想玩又唔敢入?超詳盡波子機玩法加攻略!

 
大家去日本旅行會唔會見到周街都係波子機鋪(有人叫柏青哥,日文為pachinko),見到好想入去試下,但又怕唔識玩呢?
今次就嚟到新宿歌舞伎町入面間MARUHAN同大家介紹下日本波子機玩法。
 
首先大家無搞錯,波子機係一個身處日本灰色地帶,遊走法律罅去賭錢嘅遊戲,至於點樣走法律罅最後會講。講下自己嘅經歷先,本人後生幾年都沉迷過,試過一日輸咗$7000港紙先肯收手,入賭場輸$7000蚊唔係大件事,但當你發現日本梗有一間波子機係左近,每日放工都可以去幾千蚊上落時你就會覺得恐怖。唔係阻止大家玩,只係小賭怡情。以前波子機基本為4yen一粒波子,近年唔知係咪見大家窮就加入左2yen,1yen,甚至連0.5yen都有。
 
玩法流程:
1. 揀咗機坐低之後,係左上方入錢,然後按一下「貸玉制」就會出波子,唔同機一粒波子價錢會有分別,例如4yen一粒嘅話會每次扣500yen出125粒,用完再按一下就可以。
 
2. 玩法好簡單,右手扭住HANDLE彈波子,波子彈入中間個窿時,螢幕中間三個數字就會好似老虎機咁轉,三個數字轉到一樣就當贏,即係似老虎機咁!(入咗可以唔洗放手,大部份機種都可以儲4粒珠)
 
3. 其實當數字轉緊嗰嗰時候你可以做嘅可係睇住螢幕嘅「演出」(即係睇下動畫咁), 以北斗神拳為例,演出係指當你叫糊爭一個數字時,主角會同其他人BATTLE,打贏的話就等於你中晒三個字。再細微一點講嘅話,機旁燈光,字幕變色,BATTLE果時主角出嘅招,每一招打得贏對手嘅機率又唔同,「演出」愈精彩中嘅機會愈大,日本人會用個「熱」字黎形容。要正確講的話,其實波子入窿時已經決定咗中唔中,呢類「熱演出」都係等你興奮下。

就好似呢張圖,拳王兩個字平時正常會係白色。換句說話嚟講,貞子主題嘅話就係你撞到貞子就中(下!?),戀愛主題嘅話就係個女主角俾自己心宜嘅男仔示愛就抽中咁解。(聽到都想返屋企~)
中左喇喎
 
4. 中咗嘅話,有一個叫賞球口嘅地方會打開一路射波子入去(可能有少少難睇,如果呢部機就係寫住天晴川嗰個位),要注意嘅係有機種會係入開波個窿下面,有機種會係最右面,如果唔留意一路扣波子都無波子出。啱啱都提到,愈低中率嘅機回報愈大,出嘅波子都會多啲,而呢個時候螢幕大多數都係播下主題曲。
 
5.中完之後,當佢主題曲完左,賞球口關埋嘅時候,會進入「時短」狀態(下面再講),留意返要打左邊定右邊,你可以做嘅就係再求神拜佛望佢連中落去。好彩的話繼續中(我自己試過最勁連中19次),唔中的話由零再開始過。
 
自己沈迷過同係一間吸血嘅波子機舖打過工
以下係教學同自己小小心得(不同意勿插)
 
應該揀邊間波子機舖?
同賭場一樣,俾你贏到錢的話,佢地又點樣交租點樣可以做到咁大呢,但要增加勝率嘅方法係有。
1,客人多嘅鋪頭(有客有錢搵嘅鋪頭先有錢派,人多時扮下派錢又有廣告效果,無客嘅鋪頭只可以吸血交租交水電費出人工)
2,推廣日(例如導入新機種嘅日子,或者每一間舖都會揀一個數字,3號的話就會每個月嘅3、13同23號都係推廣日,通常會門口啲poster大大隻寫明)

即係咁樣,其實都幾易明。

入到舖頭後會見到機種多到仲難揀過車仔麵啲餸,基本上咩題材都有,漫畫題材當然好多,例如北斗之拳、牙狼、魯邦三世等等,我自己就鍾意揀自己有睇嘅漫畫,起碼唔會咁悶先。
 
每一部機上方都會有一塊牌仔寫住1/xxx,意思係指抽中嘅機會係幾多分之一。
範圍由1/2x(我見過最細嘅)至1/399都有,要留意嘅係呢個數字唔係指399次入面有一次抽中,而係每一次抽都係399分之1嘅機會中。日本人會用輕同重嚟表達,簡單嚟講愈重的話中嘅時候回報愈高。好運時399又好,一粒波子就夠中,唔好運時你轉2000次都唔中。


例如話呢部機就係1/314.75,咁呢個「確變突入率」又係咩呢?
大部份機中獎下會進入一個「時短」狀態,意思係指唔洗點用波子而快速回轉,有機種10次25次50次75次100次等等,通常愈重嘅機次數會愈多,呢個「確變突入率」即係中獎後,有60%機會再中。

機種選擇心得(都係嗰句,只係增加勝率,唔係包生仔)
1,新機(如果唔識分就睇周圍poster都貼住介紹嘅機,新機你唔派錢之後邊個打)
2,盡量近通道嘅機(同上,係人都經嘅通道做廣告效果)


3,睇針(呢個係進階,因為針嘅小小角度改變已經可以影響入窿嘅次數,直接影響燒錢進度)
4,用錢試(唔識睇針嘅朋友只可以用小小錢去感覺下部機識唔識轉,值唔值得打)
5,忍手返屋企(無好機的話唔好硬上)

離場
輸咗嘅話,忍住眼淚用埋佢廁所洗個面,靜靜咁離場吧。

贏咗的話,舊式舖頭要叫店員拎波子去洗(計波子),而新式舖頭因為會將波子總數存入機內,所以記住按番張卡出黎去Counter換獎品,通常都係煙酒食物生活用品,大舖的話雪櫃都有。

 
贏咗點換錢先?
記住波子機鋪係唔會直接換到現金,一開始提到波子機鋪走法律罅,政府唔想俾你開賭業但又想抽你稅,所以同波子機業有一個沈黙的條約,意思係你舖頭上無金錢交易就OK。
 

所以有呢個叫特殊景品、去到Counter時會見到有圖要時同店員指住就ok。但有一點要注意「換金率」成日變,幾年前一粒波子買入4yen賣出都係4yen,但而家係3yen前後(因地區同數量都會有唔同)。
最後笑住離開舖頭嘅你,唔好笑到唔記得自己只係拎住一塊硬膠。
 

呢間黃色招牌嘅TUC,每一間波子機嘅前後左右都一定有一間,你拎住頭先波子機舖嗰塊硬膠入去,就可以換到$$$$$$$$$$。


而家旅遊區舖頭都會有好多中文教學或者識講中文嘅STAFF,亦都好歡迎外國人入去玩唔洗怕。

(因為佢哋都好樂意接收你哋嘅付出)