邊有人大力閂門,又話曬開閂行李的話係會聽到既…但經過訓網吧既訓練,筆者早就唔覺係什麼問題,加上first cabin係免費提供耳塞,呢種聲音的話一個耳塞確實可以完美解決,安心訓個好覺!

 

至於浴埸及沖涼房方面,實在無乜特別,唔會有什麼可挑剔之處,整體上都比人一種整潔既感覺…但值得一講既就係按摩服務,相信去過日本既讀者都會發覺周街都係按摩服務,而且價錢亦都係偏貴,不過如果大家行完一日街又好想鬆鬆的話,入住first cabin既各位就有福了,因為係9點前按摩的話係可以以2000yen有找既價錢做個全身按摩(30min),筆者雖然無乜經驗,但唯一講到既就係做完的確成身鬆曬,有可以再落街行多幾round既重生感覺!

 
最後介紹既係500yen既早餐,如果大家係早起既鳥兒,出到街其實都唔會有太多選擇,咁first cabin既自助早餐就係一個唔錯既選擇啦,最緊要係咩?可以食到餓嘛!至於野食質素就還可接受,唔可以話好好味但亦都唔會話去到難食既地步,所以如果決心去食好西既讀者千祈唔好抱太大期望…同埋雖然係自助,但食物選擇亦唔算豐富,有飯有麵有湯,配料有咖喱、魚、菜、腸仔呢啲極之基本既食物(筆者去到個日係無蛋既…有啲失望)
 

 

筆者知道大家都唔太喜歡睇長文…所以最後將重要既情報總結做幾點比大家參考:

 

1.比起用coin locker,直接將行李寄存係counter更加快捷方便
 
2.如果怕房無鎖既讀者可以:入到房會有個「在室中」既牌仔掛全房出面,最好在唔在房都掛係出面,出去既時侯都開住燈,同埋記得拍實道門(無錯,係有磁石可以啪一聲就拍實道門,開關仲會發出明顯既聲音)
 
3.counter有耳機同加濕器可以免費借用
 
4.想試試按摩既讀者可以趁優惠時段去
 
5.早餐唔適合想食好西既讀者,但對於想食餓個肚,拿拿聲食好早餐既讀者係一個不錯既選擇

 

雖然加埋早餐總共$466可能會有啲貴,但最難得既地方係first cabin比到一個整潔、舒服既環境你,加上成個體驗係無伏,所有質素都係中…如果唔想煩住邊的話first cabin確實係一個唔錯既選擇(但如果追求平的話筆者會建議住民宿,請留意下篇XD)