【思人導遊】高円寺又食又逛超歎一日遊!

歡迎大家黎到高円寺!唔知大家有無聽過呢個地方呢?如果你係成日黎東京嘅我諗會知,但如果你只係去過東京1-2次,咁就有可能未聽過啦!高円寺位於東京都杉並區,搭JR「中央・総武線各駅停車」就會到嫁啦!呢到雖然唔夠其他熱門旅遊地區好熱鬧,但其實都好多好野食好野行!古着店就係呢到其中一個重點。一於一齊睇下呢個地方到底有咩值得去逛下啦!
 
【10:30~11:30】ベリーベリースープ
 
食早餐唔一定要食麵包/食飯嘅,飲湯都一樣可以做早餐!呢間「Very Berry Soup」就係專賣好多唔同款式湯嘅店鋪,佢嘅湯除左多款揀又好味之外,賣相都好靚下嫁!因為D湯唔係得水,而係有非常足料喺入面,好似下面嘅圖咁。
 
名稱:Very Berry Soup ベリーベリースープ 高円寺
地址:東京都杉並区高円寺南4-30-8 サウスコア1F
前往方法:JR高円寺駅南口出歩行3分鐘
營業時間:10:00~21:30
 
【12:00~14:30】高円寺純情商店街
係咪聽個名都覺得好想去呢?記得我第一次聽呢個商店街名嘅時候真係忍唔住笑左出聲!咁其實都係名黎嫁啫,唔係話果到嘅鋪頭特別純情D。純情商店街分北口同南口,北口係元祖商店街,南口就比較多古着店。
 
純情商店街有200間鋪頭以上,無論係餐廳,零食店,服裝店,藥妝店,家居,家電,娛樂地方等等乜都有,所以其實有排你行嫁!加上有唔少古着店喺入面,所以鍾意行古着嘅朋友一定唔好錯過啦!
 
名稱: 高円寺純情商店街
地址: 東京都杉並区高円寺北2-7-13 
前往方法:JR中央線高円寺駅北口步行2分鐘
 
【14:45~15:45】Baby King Kitchen 
 
我地黎到呢間Cafe restaurant食半lunch半下午茶啦!呢間有咩特別?就係佢嘅食物會有吉卜力作品出現啦!你睇下幾可愛!!如果你有小朋友,帶佢黎呢間餐廳就包你開心佢又開心!
 
連門口D黑板都吸引過人~
 
名稱:Baby King Kitchen 
地址:東京都杉並区高円寺北3-2-15 珍来ビル2F 
前往方法:高円寺駅歩行約3分鐘
營業時間:11:30~23:00
 
【16:00~16:30】グニフニ(for女生)
 
唔好意思呀仔仔們,我都係偏心女仔所以今次介紹嘅呢間古着店係只適合女仔嘅(咁當然如果你係男仔但鍾意嘅話都可以去睇下,但都係得女裝)。
 
呢到嘅商品全部都有種夢幻嘅感覺,無論係古着定其他雜貨,都充滿住少女氣息。即使唔岩買,我覺得去睇下都已經好夠開眼界。
 
名稱:グニフニ
地址:東京都杉並区高円寺南 3-45-8
前往方法:高円寺駅歩行約3分鐘
營業時間:13:30~20:00 
 
【17:00~18:00】小杉湯
 
去日本除左又行又食,體驗當地文化都係重點之一。 所以我地今次罕有地去錢湯!錢湯其實即係日本嘅公眾浴場,有睇開日劇/動漫嘅朋友應該都唔陌生,因為成日都會有主角去錢湯嘅畫面出現哈哈。
 
咁點解要去呢個小杉湯呢?因為呢到有個出名嘅牛奶風呂,可以促進新陳代謝同血液循環,仲可以令你肌膚變到滑溜溜!除此之外仲有岩盤浴泉,可以令你放鬆身體。
 
名稱:小杉湯
地址:東京都杉並区高円寺北3-32-2
前往方法:JR中央線高円寺駅北口步行5分鐘
營業時間:15:30~01:45 (星期四休息)
費用:大人460円/小學生180円/幼兒80円
 
【18:30~20:00】餃子処 たちばな
呢 到 有 得 免 費 食 餃 子 !!!係真嫁!呢間餐廳最大嘅賣點就係餃子0円!你可能心諗,有乜可能,但係唔到你唔信,大大隻字寫住。
 
點解會咁?哦係因為叫野飲送餃子!嘩都好癲啫!仲有成5隻喎,真係荀到無人有。
 
呢到嘅規矩就係總之一個人叫一杯野飲,就會送一客餃子。即係如果你10個人黎,就會有10客免費餃子啦!非常適合一班人去傾下計嘅時候邊飲邊食。
 
名稱:餃子処 たちばな
地址:東京都杉並区高円寺南3-69-1
前往方法:JR高円寺駅北口歩行3分鐘
營業時間:星期一至四18:00~24:00/星期五六17:00~25:00(星期日休息)