愈去愈僻新天地 鳥取縣旅遊景點大集合

早幾日前先有報導講,港人遊日人數又創新高,唔少人已經去厭咗東京、大阪,依家鍾意愈去愈僻尋找世外桃園。除咗鐵道遊之外,多得啲航空公司開咗直航機來回香港至中国地區,方便好多「慢遊」愛好者。例如唔少人都制霸咗嘅廣島、岡山,一般嚟講山陰山陽之旅會去廣島、宮島、岡山、倉敷、同鳥取。但鳥取較遠離廣島,通常時間充裕先會去埋,所以鳥取暫時都唔係好多香港人知,又唔算好多人去。
 
鳥取到底係咩地方﹖地圖上鳥取喺岡山縣嘅正上方,不過屬於話遠唔遠,話近唔近嘅距離。鳥取縣有三個重要城市,鳥取市、米子市、倉吉市,三個城市都有鐵路打通。
 
 
加上鳥取係《鬼太郎》水木茂老師,及《名偵探柯南》青山剛昌老師的故鄉。所以鳥取縣各地有唔少鬼太郎同柯南嘅相關景點,而鳥取縣兩個機場亦以鬼太郎同柯南命名,有好多fans慕名而來尋找兩部作品嘅蹤影。
 
鳥取砂丘柯南機場:
米子鬼太郎機場:
 
但唔係以上兩部作品嘅fans,鳥取縣又有咩玩呢﹖
首先鳥取縣氣候適宜,全年平均約20度左右,七至八月約30度左右,背山面海,有利玩各類型戶外活動。
 
1. 鳥取砂丘
鳥取最著名一定係鳥取砂丘,佢係日本唯一、最大的天然砂丘。去砂丘方法係搭巴士至砂丘會館,再轉乘吊車進入砂丘。雖然砂丘的規模比沙漠細好多,但城市中一大遍沙景,真係相當少見。除咗去睇沙、吹沙之外,仲有得騎駱駝,玩滑沙、同滑翔傘。加上砂丘背面係日本海,去吹海風都唔錯。
 
 
2. 山陰海岸自然公園
浦富海岸被列入日本海岸百選,唔係浪得虛名。超靚海景,加上日本海水清到見底無敵嘅組合,去過都話正!附近有得坐遊覽船帶你遊海岸一圈欣賞美景,如果係坐獨木舟,仲可以划入天然洞穴探險。鍾意行山嘅朋友亦可以沿自然公園循海岸線行,俯瞰日本海風景。
 
3. 大山拓展運動場
又名森の国 (森林之國)。日本西部最大嘅運動場。佔地面積相當大,除咗有遼闊草原,露營場,戶外BBQ場、農園等。冬天更會開放滑雪場,係適合親子樂嘅地方,亦係俾小朋友寓玩樂於學習嘅地方。
開放時間:9:00~17:30
入場費:900円(中學生以上),700円(3歲以上),1-Day pass 1500円
 
除咗戶外活動外,鳥取縣亦有唔少古蹟同博物館。
鳥取縣於江戶時代曾為池田家藩地,所以唔少古蹟都同池田家有關。
 
4. 仁風閣
於1907年由池田家興建嘅仁風閣,曾為當時皇太子於鳥取旅行時嘅住所,現亦為國家重要文化財產。歐陸式建築風格,白色嘅外觀,兩層的木造建築,配以優雅庭園。亦係電影《浪客劍心》的外景拍攝地。仁風閣的內部保留歐風傢俱,又改裝成鳥取藩及池田家資料館,開放公眾參觀。想了解更多池田家嘅歷史,可以去埋「鳥取藩主池田家墓所」,初代藩主至第11代藩主均下葬於此。
 
仁風閣:
 
開館時間:9時-17時 (逢星期一休館)
入場費:150円(成人),高中、初中、小學生免費
 
鳥取藩主池田家墓所:
 
5. 妻木晚田遺蹟
但鳥取縣嘅歷史唔止由江戶時代起咁短,有紀錄2000年前的彌生時代鳥取已有人居住。而妻木晚田遺跡就係彌生時代留下的遺跡。遺跡坐落晚田山,現階段仍挖掘調查中,但已發現超過400個洞穴及500間獨立建築物。是目前日本被發現最大的彌生時代遺跡。除咗觀賞遺跡外,遺跡公園亦有舉辦不同親子活動,例如體驗彌生時代生活,觀星活動等。
開放時間:9:00-17:00
入場費:免費
 
6. 鹿野城跡公園
日本賞櫻名勝之一,其夜櫻的相當著名。每逢櫻花期吸引唔少旅客慕名而來賞櫻。
 
7. 鳥取市佐治天文台
除咗有展覽品展出以教育大眾天文知識,館內更設有日本國內少見的103cm反射望遠鏡及天象儀開放公眾使用。館內更有住宿設施,方便來訪者於晚上租用望遠鏡觀星。
入場費:300円 (成人),中學生以下免費
 
8. 青谷和紙工房 (あおや和紙工房)
館內除咗介紹和紙特色,文化,製法外。工房內設有和紙製作及和紙加工體驗班,推廣和紙文化。
開放時間:9點〜17點 (逢星期一休息)
入場費:免費
手工體驗500円/和紙燈罩加工800円起(需預約)
 
9. 放流人偶館(流しびなの館)
由平安時代流傳至今,每年農曆3月3日的放流人偶習俗,以祈福之用。將一男一女人偶放喺草盤上,加上菱餅及桃花,流放於千代川河。而
放流人偶館則展示各個時代的放流人偶及裝飾品等。
開放時間:9點〜17點 (逢星期三休息)
入場費:300円(中學生以下免費)
 
9. 鳥取縣立博物館
而想認識更多鳥取縣嘅歷史,可以去鳥取縣立博物館。
開放時間:9時~17時(逢星期一、公眾假期翌日休館)
入場費:180円
 
10. 渡邊美術館
而充滿藝術細胞嘅你,可以去渡邊美術館,館內展出多款浮世繪,屏風畫等。
開放時間:
10點〜15點 (星期一、三、四、五)
10點〜17點 (星期六、日及公眾假期)

(逢星期二休息)

入場費:900円 (成人)、500円 (高中、大學生)、300円(小學、中學生)、800円 (長者)
 
鳥取仲有好多温泉旅館㗎,位於倉吉市嘅三朝温泉,及米子市嘅三皆温泉區都係超出名嘅温泉聖地。玩完一日去浸吓放鬆身心,而且三朝温泉仲係以有療癒功效而馳名。
 
睇完你係咪都想去鳥取﹖以米子市為中心,一般可以喺岡山轉乘特急列車到米子,需時約2小時;或坐日本國內線到米子鬼太郎機場;而日本國外就暫時只有韓國首爾有國際直航機飛往米子。
 
------------
好麻煩? 講個好消息你知!!香港航空將會有直航到米子呀!無錯,係直航呀!只需要四個半鐘就可以到喇!時間仲要係靚嘅,唔係凌晨機!
香港航空嘅米子線將於2016年9月14日啟航,逢星期三、六,每星期兩班航班直航來回香港(HKG)及米子(YGJ)。
預定航班:
去程(香港-米子):12:00-16:30
回程(米子-香港):17:30-20:10