[日本在香港]《戀愛香港》已播出！日本網民：睇完好想去香港！

[專欄：日本在香港]

以香港為故事背景嘅《戀愛香港》（恋する香港），全部4集己經播出喇！劇組去咗多個特色景點，拍出香港懷舊同現代兼備嘅面貌，仲加入唔少廣東話對白，相信香港人睇到一定好有親切感！

日本網民睇完，普遍都覺得香港嘅街道好特別，好有興趣去香港！一齊嚟睇下佢地有咩comment啦～

第四集評價

《戀愛香港》話咁快就播埋最後一集，日本網民普遍都鍾意呢套劇，又覺得得４集太少。

《關於香港》

「喺《戀愛香港》入面出現咗嘅鋪頭食緊早餐。」

「睇緊《戀愛香港》。以前只係去過幾日旅行但已經覺得好懷念香港嘅風景。如果又後生經濟又比較鬆動，又可以係香港做嘢嘅話會想係嗰邊住下。點形容好呢，嗰種同東京比無咁冷淡嘅懷舊感覺。」

《劇情》

「《戀愛香港》原來總共得4集…有種啱啱先開始嘅感覺」

「將《戀愛香港》睇到最後喇! 感覺真係太好喇…
因為係30分鐘4集嘅劇集所以故事嘅發展同編排都比較快，不過都唔會話有難明嘅地方。而且小池榮子同吉澤亮兩個人嘅關係變化真係好好！」

「《戀愛香港》做完喇！感覺想再睇多５集。不過又感覺４集啱啱好。點講好呢…太長嘅話唔記得睇嘅可能性都會增加所以依加咁幾好。」

「雖然最初唔係好明講緊咩，不過慢慢故事連繫嘅時候，不知不覺就已經投入咗故事入面。真係一套好好嘅劇集！第二季幾時有呀？（笑）」

《藝人》

「睇完《戀愛香港》喇，比想像之中更好睇！
雖然完結方法令人好在意，但係比咩都重要嘅係Daniel！
為咗營造角色明明係日本人但係就會講中文—不過咁樣都幾好（笑）(*^^*)」

「《戀愛香港》第４集…已經係最後一集？！？！
咁快架…
想再睇多啲輕浮製作人嘅阿久津…」

第三集評價

《關於香港》

「畫面好靚⋯想去下香港呀。」

「今晚（播出當晚）嘅戀愛香港，取景地睇嚟喺油麻地同尖沙咀！」

「搵人教下我尖沙咀沙咀嘅正確發音吖」

《劇情》

「劇情發展愈嚟愈撲朔迷離 到底會點完係一大看點！」

「原來有飾演香港人嘅角色架，意外地感覺唔錯！ 然後感覺終於明白套戲嘅主題喇w」

「故事進展嘅步伐好慢」 「同上星期一樣嘅畫面竟然播咗7分半鐘真係令人難以置信」

「講起來我覺得呢套劇嘅劇情發展好有趣！ 如果唔係由第一集睇可能會有啲辛苦，但係上一集嘅內容由另一個人物嘅角度再睇好得意！！！而且多得咁樣呢個星期又睇到醉咗嘅吉澤亮喇！感謝！」

《藝人》

「Lanternーー！w Lanternーーー！ww Daniel嘅出場畫面多到瀉出嚟喇ー♪ #永田薫最高」 「開始喇ー！*\(^o^)/* Daniel講嘢好可愛！」

「香港…熙熙攘攘嘅感覺真係好… 榮子醬好可愛(ーωー)」 「一次都無覺得過小池榮子喺啊姨，但係同吉澤亮一齊就畢竟會感覺佢係啊姨。」

「應該話吉澤亮飾演嘅導演係人渣定係好煩⋯⋯望住咁嘅角色今日都有令我覺得煩躁嘅畫面，但咁樣一定就係演技好嘅證據所以無所謂啦」

「最上Moga接受The Television(ザテレビジョン) 有關戀愛香港嘅訪問，指接受出演嘅時候係「對工作抱有少許苦惱嘅時期」，又提到係第三次去香港。」

第二集評價

網民對於第二集嘅反應都比較正面

《關於香港》

「果然喺邊度影都好似畫一樣咁靚！」
「睇嚟戀愛香港嘅取景地多數都係旺角同鑽石山！」
「黑社會嘅描寫同呢邊（日本）好似www唔係呀唔係呀香港唔係咁…」
「戀愛香港，感覺唔錯。小池榮子同香港好夾。」

《劇情》

「比第一集有趣！」
「戀愛香港劇情接到落去好有趣～～」
「睇咗戀愛香港第二集喇～第一集有好多伏線但係睇到第二集就覺得「原來如此」～」
「同上一氣氣氛唔同咗但係可以輕鬆啲睇喇！期待下一氣嘅故事」
「劇情進展果然比較慢。改變人物視點去寫事情嘅來龍去脈係會令人想睇但係重覆嘅地方有啲煩。」

《藝人》

「飲醉咗嘅吉澤好可愛！」
「第二集主要係吉澤同小池榮子，令畫面非常安定咁好睇！」
「有冇人望住吉澤亮同馬場富美加睇到一對好襯嘅組合？」

第一集評價

正面評價：

《關於香港》

「突然之間有黑社會講廣東話都好有香港嘅味道（笑）」

「好懷念香港嘅茶餐廳⋯好想食呀」

「睇完變得想去香港⋯（上一次去完）時隔10年想再去」

「劇入面影到香港嘅街道好似都好繁華，好想去下香港確認下」

「拍得好細膩，但希望大家睇到最尾唔好瞓著」

「劇集在香港取景，有美食、酒店情報幾好」

「影到香港非常之咁靚但係實際上並無咁靚架。不過我都鐘意呢一類片。」

《劇情》

「因為係30分鐘嘅劇集所以故事都只係啱啱開始。應該都會繼續睇落去架喇。為咗唔好唔記得睇已經set好咗每星期錄低。」

「係一套估唔到劇情發展嘅劇所以感覺唔會厭，下星期都唔會唔記得睇！」

《藝人》

「平時無點留意電視劇，所以係電影以外都無睇過吉澤君嘅演技，年輕一代嚟講真係幾唔錯！」

「睇Moga醬出演一個同本身性格相似嘅角色，就好似睇緊Moga嘅記錄片咁好幸福！」

「一開始無期待，睇睇下甚至覺得下星期唔駛睇落去喇⋯最後小池榮子登場就突然之間令我好期待下一集！故事終於開始喇！」

「至今最鐘意嘅女演員。#馬場富美加」

「ED『YUME no MELODY』一播嘅時候，望住畫面入面嘅永田薫就不自覺咁微笑」

負面評價：

《劇情》

「睇3分鐘已經厭」

「睇劇名已覺得唔岩自己睇，但有現實感幾好」

「感覺係一套奇怪嘅劇」

《藝人》

「最上Moga仔細咁睇唔可愛，而且都係照稿讀⋯⋯」

「錄咗小池榮子同吉澤亮雙主演嘅新劇嚟睇。點知有個演技比較差嘅女演員一直出現⋯去查下發現佢叫最上Moga」

《香港網民反應》

琴日開場片喺網上公開咗之後，香港網民反應熱烈。有人開心可以用有心思嘅角度分鏡去影香港，亦可以將香港靚嘅一面向日本人介紹；不過亦有網民話套劇拍到香港嘅節奏好似好慢咁，有啲失真。有人亦擔心套劇影得香港太靚令日本遊客嚟到覺得失望。
 

10月9日起逢星期日深夜00：50 MBS電視台首播

10月11日起逢星期二深夜01：28 TBS電視台播放

11月20日起予定可於Netflix觀看

官方網站：http://www.mbs.jp/koisuru-hongkong/
官方Twitter：https://twitter.com/mbs_koisuruHK