【思人導遊】超多元化.玩到攰お台場一天遊!

台場一向都係超有人氣嘅地方,因為呢到好多觀光同玩樂設施,無論大人細路、一大班朋友、家庭旅行定情侶拍拖都適合。而由於台場同其他旅遊地區唔算近,所以我建議各位安排行程果時,最好plan一日喺呢到。你都唔想趕頭趕命仲要玩唔哂嫁係咪先?好啦事不宜遲,即刻同你睇下台場有咩正野啦!
 
咁首先,去台場嘅交通其實都好方便。去台場果個站名叫做「東京テレポート」,咁要去呢個站就要搭「りんかい線」。但其實呢條線係同JR埼京線互通,即係話你可以喺池袋/新宿/渋谷到搭埼京線,然後就直到嫁啦!
 
【09:30~10:30】bills お台場
 
呢間bills一啲都唔惹少,因為佢來自悉尼,被譽為係世界第一早餐。而佢出名嘅就係pancake!
 
嘩係咪睇到張圖都流哂口水呢!?(PANCAKE一份約1400円)
 
名稱: bills お台場
前往方法:由東京テレポート駅歩行5分鐘(350m)
營業時間:[星期一至五、紅日前夕]09:00〜23:00/[星期六、日、紅日]08:00〜23:00
 
【10:45~12:15】フジテレビ
 
黎到台場一定要去嘅,非富士電視台莫屬啦!我諗鍾意日本嘅朋友絕大部份都鍾意睇日本節目,所以黎呢個富士電視台潮聖係必需嘅!
 
佢嘅外型真係離遠都認得,因為中間有個大波波就係啦!
 
裡面有好多人氣番組嘅背景同小道具,令你好似走入左自己常見嘅電視畫面咁,比10個趣呀!(你而知唔知呢個佈景係咩節目呢?)
 
名稱: フジテレビ本社ビル
地址:東京都港区台場2-4-8
前往方法:由東京テレポート駅歩行5分鐘
營業時間:10:00~18:00(星期一休息)
 
【12:30~13:30】久臨 ダイバーシティ東京プラザ店
 
如果你想食D又好味又抵食嘅午餐,我諗food court就岩你啦!呢間「久臨」係食沾麵同拉麵嘅,佢正咪正在好食夾抵食囉!一碗沾麵最貴都只係830円,係咪抵到暈呢?
 
而且佢位於DIVER CITY TOKYO PLAZA嘅foodcourt入面,呢個咁多野行嘅商場,一食完就可以行街shopping,好方便呀!
 
名稱: 久臨 ダイバーシティ東京プラザ店
地址:東京都江東区青海1-1-10 ダイバーシティ東京プラザ 2F
前往方法:由東京テレポート駅歩行7分鐘
營業時間:10:00~22:00(L.O21:30)
 
【13:30~15:00】ダイバーシティ東京プラザ
 
話左頭先食lunch係喺呢個商場入面,咁食完就梗係要喺到行下街啦!Diver City就咁聽可能大家會load唔到有咩特別,但如果我一講起巨型高達,我諗大家都知啦掛!無錯啦,呢個商場就係門口有個超巨型高達果到啦!點都要影番張相掛?
 
如果你對高達無興趣都唔緊要,因為呢到嘅鋪頭真係老少咸宜,年輕人服裝、成人服裝、女僕café、藥妝店、300円精品店等等乜都有,實有幾間岩你行嫁!
 
名稱: ダイバーシティ東京プラザ
地址:東京都江東区青海1-1-10 
前往方法:由東京テレポート駅歩行7分鐘
營業時間:商店10:00~21:00/food court 10:00~22:00/餐廳 11:00~23:00 
 
【15:15~18:45】デックス東京ビーチ
然後我地就黎到將會逗留最耐嘅DECKS東京啦!點解會用最多時間喺呢到?因為呢到實在太太多野玩了!有鬼屋、室內機動遊戲JOYPOLIS、迷宮館之類嘅設施,玩到你無力呀!
 
*東京トリックアート迷宮館
 
嗱其實佢唔係迷宮黎嘅,而係類似3D影相館咁樣,利用視角錯覺黎比人影D好得意嘅相。佢有5個區域,好似係江戶area、唔恐怖嘅鬼屋等。
 
名稱: 東京トリックアート迷宮館
地址:デックス東京ビーチアイランドモール(Island mall) 4F
營業時間:11:00~21:00 
費用: 成人(高中生以上)900円/小童(4歲-中學生)600円
 
*東京ジョイポリス
 
東京Joypolis其實係由係人都識嘅機鋪SEGA營運嘅國內最大型室內主題樂園,裡面有20種以上嘅遊戲,落雨都有得玩真係正呀!
 
名稱: 東京ジョイポリス
地址:デックス東京ビーチ 3F~5F
營業時間:10:00~22:00 
費用: 入場費800円(18歲以上)/500円(18歲以下)/日間passport(入場+任玩) 4300円(18歲以上)/3300円(18歲以下)/夜間passport(入場+任玩after平日17:00,假期16:00) 3300円(18歲以上)/2300円(18歲以下)
 
名稱: デックス東京ビーチ
地址:東京都港区台場1-6-1
前往方法:由東京テレポート駅歩行5分鐘
營業時間:11:00~21:00 
 
【19:00~20:30】醍醐 お台場・デックス東京ビーチ店
黎到台場晚餐,除左食物之外,夜景都係好重要嘅一環。於是我就揀左呢間有得歎住靚景食燒肉嘅餐廳啦!同埋其實呢間野都係喺番岩先好多野玩果個地方,所以唔洗走黎走去咁煩啦!
 
睇到網上嘅評語,有唔少人都話被個夜景感動到,講到咁,係咪好想去睇下呢?
 
雖然佢係韓國料理,但有咩所謂呢?因為佢都有靚牛肉食,好似黑毛和牛咁,聽到都流口水啦!
 
名稱: 醍醐 お台場・デックス東京ビーチ店
地址:東京都港区台場1-6-1 デックス東京ビーチシーサイドモール 6F
前往方法:由東京テレポート駅歩行5分鐘
營業時間:11:00~24:00
 
【21:00~】東京レジャーランド
 
係呀我地又去玩啦! 今次呢個娛樂中心就喺Palette Town裡面嘅,呢到有好多野玩嫁,好似保齡、唱K、鬼屋、打機、夾公仔、仲有室內運動玩添!
 
而且呢到嘅設施最早都收23:30,所以其實有排玩嫁!
 
名稱: 東京レジャーランド パレットタウン店
地址:東京都江東区青海1-3-15パレツトタウン
前往方法:由東京テレポート駅歩行6分鐘
營業時間:【Game Corner】10:00~23:50【保齡】24小時【唱K】13:00~翌朝6:00