【思人導遊】「超充實」玩樂×購物之旅@上野・浅草AREA

今次呢個行程豐富咯,我地會去三個地方---仲御徒町>上野>浅草。實行要玩樂有玩樂,要食有得食,要買有得買嘅一日旅程!所以當你真係跟住我嘅路線去,記得帶定多D啲money啦!呢個行程比較適合逗留喺日本一星期內嘅朋友,因為有DD走馬看花,每個地方都只係行三份一日咁多。好似上野咁,雖然行程裡面已經有4個景點,但其實上野仲有好多同傳統文化有關嘅地方(東京國立博物館、國立西洋美術館等)係行程無嘅。由於今次行程以香港人最愛嘅食玩買為主線,所以都要有D取捨,除非你去東京成個月嫁啫係咪?
 
好啦,即刻講下個行程!交通方面都係好易明,今次我地唔搭JR,而係搭東京Metro。首先我地第一站係去到仲御徒町,之後搭日比谷線去上野。再之後就搭銀座線去浅草(如圖)。剩係計車程其實好近,加埋D上落車等車時間,十幾分鐘已經搞掂!
 
【09:45~10:30】珈琲家 東上野店
 
呢間店其實係出名咖啡,但因為我個人對咖啡無乜興趣,所以就唔小心focus左喺佢個熱香餅到啦!
 
嘩你睇下....真係見到都覺得鬆鬆軟軟好好食咁啦!呢到嘅熱香餅一塊300円,兩塊500円,價錢中等,但望落真係好吸引!而如果鍾意咖啡嘅朋友就更加適合,因為呢到有超多款咖啡,除左最普通果D,仲有北歐風咖啡、法國風、荷蘭風咖啡等等,超多選擇!
 
環境都唔錯,有少少外國嘅感覺,呢D座位都應該幾舒服。加上佢位置距離駅又近,唔洗行餐死先食到個早餐,所以我就會揀呢間「珈琲家」試下啦!
 
名稱:珈琲家 東上野店
地址:東京都 台東区 東上野 2-10-2
前往方法:距離仲御徒町站328米
營業時間:08:00~19:00(星期六、日、紅日休息)
 
【10:45~12:30】多慶屋
 
黎到仲御徒町食完野,就要去我地唯一嘅景點-多慶屋行街啦!唔知點解用廣東話讀呢個名好似有種老套嘅感覺哈哈。但其實佢係咩鋪頭黎嫁呢?與其話佢係間雜貨屋,不如話佢係「驚安の殿堂」D朋友!因為佢有嘅貨品我諗真係拍得上「驚安の殿堂」咁多嫁。
 
佢嘅外表都好易認,見到成幢紫色就係佢啦!咁種類到底有幾多?有食物、日用品、美容用品、首飾、男女時裝、手錶、家具、電器、運動用品等等等等。好啦簡單黎講即係乜_都有。聽種類都唔夠誇張,我話你知,佢竟然有8棟!!!你無聽錯,係8棟,請睇圖。
 
每棟放嘅貨品都唔同,所以其實你一定要睇定floor plan先去行,唔係我驚你行到天黑都未行完。(Floor Plan在此:https://takeya.co.jp/shop/
 
名稱:多慶屋
地址:東京都台東区台東4-33-2
前往方法:東京Metro仲御徒町駅下車,3號出口即到
營業時間:10:00~20:30
 
【12:45~13:45】みなとや 上野2号店
 
話咁快我地就黎到上野,行左多慶屋咁耐都係時候食個Lunch。我地一於喺上野アメ横商店街到食啦,食完就順便可以行街。黎到アメ橫丁當然要食下海鮮丼(魚生飯)啦,呢間「みなとや」係アメ橫丁嘅名店黎,店內無文字Menu,全部都係睇相黎order(對於外國人黎講都幾方便)。
 
呢到嘅魚生飯比較細碗,當然價錢都比較平。但唔洗驚細碗唔飽,因為你知アメ橫丁沿路都有一串串水果果D小食賣,食得太飽反而食唔落其他野呀!
 
名稱:みなとや 上野2号店
地址:東京都台東区上野4-10-17
前往方法:東京Metro上野駅5b出口,歩行至少6分鐘
營業時間:星期一至五11:00~19:30/星期六、日、紅日11:00~20:00
 
【13:45~14:45】アメヤ横丁商店街
 
食完飯就可以即刻行下呢條咁出名嘅「アメ橫」啦!好多人都知呢到有咩行嫁啦,就係好平嘅運動野啦!(我平時甚少買運動野所以唔知其實係咪算好平,好多就真嘅)
 
 除此之外,仲有好多野食,特別係一串串嘅水果。
 
 仲有一部份非運動系商鋪,整體黎講都幾多野睇嫁!
 
名稱:アメヤ横丁商店街
地址: 東京都 台東区 上野6-4-6
前往方法:東京Metro上野駅5b出口,歩行5分鐘
 
【15:00~16:00】不忍池
 
行左咁耐,都係時候抖一抖,去公園親一親大自然。醒目嘅你一定估到,上野嘅公園一定係上野恩賜公園啦!無錯,之但係我地嘅重點只係佢當中嘅不忍池。
 
如果你覺得好攰,可以喺呢到坐下天鵝船仔出池面玩下影下相(天鵝船30分鐘700円) ,絕對係一個省力又好玩嘅休息節目!如果撞正櫻花期你就幸福啦,因為個環境真係靚到好似置身於日劇約會地點咁呀!而夏天就有蓮花,都唔錯嫁!
 
名稱:不忍池(上野恩賜公園)
地址:台東区上野公園5-20
前往方法:東京Metro上野駅歩行2分鐘
營業時間:05:00~23:00(12月-2月星期三休息)
 
【16:15~18:15】ABAB
 
黎緊講嘅呢個商場老老豆豆只係岩女人行,因為全部都係女人衫褲鞋襪(女士們請尖叫)!呢到有好多鋪頭,我覺得佢係小型同平價版嘅渋谷109,除左一啲出名嘅日牌,仲有好多「雜不lung」牌子,又有cafe又有DAISO,果次去我行左勁耐都唔捨得走!
 
而我最推介嘅就係喺6樓嘅呢間飾物店,因為果到D飾物全部都係300円咋!仲要D款係靚嫁喎,而有D襪就300円3對咁,真係超級超級抵呀!
 
仲有好多又平又靚嘅內衣店,好多都1000円一套,款又靚又好著,正過香港嘅sxxty exxht多多聲!買到手都軟埋!
 
名稱:ABAB
地址:台東区上野4-8-4
前往方法:東京Metro上野駅歩行10分鐘(其實同不忍池、アメ横都好近)
營業時間:10:00~21:00
 
【18:30〜19:30】中華そば つし馬
 
血拼完一定係又攰又餓嘅,所以我地就離開上野黎到浅草啦!首先我地要差差電,食個靚飯先啦!晏就我地食左飯,夜晚一於食麵!而因為呢日用左唔少錢買野,所以晚餐都唔會話食好貴,揀D平得黎又好好食嘅餐廳啦!
 
呢間係大人氣嘅拉麵屋,浅草有好多間拉麵店,但呢間係被推介指數最高嘅!佢仲上過好多次電視,係唔同媒體電視都有介紹嘅餐廳黎,所以來頭唔小嫁!呢到最出名嘅就係呢碗中華そば/750円,個個食完都對個湯底讚不絕口,實際到底係咩味咁勁都真係要親身食過先知!
 
而第2位就係呢個沾麵/750円,正嘅地方係個湯底夠濃味同埋自家製麵身口感好。
 
名稱:中華そば つし馬
地址:東京都台東区浅草1-1-8
前往方法:東京Metro浅草駅6號出口歩行1分鐘
營業時間:11:30~21:30(賣哂湯就無哂)
 
【19:45~】浅草寺
 
好啦黎到另一個重頭戲-夜行浅草!陽光下嘅雷門大家都去過,咁亮左燈嘅雷門大家又見過未呢?雖然夜晚D鋪頭會關哂,但個人認為夜晚嘅雷門望落多左種震撼嘅感覺。加上夜晚人流少好多,行起上黎舒服D之餘,影相都唔洗就住就住。
 
雖然「仲見世」呢到無哂鋪頭,但大家見唔見到喺閘門到全部都有D畫喺上面,邊行邊睇真係有另一番風味!其實上面嘅畫全部都係同浅草嘅歷史/儀式有關,細心睇可以學到唔少野添!
 
一直行到入去五重塔と宝蔵門呢到,就會見到五重塔變左金黃色,好有氣派。呢到慢慢行下影下相,一個休閒嘅夜晚就喺到渡過啦!
 
名稱:浅草寺
地址:東京都台東区浅草2-3-1
前往方法:東京Metro浅草駅歩行5分鐘 
營業時間:燈亮至23:00