【思人導遊】食野・逛街・影相in代官山!

代官山,算唔上超著名嘅旅遊熱點,如果渋谷、新宿、原宿呢D係一線旅遊地區,咁代官山應該係二至三線。因為呢到人流相對較少,雖然係同渋谷好近,只係相差一個站,但熱鬧嘅程度就差好遠。雖然話佢係二至三線旅遊地區,但唔代表佢無野行無野食,反而其實有唔少潮流野都喺呢到。就等我同你介紹下代官山有咩餐廳正,有乜野鋪頭行啦!
 
P.S. 代官山街頭影相真係幾靚嫁,配合埋懶係唔望鏡頭嘅pose就岩哂!
 
首先,去代官山你就要喺渋谷搭東急東橫線(菊名行)。去到渋谷只需要跟住指示牌去搭呢條線就得,其實好簡單。
 
【10:00~11:00】松之助 N.Y
 
喺代官山食早餐就一定要食Pancake,因為代官山實在好多Pancake店。今次試嘅呢間係紐約風Cafe,而要食嘅就係呢Dモーニングパンケーキ(morning pancake)/970円起。雖然我未食過,但望到個賣相都覺得個pancake好鬆軟,而且網上食評都係有讚無彈,個個日本人都話「Oishi~」,咁無理由唔試下嘅。
 
環境行型格風,落地玻璃有種品味生活嘅感覺!
 
名稱:松之助 N.Y
地址:東京都 渋谷区 猿楽町 29-9 ヒルサイドテラスD-11
前往方法:代官山駅正面口出,歩行4分鐘
營業時間:9:00~19:00(Pancake至到17:00)星期一休息
 
【11:15~13:30】キャッスルストリート
 
呢個唔知係咪叫做一個景點,因為佢係一條街黎,一條由代官山駅一直沿著東急東橫線向渋谷方向行嘅通道,叫做「キャッスルストリート」。點解會行呢條街?無野嘅,多野睇囉。古着店、雜貨店多到嘔。
 
佢喺1985年就建成,所以會feel到一種懷舊氣色,懷舊得黎又有唔少影相位,好似呢座粉紅色嘅建築物咁,係咪好有外國feel呢?
 
名稱:キャッスルストリート
地址:渋谷区代官山町周辺
前往方法:駅出面就係(如圖)
 
【13:45~14:45】ごはんや一芯 代官山
 
點解要黎呢間餐廳食呢?原因好簡單,因為佢個飯桶好出名啊!係呀真係飯桶,Lunch set全部都會跟兩小碟配料、味增湯、漬物同埋呢個白飯任裝嘅飯桶,最貴果個set都只係1800円,價錢方面絕對OK呀!
 
飯桶最正就係一打開個蓋就會有一股飯香同熱氣飄出黎,好爽呀!而且呢到會跟季節改Menu,連日本酒同甜品都會跟住季節轉,所以唔會食黎食去都係同一樣野嫁。
 
名稱:ごはんや一芯 代官山
地址:東京都渋谷区猿楽町30-3 ツインビル代官山A棟 B1F
前往方法:由代官山駅歩行5分鐘(如圖)
營業時間:11:30~15:00、17:30~24:00
予算:1000円左右(Lunch)
 
【15:00~15:45】ZAPADY-DOO(ザパティ・ドゥ)
 
逛雜貨店都係黎到代官山必做嘅事,呢到有大大小小嘅雜貨店,for男仔嘅for女仔嘅for家居嘅乜都有。而呢間ZAPADY-DOO(ザパティ・ドゥ)主要賣嘅就係我諗個個都岩睇,無分男女嘅生活雜貨。
 
門口擺左好多七彩顏色嘅垃圾桶,好易認。
 
入面貨品多到擺得密密麻麻,有種睇唔完嘅感覺。同埋呢間雜貨店對比起其他店算平,由日用品到傢俬都有,可以慢慢睇下有無岩心水就帶番屋企啦!
 
名稱:ZAPADY-DOO(ザパティ・ドゥ)
地址:東京都渋谷区恵比寿西1-33-15
前往方法:由代官山駅歩行3分鐘(如圖)
營業時間:11:00~20:00
 
【16:00~16:30】旧朝倉家住宅
 
旧朝倉家住宅係1919年建成,喺代官山嘅街道同個性商店嘅存在下形成左好大嘅對比,就好似突然穿越左一樣。
 
黎到可以參觀佢2層高嘅主屋同埋庭園,庭園果到有好多日式裝飾物,好似石燈籠咁,好有日本風味。而如果你喺紅葉期間去,個畫面仲靚多幾倍呀!
 
即使你對歷史無興趣,去影相其實都好適合,唔係周圍都有呢種咁傳統日式嘅屋嫁。著靚少少去影分分鐘影到好似寫真咁添!鍾意歷史嘅朋友就唔洗講啦,必去!
 
名稱:旧朝倉家住宅
地址:猿楽町29-20 
前往方法:由代官山駅歩行4分鐘(如圖)
營業時間:10:00~18:00(11~2月收16:30),星期一休息
費用:一般100円,中小學生50円
 
【16:45~17:30】Waffle'S beulah 代官山店
 
呢間堪稱係代官山No.1嘅窩夫店,喺1996年已經開業。杜如風喺《東京攻略》都介紹過嫁!(講樣野你知,我本來都去左呢到諗住食窩夫,點知唔記得留意營業時間,6點半先到門口,跟住店員就好瀟灑咁對住我擰哂頭,然後...就沒有然後了。)
 
呢到嘅窩夫用左國產小麦粉同新鮮雞蛋等整成,外皮脆脆地,咬落去裡面又好鬆軟嘅口感真係無得頂!而且窩夫種類多,總有一款岩你口味。
 
窩夫大概660円-970円,有時會有跟季節嘅水果窩夫(如圖)。
 
名稱:Waffle'S beulah 代官山店
地址:東京都渋谷区代官山10-3
前往方法:由代官山駅歩行4分鐘(向渋谷方向直行,見到「代官山保育園」上斜路)
營業時間:11:30 a.m.~18:30 p.m.(一至五)11:30 a.m.~19:00 p.m.(六日紅日)
 
【17:45~19:30】代官山 蔦屋書店
 
唔識日文都唔洗走住,呢間唔係普通嘅書店,而係超大而且乜都有嘅店。幾大?請睇圖!佢分左3個館,每個館都有2層。
 
每一層都有佢自己嘅特色,咁書店就梗係有書啦,喺1、2、3號館嘅1樓都係書,而當中都會將書本分類得好清晰,好似「文學」、「藝術」、「料理」、「旅遊」等等,超級多書。
而喺2號館嘅2樓,就有個休息室叫「Anjin」,果到你可以邊睇書邊歎咖啡甚至飲酒都得!
3號館嘅2樓就有smartphone area,呢到除左有得買手機配件之外,仲會有專人幫你解答所有你對手機嘅疑問,直頭好似去左手機鋪咁呀!
 
至於3號館嘅1樓就會有個counter叫做「T-Travel」,呢個就正啦!呢到會有對旅行有好豐富經驗嘅職員黎根據客人個別嘅需求,幫佢手plan旅行呀!如果你買左本旅遊書,就可以即刻拎過黎呢到搵專人同你一齊plan,比建議你,超方便!(不過可能要識日文先得,唔知D職員識唔識英文)
喺同一層仲有starbucks,1號館1樓就有FamilyMart,咁你話係咪乜都有啦!
 
名稱:代官山 蔦屋書店
地址:渋谷区猿楽町17-5
前往方法:由代官山駅歩行5分鐘(如圖)
營業時間:07:00~02:00
 
【19:45~21:15】創作和食 代官山 楚々
 
楚々係一間和食餐廳,注重傳統味道,但為左得到更好嘅味道又會加入新野嘅創作和食。食物價錢十分合理,而且賣相精緻,未食之前剩係望住都好吸引。好似以下嘅食物咁。
 
環境方面,裝修簡單,燈光暗暗地有D浪漫嘅感覺,好似幾適合情侶。雖然佢係和食,但店內就有DD西洋風,配搭幾得意。
    
 
名稱:創作和食 代官山 楚々
地址:東京都渋谷区恵比寿西1-34-28 1F
前往方法:代官山駅歩行30秒(如圖)
營業時間:晚飯/18:00~24:00(LastOrder 23:00)